ორგანიზაცია მიმართავს საქართველოს პრეზიდენტს, გააუქმოს საგარეო საქმეთა მინისტრის 11 ივლისის ბრძანება, რომელიც მათი მოსაზრებით, ერთგვარი სადამსჯელო ღონისძიებაა საქართველოს დიასპორების მიმართ. საგარეო საქმეთა მინისტრის ბრძანებით, არჩევნებში მონაწილეობის მისაღებად ქართველი ემიგრანტები ვალდებულები არიან, საკონსულოს წარუდგინონ ცნობა საცხოვრებელი ადგილის შესახებ.
დოკუმენტის წარუდგენლობა იწვევს საკონსულო რეგისტრაციაზე უარის თქმას და შესაბამისად, არჩევნებში მონაწილეობის შესაძლებლობის დაკარგვას.
„კანონი განმარტავს, რომ საქართველოს მოქალაქის მიერ ადგილსამყოფელ ქვეყანაში სამართლებრივად ყოფნის უფლების დამადასტურებელი დოკუმენტის წარუდგენლობა არ შეიძლება გახდეს საკონსულო აღრიცხვაზე უარის თქმის საფუძველი. ხოლო თავად საქართველოს საარჩევნო კოდექსი მიუთითებს, რომ უცხოეთში მყოფ საქართველოს მოქალაქეებს აქვთ საქართველოს არჩევნებში მონაწილეობის მიღების შესაძლებლობა, თუკი მოქალაქეები დგანან ან არ დგანან საკონსულო აღრიცხვაზე და არჩევნების დღემდე არაუგვიანეს 21–ე დღისა, რეგისტრაციას გაივლიან სხვა სახელმწიფოში შექმნილ საუბნო საარჩევნო კომისიაში ან საკონსულო დაწესებულებაში. მინისტრის ბრძანება ორივე ზემოხსენებულ კანონს არღვევს” – აცხადებს ”ახლაგაზრდა ადვოკატების”წარმომადგენელი არჩილ კაიკაციშვილი.
11 ივლისის ბრძანება, გარდა იმისა რომ ანტიკონსტიტუციურია, ქმნის უცხოეთში მცხოვრები საქართველოს მოქალაქეების დეპორტაციის საფრთხესაც, _ აცხადებენ “ახალგაზრდა ადვოკატები”
“ეს საკანონმდებლო ცვლილება ეკონომიკური სიდუხჭირის გამო, უცხოეთში გადახვეწილ თანამემამულეებს იურიდიულ საფუძველს აცლის ცხოვრობდნენ და საქმიანობდნენ საზღვარგარეთ, ამით მათ პირდაპირ ენიჭებათ არალეგალის სტატუსი, რაც ქმნის მათი სამშობლოში დეპორტაციის საფუძველს,“ _ აცხადებს არჩილ კაიკაციშვილი „გურია ნიუსთან“ საუბარში
საგარეო საქმეთა მინისტრის ბრძანება უცხოეთში მყოფ საქართველოს მოქალაქეებს მოქალაქაეობის დაკარგვის აშკარა საფრთხესაც უქმნის, რადგანაც „საქართველოს მოქალაქეობის შესახებ“ კანონის თანახმად, პირი დაკარგავს საქართველოს მოქალაქეობას, თუ მუდმივად ცხოვრობს საზღვარგარეთ და არასაპატიო მიზეზით არ დადგა საკონსულო აღრიცხვაზე ორი წლის განმავლობაში.
”ეს საფრთხე რეალურია, რადგანაც არსებობს ქვეყნები, რომელთა კანონმდებლობაც საერთოდ არ ითვალისწინებს ე.წ ცნობას საცხოვრებელი ადგილიდან. ამიტომაც, მინისტრის ბრძანებით, ამ ცვლილებამ შესაძლებელია ასეთ ქვეყნებში მცხოვრები საქართველოს მოქალაქეები მოქალაქეობის დაკარგვის წინაშე დააყენოს”-აცხადებენ, _”ახალგაზრდა ადვოკატები”
