სხდომა იმდენად ხმაურიანი იყო, რომ საკრებულოს თავმჯდომარემ ალეკო მამეშვილმა ლელა ნაცვალაძეს პირდაპირ უთხრა, _ ამ სხდომას შენი და კობა ხაბალაშვილის დისკუსიად ვერ გადავაქცევო.
ლელა ნაცვალაძემ პოზიციონერი დეპუტატის შემოტევის მიუხედავად, ენერგია და მარიფათი არ დაზოგა და სრულიად საკრებულოს მიმართა:
_ ბოლო სიტყვა უნდა ვთქვა, თქვენ არჩევნები გაქვთ წინ და ამიტომ გაზარდეთ კატასტროფულად ოზურგეთის ბიუჯეტი. რაც ცვლილებებით არის გათვალისწინებული, ეს თანხა ლეგარულად გჭირდებათ. დაამატეთ, დაამატეეეთ, რა განაღვლებათ, მე გემშვიდობებით, მივდივარ ახლა, მაგრამ არ გეგონოთ სამუდამოდ მივდივართ. თქვენი უფლებამოსილების შეწყვეტას მივცემ ხმას! _ დაუბარა და დარბაზი დატოვა.
მეორე ოპოზიციონერმა დეპუტატმა თემურ სალუქვაძემ უფრო მშვიდი ტონი არჩია გამოსვლისას, მაგრამ დარბაზი მაინც დატოვა.
_ დღეს, რაღაცას აკეთებს მთავრობა, მაგრამ ეს იმიტომ ხდება, რომ მთავარ და ბევრ საქმეს აკეთებს ბიძინა ივანიშვილი. მადლობა, უფალს! _ ამ სიტყვებით მანაც დატოვა იქურობა და დარბაზს გარეთ ჯერ კიდევ ხმამაღლა მოლაპარაკე ლელა ნაცვალაძეს მიჰყვა.
საკრებულოს თავმჯდომარემ, ალეკო მამეშვილმა კი არხეინად მიაძახა: „შენი გაკეთებული საქმეებით იტრაბახე, სხვის გაკეთებულს თავი დაანებე!“
