თუ თქვენ პოზიციონერები ხართ, მე ყველას მინდა, გითხრათ _ ყველაზე დიდი მარაზმი ისაა, ამ ერთ მუჭა ქვეყანას პოზიცია-ოპოზიციად რომ ყოფთ. მე მრცხვენია ამ ქვეყანაში ცხოვრების, სადაც პროფესიონალიზმზე მაღლა პოლიტიკური მრწამსი დგას. აი, ახლა, დღეს, 30 ივნისს, 2012 წელს, მე კიდევ ერთხელ დავრწმუნდი: დიპლომი, გინდ წითელი იყოს და გინდ ლურჯი, სასწავლებელი და უმაღლესი განათლება, თავისი ხარისხებით, განათლებისა და ინტელექტის გარანტი არ არის. ჩემო პატარებო, რაც მთავარია, თქვენ არაფერი დაგკლებიათ, დააკლდა მათ, ვინაც თქვენი კეთილი ენერგია ვერ მიიღო დღეს. თუ მათ თქვენ არ უყვარხართ, ეს მათთვის არის უარესი. თქვენ მართლა შექმნით დიდ და ნათელ მომავალს, მონები კი მონებად დარჩებიან,” _ ეს სტატუსი, 1 ივლისს, სოციალურ ქსელ ფეისბუქში ოზურგეთის მუნიციპალიტეტის მეორე საბავშვო ბაღის უფროსი ჯგუფის აღმზრდელმა, ეკა ნინიძემ განათავსა.
იმავე დღეს, “გურია ნიუსთან” საუბრისას მან აღნიშნა, რომ სტუმრებს მთელი საათი ელოდებოდნენ:
_ მთელი საათი გვალოდინეს და არ მოვიდნენ. დაპატიჟებული გვყავდა საკრებულო, გამგეობა და გუბერნატორი. როგორც მითხრეს, მათ არ ეცალათ და წარმომადგენლები უნდა მოსულიყვნენ. მოგვიანებით გაირკვა, რომ სკოლამდელი სასწავლო-სააღმზრდელო ცენტრის დირექტორი, მაკა ჭყონია და მთავრობის წარმომადგენელი, ირინა საჯაია, სავარაუდოდ, ერთადერთი მიზეზით _ ჩემი პოლიტიკური მრწამსის გამო არ მოვიდნენ, _ ამბობდა ნინიძე.
ამ მასალის გამოქვეყნებიდან 28 დღის შემდეგ, კი ეკა ნინიძე სამსახურიდან გაათავისუფლეს. ნინიძემ სამსახურიდან გათავისუფლების შესახებ არა საბავშვო ბაღის გამგისგან, არამედ ოფიციალური უწყებით გაიგო:
_ გუშინ, სახლში უწყება გამომიგზავნეს. ხელშეკრულება დაგიმთავრდა და სამსახურიდან თავისუფალი ხარო, _ ამბობს ჩვენთან საუბრისას პედაგოგი.
ნინიძე, რომელიც ქართული ენისა და ლიტერატურის პედაგოგია და ცოტა ხნის წინ, გამოცდები წარმატებით ჩააბარა, მიიჩნევს, რომ სამსახურიდან პოლიტიკური შეხედულების გამო გაუშვეს.
_ პედაგოგად მუშაობის 10 წლის სტაჟი მაქვს. მიმუშავია მთაში და ბარშიც. 2009-2010 წლებში ვიყავი კონსულტანტ-მასწავლებელი რაჭაში, ვიყავი ჟურნალისტი და სხვადასხვა დროს ვმუშაობდი თბილისის და ოზურგეთის სხვადასხვა გამომცემლობაში, ჟურნალსა და გაზეთში. არც ერთი საყვედური და გაფრთხილება არ არის ჩემს პორთფოლიოში, ჩემს საქმეს ყოველთვის ვაკეთებ დიდი რუდუნებით… და დღეს მე ოზურგეთიდან იმიტომ მივდივარ, რომ უბრალოდ განსხვავებულად ვფიქრობ?! ამასთან ერთად მინდა ხმამაღლა ვთქვა _ მე არც ერთი პარტიის წევრი არ ვარ, არც ერთი პარტიის აქტივისტიც არ გახლავართ. მე ვარ ერთი რიგითი მოქალაქე, რომელსაც თავისი საქმის კეთილსინდისიერად კეთება არ დააცალეს ოზურგეთში, _ ამბობს “გურია ნიუსთან” საუბრისას ეკა ნინიძე.
გათავისუფლებული პედაგოგი, გათავისუფლების მიზეზების დეტალების გარკვევას ორშაბათს შეეცდება: _ ორშაბათს ვეცდები, დეტალები გავარკვიო. საინტერესოა, რატომ შემიწყდა მხოლოდ მე ხელშეკრულება და რატომ გამომარჩიეს დანარჩენ 27 პედაგოგში. ალბათ, აქვთ არგუმენტი და მინდა, რომ ეს არგუმენტი მოვისმინო, _ აღნიშნავს ნინიძე.
ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრის ხელმძღვანელთან დაკავშირებას საკმაოდ დიდხანს ვცდილობდით. ჭყონიამ ჯერ ჩვენს სატელეფონო ზარებს არ უპასუხა, მოგვიანებით კი ტელეფონი გაგვითიშა.
ცენტრის პოზიციის გაგება, ჩვენ პრესსამსახურის საშუალებით შევძელით: _ ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრს, #2 ფილიალის აღმზრდელთან ეკა ნინიძესთან შრომითი ხელშეკრულება 2012 წლის 31 ივლისამდე აქვს გაფორმებული. შრომითი ხელშეკრულების ვადის გასვლის თაობაზე მას კანონის თანახმად 27 ივლისს შეტყობინება გაეგზავნა, _ ასეთ კომენტარს გვაწვდიან ეკა ნინიძის გათავისუფლებაზე ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრიდან.
