ამ ორი დღის განმავლობაში, ლანჩხუთსა და ზუგდიდში განვითარებული მოვლენების გათვალისწინებით (ვგულისხმობთ “ქართული ოცნების” კარდაკარის მონაწილეებზე დაკისრებულ მილიონიან და მილიარდიან ჯარიმებს) “გურია ნიუსი” გთავაზობთ იმ ცვლილებას, რომელიც საქართველოს სისხლის სამართლის კოდექსში შევიდა.
ცვლილება, რომელსაც ხელს პრეზიდენტი სააკაშვილი აწერს, ძალაშია 2012 წლის 12 ივნისიდან.
“საქართველოს კანონი
საქართველოს სისხლის სამართლის კოდექსში ცვლილების შეტანის შესახებ
მუხლი 1. საქართველოს სისხლის სამართლის კოდექსში (საქართველოს საკანონმდებლო მაცნე, №41(48), 1999 წელი, მუხ. 209) შეტანილ იქნეს შემდეგი ცვლილება:
“მუხლი 3741 . საბანკო ანგარიშის მონიტორინგის, მასზე ყადაღის დადებასთან ან კომპიუტერულ მონაცემთან დაკავშირებული საგამოძიებო მოქმედებების შესახებ მონაცემების გახმაურება
1. საქართველოს სისხლის სამართლის საპროცესო კოდექსის 1241 მუხლით გათვალისწინებული საბანკო ანგარიშის მონიტორინგის ან 136-ე−138-ე მუხლებით გათვალისწინებული კომპიუტერულ მონაცემთან დაკავშირებული საგამოძიებო მოქმედებების შესახებ მონაცემების გახმაურება − ისჯება ჯარიმით ან თავისუფლების აღკვეთით ვადით სამ წლამდე.
2. საქართველოს სისხლის სამართლის საპროცესო კოდექსით გათვალისწინებულ საბანკო ანგარიშზე ყადაღის დადებასთან დაკავშირებული საგამოძიებო მოქმედებების შესახებ მონაცემების გახმაურება, აღნიშნული ანგარიშის მესაკუთრის მიერ ამ ინფორმაციის მოთხოვნამდე − ისჯება ჯარიმით ან თავისუფლების აღკვეთით ვადით სამ წლამდე.”
მუხლი 2. ეს კანონი ამოქმედდეს გამოქვეყნებისთანავე.
საქართველოს პრეზიდენტი მ. სააკაშვილი.
თბილისი, 2012 წლის 12 ივნისი. №6447-რს.”
ჩვენ უკვე ვიუწყებოდით, რომ “ქართული ოცნების” მიერ ჩატარებული “კარდაკარის” მონაწილეებს, გუშინ, დილით, საკუთარი საბანკო ანგარიშები დაყადაღებული დახვდათ.
დაყადაღებულ აბონენტებს დაყადაღების მიზეზი ბანკებში ვერ უთხრეს. როგორც ერთ-ერთი ჩვენი რესპონდენტი ამბობდა, იგი მილიონი ლარით დააჯარიმეს _ ყოველ შემთხვევაში, მისი თქმით, ასე ეწერა საბანკო ქვითარზე.
“გურია ნიუსმა” მოიპოვა ერთ-ერთი დაყადაღებული აბონენტის საბანკო ქვითარი, რომელზედაც ანგარიშზე ნაშთად მითითებულია არა მინუს 999 ათას 999 ლარი, როგორც გუშინ ამბობდა ჩვენი წყარო, არამედ… მინუს 999 მილიონ 999 ათას 991 ლარი და 79 თეთრი!!!
“კარდაკარის” ერთ-ერთი მონაწილე, რომელმაც ამ ჯარიმის შესახებ შეიტყო, ცუდად გახდა და ბანკიდან პირდაპირ რეანიმაციაში გადაიყვანეს. ნერვიულობის ნიადაგზე მას ასთმური შეტევა დაემართა და ლანჩხუთის საავადმყოფოს რეანიმაციულ განყოფილებაში დასჭირდა მკურნალობის გავლა. საბედნიეროდ, მისი მდგომარეობა გაუმჯობესდა.
