ისინი კატეგორიულად მოითხოვდნენ ჟურნალისტებს დაეტოვებინათ ტერიტორია, სადაც პრეზიდენტი უნდა შეჩერებულიყო. ვიდეომასალაში კარგად ისმის, რომ დაცვის წევრი ამბობს, რომ საჯარო სივრცე “დაცული ობიექტია”.
_ დააძრე, ერთი, რა გაქვს! – ასეთი მიმართვის შემდეგ, დაცვის წევრებმა ჟურნალისტებს ფოტოკამერიდან კადრები წაუშალეს, მობილური ტელეფონებიც შეუმოწმეს, ჟურნალისტების პირადი მონაცემები მოითხოვეს და შემდეგ,შემთხვევის ადგილიდან რამდენიმე მეტრზე გაიყვანეს. “გურია ნიუსმა” ეს ინფორმაცია შესაბამისი კადრების თანხლებით გაავრცელა.
25 ივლისს, “გურია ნიუსის” გამომცემელს, ია მამალაძეს პრეზიდენტის ადმინისტრაციის უფროსის მოადგილე ირმა ნადირაშვილი ტელეფონით დაუკავშირდა და მომხდარის გამო წუხილი გამოთქვა. ქალბატონი ირმა თვლის, რომ რეპორტიორებს ჟურნალისტურ საქმიანობაში ხელი არავინ უნდა შეუშალოს. მანვე შემოგვთავაზა, რომ დაცვის სამსახური უზრუნველყოფდა მეხსიერების ბარათზე კადრების აღდგენას.
ამის შემდგომ, დაცვის სამსახურის პრესსამსახურიდანაც დაგვირეკეს, მომხდარზე წუხილი გამოთქვეს და მეხსიერების ბარათის აღდგენა შემოგვთავაზეს.
ოზურგეთში მომხდარ ფაქტს საქართველოს ჟურნალისტური ეთიკის ქარტია გამოეხმაურა და განცხადება გაავრცელა, რომელშიც წერია: “გურია ნიუსის” მიერ დღეს გავრცელებული ინფორმაციით, ამავე მედია საშუალების ჟურნალისტებს გიორგი გირკელიძესა და ჟანა მეგრელიშვილს, რომლებიც ცდილობდნენ ქ. ოზურგეთში საქართველოს პრეზიდენტის ვიზიტის გაშუქებას, პრეზიდენტის დაცვის სამსახურმა წაუშალა გადაღებული ფოტოები. ფოტოების წაშლის მიზეზად ჟურნალისტებს განემარტათ, რომ შეხვედრა იყო დახურული.
ქარტია აღნიშნავს, რომ სამოქალაქო საზოგადოების და მედიის წარმომადგენლების მუდმივი პროტესტის მიუხედავად, ჟურნალისტების მიმართ საჯარო მოხელეთა მხრიდან უკანონო ქმედებების განხორციელება დღითი დღე იზრდება და ინტენსიურ სახეს იძენს. ქარტია ხაზგასმით აღნიშნავს, რომ ყოვლად დაუშვებელია ჟურნალისტის მიერ მოპოვებული მასალის წართმევა და განადგურება.
ქარტია მოუწოდებს საქართველოს პრეზიდენტის პრესს სამსახურის წარმომადგენლებს დაიცვან ჟურნალისტთა უფლებები და ინტერესები. ასევე, დაისვას იმ პირთა პასუხისმგებლობის საკითხი, რომელთაც გადაამეტეს უფლებამოსილებას და ქარტიის წევრ ჟურნალისტებს წაუშალეს გადაღებული ფოტოები.”
“გურია ნიუსის” რედაქცია მიიჩნევს, რომ ოზურგეთიდან მეხსიერების ბარათის გამოგზავნის, კადრების აღდგენის და შემდგომ მისი გამოყენების საჭიროება აღარ არსებობს, რადგან მოვლენამ დაკარგა აქტუალობა _ პრეზიდენტის ვიზიტი უკვე გაშუქდა, ხოლო ჟურნალისტების საქმიანობაში ხელშეშლის ფაქტი ფაქტად დარჩა. რედაქცია ასევე, სრულად იზიარებს ქარტიის მოწოდებას, რომ აუცილებელია, პრეზიდენტის პრესსამსახურმა და ადმინისტრაციამ მომავალში მაინც უზრუნველყონ ჟურნალისტთა უფლებების დაცვა. ასევე, აუცილებლობად მიგვაჩნია, კანონის შესაბამისად დაისაჯონ ის პირები, რომლებმაც, მინიმუმ, გადაამეტეს სამსახურებრივ უფლებამოსილებას, რადგან კანონის დარღვევის საპირწონე “წუხილის გამოთქმა” სულაც არ გახლავთ!
