“ნუ გვაწვებით”, _ ასეთია ოზურგეთის მუნიციპალიტეტის გამგეობის პრესსამსახურის პასუხი, რომელიც საჯარო ინფორმაციის მოთხოვნას “წყლის ნაყვას” უწოდებს. ინფორმაცია კი მკაცრად გასაიდუმლოებულია.
ამ “წყლის ნაყვაში” რუსთაველის ქუჩის მცხოვრებლები წყალმა წაიღო.
“ძალიან გთხოვთ, მობრძანდით, გადაიღეთ, დააფიქსირეთ ჩვენი გასაჭირი, რა დღეში ვართ. დღითი დღე უარესდება ჩვენი მდგომარეობა. წუხელ მთელი ღამე გავათენეთ, როგორც გარეთ, ისე წვიმს სახლში; გაგვინადგურდა ყველაფერი, კაცი პატრონი არაა, გააგებინეთ სააკაშვილს ჩვენი ამბავი!” _ გვითხრეს რუსთაველის ქუჩაზე მდებარე მშენებარე ბინის მცხოვრებლებმა.
5 აგვისტოს, დილის 9 საათზე, “გურია ნიუსის” ოზურგეთის განყოფილებას რუსთაველის ქუჩაზე მდებარე საცხოვრებელი ბინის მცხოვრებლებმა დახმარებისთვის მიმართეს.
_ მარტოხელა პენსიონერი, სოციალურად დაუცველი და ინვალიდი ვარ, ჯოხებზე დაყრდნობილი საშინლად ვწვალობ; აი, ნახეთ რა დღეშია ჩემი ბინა, ჩემი მშობლების ნაშენები! რა უნდათ, ვინ უთხრა, რა უფლება აქვთ ჩვენს ნაპატრონებ ბინას რომ გვინგრევენ?! უარესობისკენ მიდის ყველაფერი, ყველაფერი გაფუჭდა, გასწორებულია ჩემი ბინა მიწასთან! აქ ისეთი მდგომარეობა იყო წუხელ… რაც არ უნდა უთხრა მუშებს და მის ხელმძღვანელს, აზრი არ აქვს _ ყურადღებას არავინ არ გვაქცევს! არ ვაპატიებთ არავითარ შემთხვევაში, სააკაშვილამდე მივალ. ამის მეტი პასუხისმგებლობა არ უნდა ჰქონდეთ? ეს ასე უნდა დატოვონ? შიშით ძლივს გავათენე, მეგონა თავზე დამენგრა ყველაფერი, ისეთი ხმა ჰქონდა წვიმას, თავზე დამექცა,-თქო, ვიფიქრე… კედელი გასკდა. ვის მივმართო მითხარით, ვის უთხრათ? ვინაა გამკითხავი? გვეუბნებიან, გავაკეთებთო და ასე აკეთებენ?! ადამიანებს ასე უპატივცემულოდ უნდა მოექცნენ? _ აცხადებს “გურია ნიუსთან” ლუიზა ქორიძე, _ მე, მარტოხელა პენსიონერი შევძლებ მე ამის გაკეთებას? გაგვიკეთონ თავიდან ყველაფერი, ისე, როგორც იყო, თუ ყურადღებას არ მომაქცევენ, სააკაშვილთან პირადად მივალ.
ეთერ მამულაიშვილი, რუსთაველის ქუჩის მეექვსე ნომრის მე-19 ბინის მცხოვრები: ” ხომ ხედავთ თქვენც?! ფაქტი სახეზეა რას ჰგავს ყველაფერი; რემონტი ახალჩატარებული მქონდა, მოსპო და გამინადგურა, დამიზიანა ყველაფერი, ასე როგორ შეიძლება? ძალიან ცუდი მდგომარეობაა. აქ პასუხისმგებელ პირს ვერ ნახავ, რომ პასუხი მოსთხოვო, აგდებულად გელაპარაკებიან, წადი და სასამართლოში იჩივლეო, ან მუშებს არა პასუხი უნდა მოვთხოვო? ახლა ვაცლით თუ იქნება რეაგირება, თორემ მერე მთელი ბინის მცხოვრებლები რას გავაკეთებთ, პასუხს აღარ ვაგებთ ჩვენს საქციელზე! მერამდენე შემთხვევაა უკვე… ასე როგორ უნდა აგვიგდონ? ჯერ შიგნით ნახეთ, სადარბაზოში რა მდგომარეობაა, ერთი გააკეთო და მეორე გააფუჭო ეს ახალი წესია? მოსახლეობის საზიანოდ უნდა გააკეთონ თუ პირიქით -სასარგებლოდ? ოთახებში სულ დაზიანებულია კედლები… ჯერ ერთი და ბინას სახურავი რომ შეუცვალეს, შეცვალეს ძველებური კარგი ხარისხის სიფრიფანა, თხელი მასალით… და ამას ეძახიან გაკეთებულს მაგენი?!! ის ძველი რომ გადაეხურათ, უფრო დიდხანს გაძლებდა, ვიდრე ახალია. რა ვქნათ აღარ ვიცით, ვის მივმართოთ? სამჯერ დავუძახე, ვინც მუშებს თავზე ადგას, მშენებელ-ინჟინერს, მაგრამ არაფერი _ ყურადღებას არავინ გვაქცევს. ერთი თვის წინ კი გახსოვთ, რომ მეორე ბინაში ოჯახში მიცვალებული ჰყავდათ და თავზე აწვიმდათ! ეს იყო საქმე?!!!”
რუთაველის ქუჩა, #3. საქმის მწარმოებელი ობიექტს აკვირდება
მეხუთე სართულზე ასასვლელი კიბე
მარტოხელა პენსიონერის ლუიზა ქორიძე სასოწარკვეთით შეჰყურებს
მის ბინაში შექმნილ მდგომარეობას
ლუიზა ქორიძის ბინის ჭერი
ლუიზა ქორიძე ბინაში ჩამოსულ წვიმას ტაშტებით იგერიებს
