სამინისტროს პრესსამსახური ავრცელებს განცხადებას, რომeლსაც უცვლელად გთავაზობთ:
“საქართველოს სპორტის და ახალგაზრდობის საქმეთა სამინისტრო აცხადებს, რომ პოლიტიკური კოალიცია “ქართული ოცნების” და ძიუდოისტ ბეთქილ შუკვანის მიერ დღეს წამოყენებული ბრალდებები უსაფუძვლოა.
საქართველოს სპორტის და ახალგაზრდობის საქმეთა სამინისტროს დელეგაციის წევრები ლონდონის ოლიმპიადაზე საპატიო სტუმრების სტატუსით იმყოფებიან და მსაჯების გადაწყვეტილების გაპროტესტების არანაირი უფლება არ აქვთ.
სპორტის და ახალგაზრდობის სამინისტრო წუხს ლონდონის ოლიმპიადაზე ძიუდოისტ ბეთქილ შუკვანის წარუმატებელი გამოსვლის გამო და აცხადებს, რომ სახელმწიფომ მაქსიმალურად შეუწყო ხელი ოლიმპიადაში მონაწილე ყველა სპორტსმენს წარმატებული ასპარეზობისთვის.
რაც შეეხება პოლიტიკური კოალიცია “ქართული ოცნების” და ძიუდოისტ ბეთქილ შუკვანის მიერ დღეს წამოყენებულ ბრალდებებს, სპორტის და ახალგაზრდობის საქმეთა სამინისტრო კიდევ ერთხელ მოუწოდებს სპორტსმენებს, რომ გამიჯნონ სპორტი და აქტიური პოლიტიკური მოღვაწეობა და საკუთარ სპორტულ წარმატებებს თუ წარუმატებლობას ნუ გამოიყენებენ იაფფასიანი პოლიტიკური ქულების დასაგროვებლად.”
ძიუდოისტმა ბეთქილ შუკვანმა სპორტისა და ახალგაზრდობის მინისტრი ლადო ვარძელაშვილი და ასევე გია უდესიანი მასზე განხორციელებულ სიტყვიერ შეურაცხყოფაში დაადანაშაულა, სპორტსმენის თმით, მას შემდეგ, რაც უდესიანმა მისი პოლიტიკური შეხედულების შესახებ გაიგო, სასტუმროში მიუვარდა 10 თანმხლებ პირთან ერთად და გარეთ გასვლას აიძულებდა. შუკვანის თქმით, მან სასტუმროს ფანჯრიდან გადახტომით უშველა თავს და ლონდონში მცხოვრები მეგობრის დახმარებით ჩამოაღწია საქართველოში.
დღეს სპორტისა და ახალგაზრდობის მინისტრმა ვარძელაშვილმა ერთ-ერთ მედიასაშუალებასთან კომენტარში განაცხადა, რომ შუკვანმა გერმანიაში ერთ-ერთი ტურნირის დროს მაღაზიიდან ნივთები მოიპარა, მაგრამ მაშინ სამინისტრომ ქურდობის ფაქტი დამალა.
