_ როგორ დასრულდა თქვენს მიერ ჩატარებული “კარდაკარი”?
_ უზარმაზარი სამუშაო ჩავატარეთ “კარდაკარის” პროგრამასთან დაკავშირებით. ეს იყო ფაქტობრივი კონტაქტი ყველა ამომრჩეველთან. ჩვენმა აქტივისტებმა კარდაკარ ყველა ოჯახი შემოიარეს.
_ “კარდაკარის” ჩატარების დროს რამე სერიოზული დარღვევა დაფიქსირდა?
_ ცენტრალური საარჩევნო კომისიიდან მივიღეთ აბსოლუტურად გადაუმოწმებელი მონაცემები. რა თქმა უნდა, ეს იყო საშინელი სიები, არის მისამართები სადაც მიწერილია არა ერთი, არამედ ათობით ადამიანი. ყველა საარჩევნო უბანზე გარდაცვლილები და საზღვარგარეთ მყოფი ამომრჩევლები ფიქსირდებიან. შეიძლება ითქვას, რომ იმ სიებში, რომელიც ცენტრალურმა საარჩევნო კომისიამ წარმოგვიდგინა, სრული ქაოსია. სიებში დაახლოებით 20-30% მცდარი მონაცემები იყო შეტანილი. შეიძლება ითქვას, რომ სიებში ასეთი ქაოსი ხელოვნურად არის გაკეთებული, რაც ოპოზიციას ნამდილად არ წაადგება.
_ კონკრეტული ციფრების მიხედვით რომ ვიმსჯელოთ, როგორია ეს მონაცემები?
_ ჩვენი აქტივისტების მიერ ხელახლა მოხდა მთელი მუნიციპალიტეტის აღწერა.
ზუგდიდში თითქმის ყველა უბანზე ერთნაირი მდგომარეობაა. მაგალითისთვის გეტყვით. #1 საარჩევნო უბანში, რომელიც ჭადრაკის სასახლეშია, სიაში შეყვანილია 1711 ამომრჩეველი, აქედან 647 ადამიანი მიწერილია, 13 გარდაცვლილია, 72 კი საზღვარგარეთ იმყოფება.
#2 საარჩევნო უბანში, რომელიც აღმაშენებლის #87-ში მდებარეობს, 1256 ამომრჩეველია. 105 ადამიანი მიწერილია, 53 საზღვარგარეთ მყოფია, თითქმის ყველა უბანზე ანალოგიური მდგომარეობაა.
#27 საარჩევნო უბანი, რომელიც ენგურქაღალდკომბინატის დასახლებაშია, 1563 ამომრჩეველიდან, 127არ არსებობს. 498 მიწერილია, 20 გარდაცვლილია.
_ როდის გადაეგზავნება თქვენი მონაცემები ცენტრალურ საარჩევნო კომისიას?
_ ეს მონაცემები გადაიგზავნა ჩვენს ცენტრალურ ოფისში, სადაც მათი დამუშავება მიმდინარეობს. შემდეგ წარედგინება ცენტრალურ საარჩევნო კომისიას. ყოველგვარი პირობების გარეშე სიები უნდა გასწორდეს.
_ დარწმუნებული ხართ, რომ თქვენ მიერ წარდგენილ სიებს ცენტრალური საარჩევნო კომისია გაასწორებს?
_ აუცილებლად. ჩვენ ყველაფერი უნდა ვიღონოთ იმისთვის, რომ ეს სიები გასწორდეს. თუ ეს სიები არ გასწორდა, ამ სიებიდან გამომდინარე, არჩევნების გაყალბების დიდი შანსი არსებობს.
_ ფიქრობთ, ამ სიებით ხელისუფლება არჩევნების გაყალბებას ეცდება?
_ ბუნებრივია. ის რესურსი რაც ხელისფლებას გააჩნია, არის არჩევნების გაყალბება. ერთის მხრივ, ხელისუფლება არის მოსურნე და ყველანაირად ცდილობს არჩევნები გაყალბდეს, მეორეს მხრივ კი ცდილობს, ეს გაყალბების პროცედურა როგორმე შენიღბოს.
_ სიებთან დაკავშირებით თუ გქონდათ საუბარი საერთაშორისო დამკვირვებლებთან, დიპლომატიურ კორპუსთან და არასამთავრობო ორგანიზაციებთან?
_ ჩვენ არაერთ საერთაშორისო ორგანიზაციას ვხვდებით. შეხვედრა გვქონდა ჩეხეთის ელჩთან, ამერიკის ელჩის მთავარ მრჩეველთან, საერთაშორისო რესპუბლიკური ინსტიტუტის “აირაის” წარმომადგენლებთან. სისტემატიური ურთიერთობა გვაქვს ყველა უცხოელ დამკვირვებელთან, ვინც კი სამეგრელოში ჩამოდის და გვეხმარება თავისუფალი და დემოკრატიული არჩევნების ჩატარებაში.
