რამდენი ხანია, განცხადებას ვწერ, ვწერ და იმხელა ქულები მომდიოდა, მე თვითონ მეშინოდა, გამესაჩივრებინა. შემთხვევით მოვიდა მანქანა, შემთხვევით მოვხდი ამ რაღაცაში… _ ლანჩხუთის მუნიციპალიტეტის სოფელ აცანაში მცხოვრები მედიკო კბილიანაშვილი ასეთი გაოცებული თავისი სოციალური დახმარების შესახებ საუბრობს. იგი ლანჩხუთის მუნიციპალიტეტის სოფელ აცანაში მცხოვრები კახა ჩხაიძის მეუღლეა, რომელიც პოლიციელ ურატაძის “ყურადღების არეში” მოექცა და მის მეხსიერების ბარათზე 200 ლარით დასახმარებელთა სიაში “პრობლემატური პირების” სახელწოდებით მოხვდა.
“ხუთი-ექვსი წელია, სოციალურ დახმარებას ვითხოვ, ამდენი წლის განმავლობაში ისეთი მაღალი ქულები მომდიოდა, რომ არც მიფიქრია გასაჩივრებაზე _ 96 000 ქულა რომ მოგივა, რა აზრი აქვს გასაჩივრებას?! ახლა რის საფუძველზე მომიწია ეგ დახმარება, ნამდვილად არ ვიცი და ვერც იმას ვხდები, 96 000-დან 56 000-მდე როგორ ჩამომიწიეს ეს ქულები? საიდან ჩამოვიდა? ჩემი ოჯახი რაცხაა, ქი ხედავთ აგერ”.
ერთი თვის წინ ჩხაიძე-კბილიანაშვილის ოჯახმა 3 დახმარება ერთდროულად მიიღო: სოციალური მომსახურების სააგენტოსა და ადგილობრივი ბიზნესმენის დახმარებას, პოლისიც მოჰყვა.
“გურია ნიუსის” ინფორმაციით, კახა ჩხაიძისა და მედიკო კბილიანაშვილის ოჯახი, ოპოზიციურად განწყობილებს შორის ითვლებოდა. კახა ჩხაიძეს ჯანმრთელობის მხრივ, სერიოზული პრობლემები ჰქონდა და ის დახმარებას წლების განმავლობაში ითხოვდა.
კახა ჩხაიძე ფოთში, სამხედრო ნაწილში მუშაობდა და იქედან მძიმე ავადმყოფობის გამო წამოვიდა. როგორც მისი მეუღლე “გურია ნიუსთან” აცხადებს, ფაქტობრივად, მას მუშაობა აღარ შეუძლია და ხელჯოხით დადის.
“მე ვფიქრობ, იმიტომ მოგვიწია დახმარება, რომ სოფელში ხმა გავარდა, რა გაჭირვებულებიც ვიყავით, წამლის ფულიც აღარ გვქონდა, ჩემს დედამთილს და მამამთილს წინასწარ გამოჰქონდათ პენსია, რომ წამალი ეყიდათ. “
48 წლის კახა ჩხაიძე და მისი ბიძაშვილი, შარშან დასაქმებულები იყვნენ, ოღონდ ცოტა ხნით სეზონურად ხეებს წამლავდნენ, მაგრამ ძალიან მალე ამ საქმეს ჩამოაცილეს. მიუხედავად იმისა, რომ მათ არაერთხელ მიმართეს სოფლის რწმუნებულს მინდია ქინქლაძეს, თუმცა მისგან პასუხი არ მიუღიათ.
მედიკო კბილიანაშვილი: “დაახლოებით სამი თვის წინ, ჩემი დედამთილი ჩასული იყო ლანჩხუთის მუნიციპალიტეტის გამგეობაში და არც კი მიიღეს. უთხრეს, მიღება დამთავრებულია და დრო არ გვაქვსო. გია გოგუაძემ უთხრა ეს. იმის მერე, აღარც მისულა ჩემი დედამთილი. აღარ შეგვეძლო ამდენი კარდაკარ სიარული, დავიღალეთ. ერთადერთი ძროხა გვყავდა სახლში და ისიც გავყიდეთ, რომ ბანკის ვალები დაგვეფარა. იმდენ პროცენტზეა ასული ჩემი და ჩემი შვილის ვალი, აგი რომ ავადმყოფმა გაიგოს, ინფარქტი დაარტყამს. ათი დღის სამყოფი წამალი, რომელიც ჩოხატაურიდან დამაქვს, 200 ლარი ღირს”.
მიუხედავად იმისა, რომ ოჯახმა დახმარებისთვის არაერთგზის მიმართა სოფლის რწმუნებულს და ლანჩხუთის მუნიციპალიტეტის გამგებელს, მათი მდგომარეობა უცვლელი დარჩა, თუმცა, დაახლოებით ერთი თვის წინ, ის ერთდროულად გაახსენდა სოციალური მომსახურების სააგენტოსაც და სოფლის ცნობილ ბიზნესმენს ზაზა ჩხაიძესაც.
მედიკო კბილიანაშვილის განცხადებით, სოციალურ დახმარებას, როგორც მას უთხრეს აგვისტოს თვეში მიიღებს. სოციალურ აგენტებს მათთან, გამგებლის მოადგილე თამაზ ჩხაიძე მიჰყვა. სწორედ ამის შემდეგ გადაწყდა მათთვის სოციალური დახმარების გამოყოფა.
200 ლარის ღირებულების, 10 დღის სამყოფი წამალი, დახმარების სახით, ბიზნესმენ ზაზა ჩხაიძისგან ოჯახმა უკვე მიიღო. ცხელ ხაზზე დარეკვით პოლისიც გამოუყვეს.
_ იმ დონეზე გვიჭირდა, რომ, აგერ “ალბატროსის” გენერალური დირექტორია ზაზა ჩხაიძე და იმან გამოგვიგზავნა 200 ლარი, დათო ჩხაიძის ხელით, _ განაცხადა მედიკო კბილიანაშვილმა ჩვენთან საუბრისას.
წარმოშობით აცანელი ბიზნესმენი ზაზა ჩხაიძე და მისი ოჯახის წევრები, ასევე პოლიციელ ურატაძის “ჩიპზე” არიან აღრიცხული. ამავე “ჩიპზე” დატანილ მოხსენებით ბარათში ზუსტად ეს თანხა – ორასი ლარია ნახსენები.
“გურია ნიუსის” კითხვაზე, _ იყო თუ არა ზაზა ჩხაიძე ამ ოჯახის ნათესავი ან მეგობარი, მედიკო კბილიანაშვილმა განაცხადა: “არაფერი არაა, მოგვარეა და უბრალოდ სოფლელი. გეიგო, რომ ცუდად იყო და გამოუგზავნა ფული, წამალი იყიდე ჩოხატაურშიო, ბიზნესმენია და დაგვეხმარა 200 ლარით.”
საგულისხმოა ერთი დეტალი _ ქალბატონმა მედიკომ საუბრის დასაწყისში განაცხადა, რომ ბიზნესმენთან მის ოჯახს არანაირი ახლო ურთიერთობა არ ჰქონდა. “გურია ნიუსთან” საუბრის ბოლოს კი თქვა, რომ მისი მეუღლე და ზაზა ჩხაიძე ბავშვობის მეგობრები იყვნენ.
“გურია ნიუსის” ინფორმაციით, აცანელი ბიზნესმენი ზაზა ჩხაიძე კომპანია “ალბატროსის” გენერალური დირექტორია.
კომპანიის ოფიციალურ ვებ-გვერდზე ვკითხულობთ: “ალბატროსი ლიდერია მეტალოპლასტმასის კარ-ფანჯრების წარმოებაში და მისი პროდუქცია საუკეთესოა საქართველოს ბაზარზე”.
გარდა “ალბატროსისა”, აცანელი ბიზნესმენი არაერთ უძრავ ქონებას ფლობს. მათ შორის, სოფელ დიღომში, ნატანებში 2000 კვ.მ არასასოფლო-სამეურენო ნაკვეთს, ასევე სასოფლო-სამეურნეო მიწის ნაკვეთს დიღმის სასწავლო-საცდელ მეურნეობაში. მშობლიურ სოფელში მან ე.წ. ტელმანის უბანში ეკლესია ააშენა.
რაც შეეხება კახა ჩხაიძისა და მედიკო კბილიანაშვილის ოჯახს, ბიზნესმენის ნაჩუქარი 10 დღის წამლის ფული უკვე გახარჯული აქვთ, მეორე დახმარებას სოციალური მომსახურების სააგენტოდან, ამ თვეში ელიან, მანამდე კი ქალბატონი მედიკო ყველა იმ შეხვედრაზე აპირებს მისვლას, რომელსაც სოფელში პარტიები გამართავენ. აინტერესებს, სამომავლოდ ვინ რას დაპირდება.
ჩხაიძეების სახლი
ზაზა ჩხაიძის მიერ აგებული ეკლესია
