ეზოს ჭიშკრების წინ ჩამწკრივებული პატარები ველოსიპედზე შემომჯდარი პრეზიდენტისკენ მხიარულად იშვერდნენ თითს და მშობლებს გარეთ უხმობდნენ. უფროსები ამ სანახაობის საყურებლად არ გამოსულან და მათთვის სასურველი ხალხმრავალი კადრების აღება ვერც ნაციონალურმა ტელეარხებმა მოახერხეს…
“გურია ნიუსის” ინფორმაციით, ამ სიმცირის გამო, მიხეილ სააკაშვილმა ლევან ვარშალომიძეს უსაყვედურა, მაგრამ შედეგს მაინც ვერ მიაღწია. ქობულეთის მშენებარე პარკის დასათვალიერებლად ჩამოსულ სააკაშვილთან, ერთი ქობულეთელიც კი არ მისულა არც თხოვნით და არც წერილით…
სწორედ ასეთი პრინციპული დამოკიდებულების გამო არ წყალობდა ქობულეთს ასლან აბაშიძეც. ავტორიტეტებს, ლიდერებსა და მმართველებს, რომლებიც მოსახლეობის აზრს არ ითვალისწინებენ, არც ქობულეთელები წყალობენ.
“ისეთი, რომელიც არავის აზრს არ ითვალისწინებს და რა ხასიათზეც დადგება, ისე იღებს გადაწყვეტილებებს, გვყავს აგერ, ქვეყნის სათავეში. ჩვენ ბიძინა ივანიშვილის სახელი და გვარი კი არ მოგვწონს, მისი გაკეთებული საქმე გვაინტერესებს. დაგვისახელოს ივანიშვილმა ერთი ისეთი ადამიანი, ვინც ჩამოვიდა ქობულეთში და მოსახლეობაში გამოკითხვა ჩაატარა მაჟორიტარი კანდიდატების შესახებ…”
“რომ გვეუბნება, ქიბარ ხალვაშის დაო, ქიბარ ხალვაში ვინ არის საერთოდ? რა გაუკეთებია ქობულეთისთვის, როცა ბიზნესმენი იყო? 2 კაცთან ერთად მაინც მჯდარა სუფრასთან ქობულეთში? ხმა მაშინ ამოიღო, როცა მის ბიზნესსაც მიწვდნენ, თორემ მანამდე მშვენივრად ავსებდა მის მეგობრებთან ერთად მიშას “კასას”, – ამბობენ ჩვენი რესპონდენტები.
ბიძინა ივანიშვილის გადაწყვეტილებით ქობულეთელების საკმაოდ დიდი ნაწილი უკმაყოფილოა და მას ხალხის აზრის უგულვებელყოფაში ადანაშაულებენ.
ფატი ხალვაშს, რომლის მთავარ ბეგრაუნდად ბიძინა ივანიშვილმა ქიბარ ხალვაშის დობა დაასახელა, ქობულეთში, 6 წელია, აღარ უცხოვრია. მოსახლეობის დიდმა ნაწილმა მის შესახებ არაფერი იცის. ისინი თვლიან, რომ “ბიძინასთან ამბის მიმტანი ერთი-ორი კაცი მთელი ქობულეთის ბედს არ უნდა წყვეტდეს”.
რაც შეეხება ქიბარ ხალვაშის ფაქტორს, ქობულეთელებს კარგად ახსოვთ, რომ ერთადერთი, რაც ბიზნესმენმა გააკეთა, საკუთარი სოფლის გზა იყო.
“გურია ნიუსთან” ინტერვიუში (რომელიც სამი კვირის თავზე, მას შემდეგ შედგა, რაც “ქართული ოცნების” ქობულეთის ოფისში მივაკითხეთ), ქალბატონი ფატი ამბობს, რომ ხალვაში გზის დაგების გარდა, მის ძმას საქართველოს მასშტაბით, 5 500 ადამიანი ჰყავდა დასაქმებული და ქობულეთელებს იმითაც ეხმარებოდა, რომ საქონელს ნისიად უტოვებდა.
ფატი ხალვაში: “იყო მაღაზიები, ვისაც ეხმარებოდა, ხელს უწყობდა, თუ თანხები არ ჰქონდა, ნისიადაც აძლევდა… ვისაც უნდა დაინახავს, ვისაც არა და… საერთოდ, ყველა მედალს 2 მხარე აქვს…
ქიბარს, ქობულეთის რაიონიდან ძალიან ბევრი ჰყავდა დასაქმებული და თბილისშიც კი ჰყავდა მძღოლებად წაყვანილი…”
როგორც “გურია ნიუსისთვის” ხდება ცნობილი, ფატი ხალვაშის მაჟორიტარად დასახელება, ყველაზე მეტად “ნაციონალურ მოძრაობას” გაუხარდა, რომელსაც თავისი კანდიდატის, გელა ცხომელიძის გამარჯვებაში ეჭვიც აღარ ეპარება. ცხომელიძის ავტორიტეტს ქობულეთში, არც თავად ფატი ხალვაში უარყოფს.
“ქართული პარტია” რომ გვდომებოდა, სოზარის შუამავლობა რად გვინდოდა ბიძინასთან?”
ფატი ხალვაშის მთავარ ლობისტად, სოზარ სუბარი სახელდება. ამაზე რამდენიმე ადგილობრივი წყარო ლაპარაკობს. სოზარ სუბართან და მისი ყოფილი პარტიის წევრებთან ახლო ურთიერთობას არც ფატი ხალვაში უარყოფს.
ფატი ხალვაში: “მე ძალიან ახლო ურთიერთობა მაქვს სუბართან, ეს ჯერ კიდევ თბილისიდან და მიტინგებიდან, ჩვენ ოჯახებით ვიცნობთ ერთმანეთს. სხვათაშორის, პოლიტიკურ სპექტრში მე ძალიან ბევრს ვიცნობ, კოალიციაშიც და კოალიციის გარეთაც, ბევრი მეგობარი მყავს და გული მტკივა, რომ ისეთი კარგი პოლიტიკოსები არიან კოალიციის გარეთ, როგორიცაა: სოფო ხორგუანი, მანანა ნაჭყებია, თეო ტლაშაძე, კახა კუკავა… ძალიან კარგი მეგობრები მყავს…”
გურია ნიუსის კითხვაზე, _ ვინ იყო ის მეგობარი, რომელმაც თქვენი თავი ბატონ ბიძინას წარუდგინა და დაარწმუნა იმაში, რომ საუკეთესო კანდიდატი იყავით ქობულეთისთვის?, _ ფატი ხალვაშის პასუხი ასეთია:
_ დამიჯერებთ, რომ გითხრათ, არ ვიცი?
“გურია ნიუსის” ინფორმაციით, სწორედ სოზარ სუბარის ირაკლი ოქრუაშვილთან და ქიბარ ხალვაშთან მეგობრობამ გადაწყვიტა ქობულეთის “ქართული ოცნების” მაჟორიტარის ბედი, რაზედაც ქობულეთელების დიდ ნაწილს თავისი განსხვავებული აზრი აქვს.
“ქართული პარტია”, ეროსი კიწმარიშვილი, ირაკლი ოქრუაშვილი და ქიბარ ხალვაში რომ გვდომებოდა, ამისთვის ბიძინა ივანიშვილის გამოჩენა სულ არ იყო საჭირო. ან სოზარის შუამავლობა რაში გვჭირდებოდა ბიძინასთან? იქნებ, მიაწვდინოთ ხმა ბიძინა ივანიშვილს და ჰკითხოთ, რატომ არ ჩაგვთვალა ქობულეთელები, აზრის კითხვის ღირსად?”, _ აინტერესებთ ქობულეთელებს, რომლებსაც დიდი ხანია პარლამენტში მათთვის მოსაწონი მაჟორიტარი აღარ ღირსებიათ.
მათ, პირადად ფატი ხალვაშის მიმართ პრეტენზია არ აქვთ, მაგრამ აქვთ აბსოლუტურად ლეგიტიმური კითხვა ბიძინა ივანიშვილთან, _ რატომ არ დაინტერესდა ის ქობულეთელების აზრით?
იმის გასარკვევად, როგორ ხდება რაიონებში მაჟორიტარების შერჩევა და ჩატარდა თუ არა პრაიმერი ქობულეთში, “გურია ნიუსი” მაია ფანჯიკიძეს დაუკავშირდა.
_ თამუნა, ბევრჯერ განმარტა ბატონმა ბიძინამ და ძალიან გთხოვთ, მოძებნეთ მისი ნათქვამი და დაეყრდენით მას, რა.
_ ქალბატონო მაია, ბატონი ბიძინა არაერთ განცხადებას აკეთებს და ზოგჯერ დღეში რამდენიმესაც. თუ იცით, იქნებ შემახსენოთ, მე არ მახსოვს…
_ მათი წარსულის, მათი პროფესიონალიზმის, მათი რეპუტაციის მათი იმ კონკრეტულ რეგიონებში კონტაქტების მიხედვით.
_ მოსახლეობის აზრის გამოკითხვა არ ხდება?
_ ზოგადად ხდება, კი.
_ ქობულეთის რაიონში ჩატარდა პრაიმერი?
_ როგორც გითხარით, ზოგიერთ რაიონში ეს მოხდა, ეხლა ქობულეთში მოხდა თუ არა, ზუსტად არ ვიცი.
_ ხშირად ხდება ისე, როცა კონკრეტულ კანდიდატს კოალიციიდან ჰყავს ლობისტი, რომელსაც ისე გააქვს ეს კანდიდატურა პოლიტსაბჭოზე, რომ საერთოდ არაფერ შუაშია არც მოსახლეობის აზრი, არც ამ კადრის წარსული და არც მისი მოღვაწეობა?
_ არა. რას ნიშნავს ეს შეკითხვა, მე არ მესმის! ვიღაცა ვიღაცას უწევს რეკომენდაციას, ვიღაცა ვიღაცას არ უწევს რეკომენდაციას. ეს არის ჩვეულებრივი პროცესი, ეს არის შიდა სამზარეულო. ამ საკითხზე, მეტი არაფერია სათქმელი და სწორია თუ არასწორია ჩვენი ეს არჩევანი, გამოჩნდება არჩევნებზე”.
შედეგი რომ არჩევნების შემდეგ გამოჩნდება, ეს ის მარტივი ჭეშმარიტებაა, რაზეც ახსნა-განმარტება “ქართული ოცნების” პრესსპიკერისგან ნამდვილად არ გვჭირდება მედიის წარმომადგენლებს, მაგრამ ალბათ არავითარ ახსნა-განმარტებას არ ექვემდებარება ის ფაქტი, როცა ქობულეთის მაჟორიტარი კანდიდატისთვის დასასმელ კითხვებზე პასუხის გაცემას ბათუმის მაჟორიტარობის კანდიდატი, მურმან დუმბაძე გვთავაზობს…
“მურმან დუმბაძე: “შეკითხვები მე დამისვით, თუ მასთან დაკავშირებით რამე გაინტერესებთ!”
სამკვირიანი სატელეფონო ზარების შემდეგ, “ქართული ოცნების” ქობულეთის მაჟორიტარობის კანდიდატთან ინტერვიუს ჩაწერა “გურია ნიუსმა” მას შემდეგ შეძლო, რაც ფატი ხალვაშს ქობულეთის “ქართული ოცნების” ოფისში მივაკითხეთ. იქაურობას, სოზარ სუბარი და გუგული მაღრაძე სტუმრობდა.
ჩვენი გაჭირვების შესახებ, რომ 3 კვირაზე მეტია, რაც “ქართული ოცნების” მაჟორიტარის ჩაწერას ვერ ვახერხებდით, სოზარ სუბარს შევჩივლეთ, რაზედაც მისგან (არ ვიცით, იხუმრა თუ სერიოზულად გვიპასუხა ავტ.) ასეთი პასუხი მივიღეთ, _ არ იცით, რომ ეგ ჩემზეა დამოკიდებული?
ალბათ, არც იხუმრა, რადგან ფატი ხალვაშთან ინტერვიუს ჩაწერა სწორედ ამ დღეს მოვახერხეთ.
გაცილებით საინტერესო ამბავი კი მანამდე ხდებოდა…
არაერთი მცდელობის შემდეგ, როცა ხალვაშის ტელეფონზე ხან მისი შვილი პასუხობდა და ხან _ მეუღლე, “გურია ნიუსი” დამატებითი საკონტაქტო საშუალების გაგებას მურმან დუმბაძისგან შეეცადა. ქობულეთის ოფისში, ქობულეთელებისთვის ნაკლებად ცნობილი მაჟორიტარობის კანდიდატი სწორედ მან წარადგინა.
საუბრის ბოლოს, “გურია ნიუსის” თხოვნაზე, _ ვერ ვუკავშირდებით ქალბატონ ფატის და ძალიან გვაინტერესებს მისი პოზიცია, იქნებ დაგვეხმაროთ მასთან დაკავშირებაში, _ მურმან დუმბაძემ გვითხრა:
_ მე გიპასუხებთ. შეგიძლიათ რაღაც შეკითხვები მე დამისვათ, თუ მასთან დაკავშირებით რამე გაინტერესებთ…
_ ჩვენ მისგან გვაინტერესებს პასუხები…
_ მე შევეცდები, როგორმე დაგაკავშიროთ. ვეტყვი, რომ ორივე ტელეფონი ატაროს.
“გურია ნიუსის” ინფორმაციით, ქობულეთის რაიონში პრაიმერის არჩატარება, სწორედ მურმან დუმბაძის გადაწყვეტილება იყო. აბსოლუტურად დაზუსტებული ინფორმაციით კი, საკუთარ სოფელში, ხალაში, “ქართული ოცნების” მაჟორიტარობის კანდიდატთან შეხვედრაზე დაახლოებით 20 ადამიანი იმყოფებოდა. ამ ინფორმაციას არც ფატი ხალვაში უარყოფს.
ვრცელ ინტერვიუს ფატი ხალვაშთან და ასევე დეტალებს, თუ რა ხდება “ქართული ოცნების” ქობულეთის ოფისში, “გურია ნიუსი” მალე შემოგთავაზებთ.
