“ნაციონალური მოძრაობის” პრესსპიკერმა ლია კილაძემ განაცხადა, რომ ამ დღეებში, მედიასაშუალებებით, ,,ქართულმა ოცნებამ“ გაავრცელა რამდენიმე მცდარი ინფორმაცია იმის თაობაზე, თითქოსდა “ნაციონალური მოძრაობა” სოფელ ნატანებში “ქართული ოცნების” სახელით, ასევე პატიმრების გათავისუფლებასთან დაკავშირებით, ხელმოწერებს აგროვებდა.
მისივე თქმით, ზემოაღნიშნულთან დაკავშირებით, “ერთიანი ნაციონალური მოძრაობის” ოზურგეთის ორგანიზაცია უფლებამოსილია განაცხადოს, რომ საქმე გვაქვს “ნაციონალური მოძრაობის” დისკრედიტაციის მიზანმიმართულ მცდელობასთან.
_ მიგვაჩნია, რომ მედიასაშუალებებით გავრცელებული ინფორმაცია ვითომდა ,,ქართული ოცნების” სახელით ,,ნაციონალური მოძრაობის” მხარდამჭერთა ხელმოწერების შეგროვების თაობაზე, სხვა არაფერია, თუ არა ოპოზიციური პარტიების შიდა დაპირისპირება, რომელიც საბოლოოდ ,,ნაციონალური მოძრაობის” წინააღმდეგ სცადეს გამოეყენებინათ, რაც სცდება როგორც ეთიკის, ისე კანონის ფარგლებს.
ქალბატონი მზია ბოლქვაძე დასაქმებულია აიპ-ში, სოფელ გაღმა-დვაბზუს ბაღში აღმზრდელად. იგი არასდროს ყოფილა “ნაციონალური მოძრაობის” არათუ აქტივისტი, არამედ მხარდამჭერიც კი. და როგორც ირკვევა, აგროვებდა ხელმოწერებს პოლიტიკური გაერთიანება ,,გამარჯვებული საქართველოსთვის” (მინდია გულუას პარტია), რათა ამ პარტიას მონაწილეობა მიეღო საპარლამენტო არჩევნებში და დარეგისტრირებულიყო კვალიფიციურ საარჩევნო სუბიექტად. _ თქვა ლია კილაძემ.
ლია კილაძე ასევე ამბობს, რომმ შეშფოთებას იწვევს ,,ქართული ოცნების” აქტივისტის, ვინმე ბატონ ტიტე ბაქანიძის საქციელი, რომელმაც პოლიტიკური დივიდენდების მოპოვებისათვის, მუქარითა და დაშინებით (მზია ბოლქვაძე ადასტურებს როგორც წერილობით, ისე ერთ-ერთი მედიასაშუალების მიერ გაკეთებულ აუდიო- ჩანაწერში, რომ ის ტიროდა, მასზე ახორცილებდნენ ფსიქოლოგიურ ზეწოლას, ემუქრებოდნენ დაჭერით, სამსახურიდან გაგდებით და სიტყვასიტყვით უკარნახეს ის ტექსტი, რაც შემდგომში მისი სახელით გავრცელდა), აიძულა ქალბატონი მზია დაეწერა ე.წ. აღიარებითი ხელწერილი. უფრო სამარცხვინოა ის ფაქტი, რომ შემდგომში ,,ქართულმა ოცნებამ” და მისმა მაჟორიტარი დეპუტატობის კანდიდატმა ზვიად კვაჭანტირაძემ, სრულიად დაუსაბუთებლად ხელი შეუწყვეს ყალბი ინფორმაციის გავრცელებას, თითქოს ზემოაღნიშნული ხელმოწერები “ნაციონალური მოძრაობის” სასარგებლოდ გროვდებოდა. თუმცა, ჩვენი ინფორმაციით, კოალიციის ადგილობრივმა ლიდერებმა კარგად იცოდნენ (ამას ადასტურებს მზია ბოლქვაძის მეუღლეც, რომელმაც პირადად ჩააყენა საქმის კურსში ისინი), რომ ,,ნაციონალურ მოძრაობასთან’’ ამ შემთხვევას არავითარი კავშირი არ ჰქონდა.
_ რაც შეეხება ე.წ. პატიმრების თემას. კიდევ ერთხელ განვმარტავთ, რომ პატიმრების ვადამდე გათავისუფლება ეს არის კანონით მკაცრად რეგლამენტირებული პროცედურა, რომლის საფუძველზეც მხოლოდ საქართველოს პრეზიდენტი და პარლამენტია უფლებამოსილი გამოსცენ შესაბამისი სამართლებრივი აქტი. “ნაციონალურ მოძრაობას” კი, ისევე როგორც სხვა პოლიტიკურ ძალას, არ გააჩნია შესაბამისი ბერკეტები. გარდა ამისა, ,,ქართული ოცნების” მიერ გავრცელებულ განცხადებაში დასახელებული ნატანებელი პიროვნება – ხათუნა გოგუაძე _ არა თუ პარტიაში, არამედ ,,ნაციონალური მოძრაობის” მხარდამჭერებშიც კი არ არის.
კოალიციას ,,ქართული ოცნება” და მის აქტივისტებს შევახსენებთ, რომ მუქარა და ზეწოლის გზით ინფორმაციის მოპოვება სისხლის სამართლებრივი დანაშაულია. მსგავს ქმედებებზე ,,ერთიანი ნაციონალური მოძრაობა” უფლებას იტოვებს მიმართოს პროკურატურას. ასევე მოვუწოდებთ მათ მეტი პასუხისმგებლობა და კვალიფიციურობა გამოიჩინონ მსგავსი ტიპის განცხადებების ტირაჟირებისას, _ განაცხადა ლია კილაძემ.
