ლანჩხუთის პოლიციის სამმართველოს ყოფილმა თანამშრომელმა თენგიზ თარგამაძემ, რომელიც პოლიტიკური ნიშნით გაათავისუფლეს სამსახურიდან, “გურია ნიუსს” ამ თემასთან დაკავშირებით საკუთარი ვერსია შესთავაზა.
თარგამაძე ჯერ კიდევ ერთი თვის წინ აცხადებდა, რომ “პოლიციის სისტემის რეფორმირება, რომლითაც ასე ამაყობს პრეზიდენტი სააკაშვილი, მხოლოდ მინისფასადიანი შენობის აგებით შემოიფარგლა. სინამდვილეში ამ სისტემაში არანაირი რეფორმა არ მომხდარა _ კვლავაც კომუნისტების დროინდელ მეთოდებს იყენებენ, ოღონდ უფრო სასტიკი ფორმებით”, _ მიიჩნევს ყოფილი პოლიციელი.
თარგამაძე გამორიცხავს რიგითი პოლიციელის პირად ინიციატივას ასეთი საქმეების კეთების დროს და მიიჩნევს რომ ურატაძეც და ბენდელიანიც თავისის საქმის კარგი შემსრულებლები არიან, მაგრამ სისტემაა ისე აწყობილი, რომ პოლიციელი იძულებულია პოლიტიკური დაკვეთები შეასრულოს: “ამ ფაქტთან დაკავშირებით ვერაფერს ვიტყვი, რადგან ჩემთვის უცნობია, როგორ მოხდა ჩიპი არასამთავრობო ორგანიზაციებთან. კონკრეტულ პოლიციელებზე არაფრის თქმა არ შემიძლია, გარდა იმისა, რომ ისინიც ჩვეულებრივი ადამიანები არიან. ელდარ ბენდელიანი კარგი პიროვნებაა. ხალხს არ სჯერა ამის, მაგრამ იგი ნამდვილად პატიოსანი ადამიანია. ყველაფრის თავი და თავი უსამართლო სახელმწიფო სტრუქტურებია, რომელიც ადამიანს უკანონო საქმის კეთებას აიძულებს.
მე უკვე დიდი ხანია ვლაპარაკობ იმაზე, რომ ჩვენზე ზემოდან ზეწოლა ხორციელდებოდა. როცა სისტემაა ასეთი, რიგითი ადამიანი უძლურია ამას ებრძოლოს. ან ჩემსავით ქუჩაში აღმოჩნდება, ან უარესს უზამენ _ გაანადგურებენ”.
_ თქვენი აზრით, ამ ფაქტთან დაკავშირებით ვის დასჯიან? მხოლოდ რიგით პოლიციელებს შეაწმენდენ ხელს თუ მაღალჩინოსნებსაც დაატყდებათ მინისტრის რისხვა?
_ ვფიქრობ, რომ ზემოთ მყოფებს არაფერი დაემუქრებათ. ვგულისხმობ პოლიციის სამხარეო ან რაიონული სამმართველოების უფროსებს. ისინი კვლავაც გააგრძელებენ უკანონო საქმიანობას. მათ მხოლოდ მაშინ იშორებენ თავიდან, როცა რომელიმე სამთავრობო მაღალჩინოსნის ინტერესებს გადაკვეთენ. ალბათ, ისევ რიგით პოლიციელებს დასჯიან. თუმცა, ჯერ უნდა გაირკვეს რა მოხდა რეალურად.
_ თქვენ ცდილობ, გვერდი აუაროთ თემას, რომელიც ამ საქმეში ყველაზე აქტუალურია _ პოლიტიკურ დავალებებს, რომელსაც პოლიციელები იღებენ, თუმცა, დაუფარავად საუბრობთ სხვა უკანონო ქმედებებზე…
_ იმიტომ ვიკავებ თავს, რომ ჯერ არაფერი არ არის გარკვეული. როცა გამოიძიებენ ამ საქმეს, მერე შემეძლება გამოვთქვა აზრი. პოლიციის მხრიდან გახორციელებულ უკანონო ქმედებებზე დიდი ხანია ვლაპარაკობ. ამას მაშინაც ვაპროტესტებდი, როცა ამ სისტემაში ვმუშაობდი. მაგალითად, ოპერატიული ინფორმაციის გარეშე, პირდაპირ ქუჩიდან ხდებოდა ხალხის აყვანა და წყალწმინდის ნარკოლოგიურ ცენტრში გადაყვანა. ამაზე მაშინაც ვლაპარაკობდი. გადაამოწმონ ნარკოლოგიური ცენტრის ჟურნალში ბოლო ერთი წლის მონაცემები და ნახავენ, რამდენი ლანჩხუთელია უკანონოდ გადაყვანილი და შემდეგ გამართლებული.
_ თქვენ ხართ ოპოზიციური პარტიის მხარდამჭერი. მუდმივად საუბრობთ იმაზე, რომ პოლიციის ინტერესის ობიექტი ხართ. ხომ არ უშვებთ იმის შესაძლებლობას, რომ ჩემს მანქანაში, რომელიც თქვენს სახლთან დგას, პოლიციამ მისთვის საინტერესო რამ “აღმოაჩინოს”?
_ ამ სისტემაში იმდენ უკანონობას და უმსგავსობას აქვს ადგილი, არაფერს გამოვრიცხავ. არც იმას, რომ ჟურნალისტი “გააფუჭონ”, არც იმას, რომ მეც ჩამიდონ რაიმე, მიუხედავად იმისა, რომ არანაირი კანონსაწინააღმდეგო ნივთი ან ნივთიერება სახლში არ მაქვს. ახლაც მითვალთვალებენ. დღეში რამდენიმეჯერ ურტყამს წრეს ჩემს სახლს პოლიციის მანქანა.
_ მომავალ არჩევნებზე ხელისუფლების მხრიდან რას ელოდებით?
_ ზეწოლის გარდა, არაფერს. ამ ხელისუფლებას არანაირი შანსი არ აქვს, გარდა იმისა, რომ არჩევნები ჩაშალოს. არჩევნებამდე ცოტა ხნით ადრე არეულობის ინსცენირებას მოაწყობენ და არჩევნებს გააუქმებენ. მხოლოდ ამით თუ შეძლებენ ხელისუფლებაში დარჩენას.
