წყაროს მტკიცებით, ისინი სასჯელაღსრულების ადგილებიდან ვადაზე ადრე გამოუშვეს. “გურია ნიუსი” მუშაობს ამ თემაზე და დაზუსტებულ ინფორმაციას მალე შემოგთავაზებთ.
რაც შეეხება წითელ ფერებში გადაწყვეტილ კითხვარს სლოგანით _ “მეტი სარგებელი ხალხს”, ქობულეთის თითქმის ყველა მცხოვრებს მიუტანეს შესავსებად.
კითხვა, 1000-ლარიანი ვაუჩერისა და მისი გამოყენების ფორმების შესახებ გასაგებია, მაგრამ ყველაზე საინტერესო ამ კითხვარის მე-5 კითხვაა: “დაუჭერთ თუ არა მხარს ერთიანი ნაციონალური მოძრაობის მიერ წარდგენილ მაჟორიტარ კანდიდატს გელა ცხომელიძეს?”
სავარაუდო პასუხები ასეთია: 1. კი; 2. არა; არ ვიცი/ჯერ არ გადამიწყვეტია; 3. არ მსმენია/არ ვიცნობ ამ კანდიდატს; 4. უარი პასუხზე.
“ნაციონალურ მოძრაობას” მაჟორიტარობის კანდიდატები ჯერ არ დაუსახელებია. იმის გარკვევად, რას ნიშნავს ქობულეთელებისთვის კითხვარის მე-5 კითხვად მონიშნული “ნაცმოძრაობის” კანდიდატი, “გურია ნიუსი” თავად დასახელებულ კანდიდატს დაუკავშირდა.
გელა ცხომელიძე ამჟამად ქობულეთის გამგებელია და მისი შესაძლო მაჟორიტარობაზე “გურია ნიუსი” ჯერ კიდევ ორი თვის წინ წერდა. მაშინ, გელა ცხომელიძემ ეს ინფორმაცია უარყო.
_ ბატონო გელა, “გურია ნიუსიდან” გაწუხებთ, როგორ ბრძანდებით?
_ “ნიჩივო”, არა გვიშავს.
_ ერთი ძალიან კონკრეტული კითხვა გვაქვს თქვენთან: გადაწყვეტილია, რომ “ნაციონალური მოძრაობის” კანდიდატი ქობულეთში თქვენ იქნებით?
_ მაგი როგორაა გადაწყვეტილი? რომ გამოაცხადებენ, გადაწყვეტილი იქნება მერე. წესი ასეა, რომ იცოდეთ.
_ წესები კი ვიცით ბატონო გელა, მაგრამ იმ ბლანკში, რომელსაც ქობულეთის მოსახლეობას ნაცმოძრაობის აქტივისტები ავსებინებენ, ყოველგვარი ვარაუდის გარეშე წერია: “დაუჭერთ თუ არა მხარს ერთიანი ნაციონალური მოძრაობის” კანდიდატს ქობულეთში, გელა ცხომელიძეს?” ეს რას ნიშნავს?
_ ეგ არაფერსაც არ ნიშნავს. ჯობია დაველოდოთ, რა მოხდება. თქვენც დაელოდეთ და მეც დაველოდები. შეიძლება, უბრალოდ რეიტინგს იკვლევენ და მეტი არაფერი.
_ რატომ სხვის რეიტინგს არ იკვლევენ?
_ ახლა ხალხთან მაქვს შეხვედრა, არ მცალია და ცოტა მოგვიანებით დავილაპარაკოთ.
“გურია ნიუსი” ამ ბლანკების წარმომავლობისა და მასში უკვე გაცხადებული მაჟორიტარი კანდიდატების ამბის გასარკვევად რეგიონული პოლიტიკის თვითმმართველობისა და მაღალმთიანი რეგიონების კომიტეტის თავმჯდომარეს ვახტანგ ბალავაძეს დაუკავშირდა.
_ ბატონო ვახტანგ, უკვე გადაწყვეტილი აქვს “ნაცმოძრაობას”, ვის დაასახელებენ მაჟორიტარ კანდიდატებად რაიონებში?
_ მაჟორიტარი კანდიდატების შესახებ გავაკეთებთ ოფიციალურ განცხადებას მაშინ, როდესაც გამოცხადდება წინასაარჩევნო კამპანია.
_ ქობულეთში, ბლანკებზე, რომელსაც “ნაცმოძრაობის” აქტივისტები ატარებენ, უკვე დაფიქსირებულია ნაცმოძრაობის მიერ წარდგენილ კანდიდატად ქობულეთის ამჟამინდელი გამგებელი, გელა ცხომელიძე.
_ მე არ ვიცი, თქვენ რომელ ბლანკზე საუბრობთ.
_ თქვენ ბრძანდებით რეგიონული პოლიტიკის თვითმმართველობისა და მაღალმთიანი რეგიონების კომიტეტის თავმჯდომარე, “ნაცმოძრაობის” წევრი და ამ გამოკითხვის შესახებ არაფერი გსმენიათ?
_ კომიტეტის თავმჯდომარე კი ვარ, მაგრამ არ ვიცი, ათასი გამოკითხვა ტარდება რეგიონებში, ხან ვინ ატარებს და ხან _ ვინ.
_ ამ ბლანკს უკანა მხარეს დასმული აქვს ციფრი _ “5”, ასევე, თქვენი სლოგანი _ “მეტი სარგებელი ხალხს”. მოკლედ ყველა იმ სიმბოლიკას აკმაყოფილებს, რაც ნაცმოძრაობას აქვს.
_ შეიძლება ჩვენიც იყოს, არ ვიცი…
_ და რადგან გელა ცხომელიძის შესახებ მოსახლეობის აზრი გაინტერესებთ, გამოდის, გადაწყვეტილია მისი კანდიდატობის ამბავი.
_ პირდაპირ მკითხეთ, რაც გაინტერესებთ.
_ პირდაპირ გეკითხებით _ ამჟამინდელი გამგებელი, გელა ცხომელიძე თქვენი მაჟორიტარობის კანდიდატია ქობულეთში?
_ არა. რაღაც მსჯელობა კი იყო, მაგრამ გადაწყვეტილი არაფერია ჯერ… ყველაფერს გაიგებთ ოფიციალურად.
წითელ ფერებში გადაწყვეტილი ნაცმოძრაობის სლოგანიანი კითხვარი ქობულეთის მოსახლეობის დიდ ნაწილში უკვე ჩამოტარებულია, კითხვარით გაცხადებულ მაჟორიტარობის კანდიდატს კი წინასაარჩევნო კამპანია დაწყებული აქვს…
