5 ნივთი, რომელიც ყველა ოჯახში მოიძებნება

სასწორი

სასწორს, რომელიც ერთ-ერთი უძველესი ხელსაწყოა, მრავალი დატვირთვა აქვს – როგორც პრაქტიკული, ისე ალეგორიული. ერთ-ერთი პირველი სურათი, რაც გონებაში სასწორზე ამოგვიტივტივდება, სამართლიანობის სიმბოლო – თემიდას ქანდაკებაა, რომელსაც ხელში ძველებური, პინებიანი სასწორი უჭირავს. ეს ქანდაკაება და შესაბამისად სასწორიც, მსოფლიოს თითქმის ყველა სასამართლოს შენობაზეა გამოსახული. ჩვენს სახლებში სასწორს ძირითადად საკუთარი თავის ასაწონად ვიყენებთ და დროთა განმავლობაში, მექანიკური სასწორი ელექტრონულმა სასწორებმა ჩაანაცვლეს, რადგან ელექტროსასწორს ბევრად აკურატულად შეუძლია წონის გაზომვა და ამასთანავე, უფრო გამძლეც არის. უნდა აღინიშნოს, რომ სასწორი, როგორც საყოფაცხოვრებო ნივთი სამზარეულოშიც ხშირად გამოიყენება და კულინარიაში კარგ სამზარეულოს სასწორს მნიშვნელოვანი დატვირთვა აქვს. კერძის მომზადებისას, განსაკუთრებით კი ცხობისას ძალიან მნიშვნელოვანია ინგრედიენტების ზუსტი, აკურატული თანაფარდობა, წინააღმდეგ შემთხვევაში შეიძლება კერძი საერთოდ არ გამოვიდეს ისეთი, როგორც გსურდა. ამის გათვალისწინებით, ნებისმიერი გამოცდილი კულინარის რჩევაა: შეარჩიე სასწორი, რომელიც აკურატულია და გამძლე. ეს უკანასკნელი მნიშვნელოვანია იმიტომ, რომ დროთა განმავლობაში, საჭმლის კეთბისას წარმოქმნილი ორთქლისგან, დაყრილი ნამცეცებისგან და ა.შ, შეიძლება სასწორმა დაკარგოს ვარგისიანობა და არასწორი მონაცემები აჩვენოს.

სანათი

სახლში მშვიდი და მყუდრო ატმოსფეროს შექმნა თბილი განათების გარეშე წარმოუდგენელია. ხშირ შემთხვევაში, სწორედ სანათი და მისი მკრთალი ყვითელი განათებაა ხოლმე ის, რაც ოჯახურ იდილიასა და ჰარმონიას ქმნის. სანათების ფორმა და დიზაინი მრავალნაირია – თანამედროვე, ტრადიციული, ბოჰემური, ვინტაჟური. როგორც სამაგიდო და იატაკზე დასადგამი, ისე კედელზე დასამაგრებელი. ზოგი მეტად პრაქტიკულია – საკითხავად თუ სამუშაოდ განკუთვნილი, ზოგი მათგანი კი დეკორატიული – მისაღებისა თუ საძინებლის ინტერიერს შეხამებული. ნებისმიერ შემთხვევაში, სანათი სახლის განუყოფელი ნაწილია. ძილის წინ კომფორტულად მოკალათებული, სწორედ სანათია ის ნივთი, რომელიც საყვარელი წიგნის გვერდებს გვინათებს, რომანტიკული ვახშამიც მხოლოდ სანათის თბილი განათების ქვეშ წარმოგვიდგენია და აგარაკის ეზოს მყუდრო გარემოც, სადაც საღამოობით მეგობრებთან ერთად ვიკრიბებით. სანათის განუყრელი და მნიშვნელოვანი ნაწილია ნათურაც, რომელიც ასევე დიდი გულდასმით უნდა შევარჩიოთ – პირველ რიგში, ყურადღება უნდა მივაქციოთ ხარისხსს, რომ დიდ ხანს გაგვიძლოს. მნიშვნელოვანია ნათურის ფერი და სიმკვეთრეც, რომელიც ზუსტად უნდა შეესაბამებოდეს ჩვენი სახლის ინტერიერსა და განწყობას.

უთო

უთოს ჯერ კიდევ ძველი წელთაღრიცხვით მე-4 საუკუნეში იყენებდენ ძველი ბერძნები. არც არის გასაკვირი, მას შემდეგ, რაც ადამიანმა ტანისამოსის შექმნა დაიწყო, მუდმივად ჰქონდა იმის სურვილიც, ეს ტანისამოსი სუფთა და მოწესრიგებული ყოფილიყო. ცხადია, საუკუნეების წინ უთო სულ სხვა სახით გამოიყურებოდა – წარმოადგენდა მეტალის ხელსაწყოს, რომელიც გაცხელების შემდეგ ტანსაცმლისა თუ სხვა ქსოვილის ნაკეცებს ასწორებდა. ნელ-ნელა გამოგონება განვითარდა და გაცხელების მაგივრად, უთოს შიგნით ნაკვერჩხლებს ათავსებდნენ. პირველი ელექტრონული უთო მე-19 საუკუნის მიწურულს გამოჩდა. დღესდღეისობით უთოს ბევრნაირი ვერსია არსებობს – მათ შორის ორთქლის უთო, რომელიც იდეალური საშუალებაა ნებისმიერი სამოსისთვის. ორთქლის უთოს აქტიურად იყენებენ კინოსა და სერიალების გადაღებებზეც, სადაც საჭიროების შემთხვევაში, ადგილზევე, მაქსიმალურად მცირე დროში ახერხებენ მსახიობების კოსტიუმების მოწესრიგებას. გარდა ტანსაცმლისა, არსებობს თმის უთოებიც, რომლებიც არა მხოლოდ სალონებში გამოიყენება პროფესიონალი სტილისტების მიერ, ბევრ ადამიანს სახლშიც აქვს – თანამედროვე, დახვეწილი თმის უთოები უსაფრთხოდ და მარტივად ასწორებენ ან ახვევენ თმას და ყოველდღიურად გვეხმარებიან თავის მოწესრიგებაში.

მაცივარი

მიუხედავად იმისა, რომ ეს ნივთი ადამიანების ცხოვრებაში საკმაოდ გვიან, 1920-იანი წლებიდან შემოვიდა, დღესდღეისობით, რთულია ისეთი სახლის წარმოდგენა, რომლის სამზარეულოშიც მაცივარს არ გადააწყდებით. ცოტამ თუ იცის ის ფაქტიც, რომ ინდუსტრიულად გამოსაყენებელი მაცივრის შექმნაზე ალბერტ აინშტაინიც მუშაობდა. მაცივრის შეძენა საკმაოდ რთული და საპასუხისმგებლო მოვლენაა. როდესაც მაცივრის არჩევას ეხება საქმე, ბევრი დეტალის გათვალისწინებაა საჭირო – წინასწარ უნდა იცოდეთ ის ზომა, რომელიც ზუსტად თავსდება თქვენს სამზარეულოში. შეამოწმოთ აკმაყოფილებს თუ არა ყველა იმ მოთხოვნას, რაც სრუყლყოფილი ფუნქციონირებისთვისაა საჭირო. მაცივარი, და ზოგადად სამზარეულო, სახლის განუყოველი, ყველაზე ფუნქციური და მუდმივად სიცოცხლით სავსე ნაწილია. ბევრ რამეს მეტყველებს მაცივრის შიგთავსი იმ ადამიანებზე, რომლებიც ამ მაცივარში ყოველდღიურად იხედებიან. ზოგისთვის მაცივარი უბრალოდ პროდუქტების შესანახი საშუალებაა, ბევრისთვის კი ის საკუთარი გამორჩეული სტილისა და გემოვნების ნიმუშია, ინტერიერის დიზაინის განუყოფელი და თვალსაჩინო ნაწილი. ცხადია, მაცივარი როგორც ფუნქციურად, ისე დეკორატიულადაც მნიშვნელოვან როლს ასრულებს ნებისმიერ ოჯახში  – ხშირად, სწორედ მაცივარია ის ნივთი, რომელზეც სამახსოვრო დეკორატიული მაგნიტები, ნახატები, წერილები თუ ფოტოსურათები გროვდება ხოლმე.

სარეცხის მანქანა

რთულია იმ პერიოდის წარმოდგენა, როდესაც ადამიანებს სარეცხის მანქანის გარეშე უწევდათ ცხოვრება. ამ ნივთის გამოგონება ალბათ ერთ-ერთი ყველაზე გადამტეხი და საჭირო მოვლენა იყო თანამედროვე ტექნოლოგიის განვითარებაში. მექანიკური სარეცხის მანქანების შექმნას ადრეული პერიოდიდანვე ცდილობდნენ ადამიანები, თუმცა ამ მოწყობილობებს მაინც სჭირდებოდა ადამიანის ხელით მართვა. დამოუკიდებელი ელექტრონული სარეცხის მანქანა მსოფლიო ბაზარზე პირველად 1930-იანი წლებიდან გამოჩნდა და მას შემდეგ წლიდან წლამდე სულ უფრო ვითარდებოდა. მოგვიანებით შეიქმნა ჭურჭლის სარეცხის მანქანაც, რომელიც ბევრი ოჯახისთვის და ბიზნესისთვის ძალიან მნიშვნელოვანი ნივთია. როგორც ტანსაცმლის, ისე ჭურჭლის სარეცხი მანქანები ბევრი მიზეზით გვიმარტივებს ცხოვრებას – პირველ რიგში, გვეხმარება დროის დაზოგვაში და ამასთანავე, ბევრად ჰიგიენურად და ხარისხიანად ასრულებს საქმეს. დღეისთვის სარეცხის მანქანის ასობით მოდელი და ბრენდი არსებობს, კომპანიები მუდმივად ცდილობენ კიდევ უფრო მიმზიდველი და პრაქტიკული გახადონ ეს ტექნიკა და თქვენი ყველა სურვილი რეალობად აქციონ.