გაფრთხილებული ვყავარ ახლობელს, რომელიც ხელისუფლებასთან დაახლოებული პირია, რომ ვიყო ფრთხილად, თორემ შეიძლება, რაიმე “გამიჩალიჩონ”. მე სიგარეტი ცხოვრებაში არ მაქვს მონაწევი, წამალს მე არ ვიკეთებ, განზრახ რაიმეს თუ ჩამიდებენ ჯიბეში, არ ვიცი. ყველგან, სადაც უნდა ვიყო, მანქანას ვკეტავ, რომ რაიმე არ ჩამიდონ. ეს არის ერთი კვირის ამბავი. იმიტომ მოვედი დღეს აქ, მაინტერესებდა ქალბატონ ლიასთან შეხვედრა. მე ჩემს უბანში ავტორიტეტით ვსარგებლობ, ამას არ ვტრაბახობ. ამათი ნდობა შეიძლება? მადლობა უფალს, რომ ჩემი ხორცი და სული ვერ დაამონეს,” _ ასეთ განცხადებას აკეთებს ერთ-ერთი პრობაციონელი “გურია ნიუსთან საუბრისას, რომლის სახელსა და გვარს მისივე უსაფრთხოებიდან გამომდინარე არ ვასახელებთ.
კოალიცია “ქართული ოცნების” ოზურგეთის შტაბში უფლებადამცველი, ადვოკატი ლია მუხაშავრია პრობაციონერებს და პატიმრების ოჯახების წევრებს შეხვდა.
ლია მუხაშავრია: “დღევანდელი შეხვედრის მიზანია, გაირკვეს, საარჩევნო კამპანიის პროცესში, არის თუ არა მოსალოდნელი პრობაციონერების მიმართ, ხელისუფლებამ გაატაროს რაიმე ღონისძიება. ადამიანები, რომლებიც მხარს უჭერენ “ქართული ოცნების” საარჩევნო კამპანიას, მათთვის ეს საკითხი ძალზედ მტკივნეულია. რა პოლიტიკა გატარდება ხელისუფლების მხრიდან მათ მიმართ. მიდის ბჭობა იმაზე, ვინ არის უკანონო პატიმარი. 25 ათასი პატიმარი რომ არის საქართველოში, ეს არის პირდაპირი მიზეზი იმისა, რომ შეიცვალოს პოლიტიკა და ხელისუფლებამ გამოაცხადოს ნულოვანი ტოლერანტობა. ეს ხალხი არის პოლიტიკის შედეგად გამხდარი პატიმარი. ჩვენ ყველას ვუთხარით, რომ თუ თითოეულ პრობაციონერზე იქნება ზეწოლა ხელისუფლებისა და პოლიციის მხრიდან. მათ, პირველ რიგში, უნდა გაასაჯაროონ ეს ფაქტები. ეს არის ყველაზე დიდი გარანტია მათი უსაფრთხოებისა.
