„გურია ნიუსი“ დილიდანვე დაუკავშირდა სასჯელაღსრულებისა და პრობაციის სამინისტროს.
_ ერთ საათში ჩვენი ოფიციალური განცხადება დაიდება ვებზე და ეს იქნება ჩვენი პასუხი, _ გვითხრა პრესცენტრის თანამშრომელმა.
3 საათიანი ლოდინის შემდეგ, „გურია ნიუსი“ კვლავ დაუკავშირდა სამინისტროს პრესსამსახურს;
_ რა განცხადებას ავრცელებს ომბუცმენი? იქნებ გამომიგზავნოთ რომელ ფაქტებზე საუბრობთ? დარეკეთ ცოტა ხანში, უფრო სწორად, მე გადმოგირეკავთ, _ ასეთი იყო მათი პასუხი.
1 საათის შემდეგ „გურია ნიუსმა“ კვლავ დარეკა სასჯელაღსრულების სამინისტროში.
_ ააა, გავარკვიეთ. იცით, რაშია საქმე, ომბუცმენი ჩვენ არ მოგვმართავს რეკომენდაციით და ვისაც მიმართავს, იქ დარეკეთ და იქ გაარკვიეთ.
_ დარღვევა თქვენს უწყებაში მოხდა და სად გავარკვიოთ?
_ მთავარ პროკურატურას დაუკავშირდით, ომბუცმენმა რეკომენდაციით მას მიმართა.
ფაქტი 1.
ციხის ადმინისტრაციის გადაწყვეტილებით, ტუბერკულიოზით დაავადებული პატიმარი 2 კვირის განმავლობაში ჰყავდათ ჩაკეტილი სარდაფში. პატიმრის მიმართ ჩადენილი არაადამიანური მოპყრობის ფაქტი მისმა ადვოკატმა გაახმაურა.
„2012 წლის 1 აგვისტოს, სახალხო დამცველს განცხადებით მიმართა #8 დაწესებულებაში განთავსებული მსჯავრდებულის ვ.ი.-ს ინტერესების დამცველმა ადვოკატმა. განმცხადებელი აღნიშნავდა, რომ მსჯავრდებული დაავადებულია ტუბერკულოზით და მიუხედავად ამისა, 14 დღის განმავლობაში განთავსებული ჰყავდათ #8 დაწესებულების სარდაფში.
2012 წლის 2 აგვისტოს, სახალხო დამცველის რწმუნებულები შეხვდნენ და გაესაუბრნენ #8 დაწესებულებაში განთავსებულ მსჯავრდებულს ვ.ი.- ს. მისი თქმით, დაახლოებით ორი კვირის წინ, მას შელაპარაკება მოუვიდა თავის თანასაკნელთან, რის გამოც #8 დაწესებულების თანამშრომელმა, დასჯის მიზნით, ორი კვირის განმავლობაში განათავსა ე.წ. ბოქსში, სადაც მსჯავრდებულს არ ჰქონდა არც საწოლი, არც ლეიბი, არც გადასაფარებელი და ეძინა იატაკზე. მსჯავრდებულის გადმოცემით, ამ ხნის მანძილზე იგი ექიმს არ უნახავს,“ _ ნათქვამია სახალხო დამცველის მიერ გავრცელებულ განცხადებაში.
ფაქტი 2
ომბუდსმენის პრევენციისა და მონიტორინგის დეპარტამენტის თანამშრომლები სასჯელაღსრულების დეპარტამენტის #8 დაწესებულებაში განთავსებულ მსჯავრდებულ პ. ბ.-ს შეხვდნენ.
მსჯავრდებულის განმარტებით, 2012 წლის 15 ივლისს, დაწესებულების ერთ–ერთი ოფიცერი იმყოფებოდა შვებულებაში და მას ცვლიდა ოფიცერი ნიკა თოლორდავა. პატიმრის გადმოცემით, 15 ივლისს, დაახლოებით 20:30 საათზე, იგი თავის ორ თანასაკნელთან ერთად საპირფარეშოში ეწეოდა სიგარეტს, რადგან საკანში მოწევა აკრძალულია ადმინისტრაციის მიერ. აღნიშნულის გამო, ოფიცერმა ნიკა თოლორდავამ სიტყვიერი შეურაცხყოფა მიაყენა პატიმრებს, გამოიყვანა ისინი საპირფარეშოდან, დასჯის მიზნით დააყენა ფეხზე ორ მწკრივად და ასეთ მდგომარეობაში ამყოფა დაახლოებით 2 საათი და 30 წუთი.
მსჯავრდებულ პ.ბ.-ს განმარტებით, მეორე დღეს, როდესაც საკანში მყოფი პატიმრები გაჰყავდათ სასეირნოდ ეზოში, ფეხის ტკივილის გამო, იგი მოძრაობდა აჩქარებული ნაბიჯით და არა სირბილით (მსჯავრდებულის თქმით, სეირნობის დროს მსჯავრდებულებს სირბილს აიძულებენ). ამის გამო, ოფიცერმა ნიკა თოლორდავამ მსჯავრდებული პ.ბ. თანასაკნელებთან ერთად დააბრუნა საკანში და კვლავ ფეხზე დგომით დასაჯა, რაც დაახლოებით 2 საათს გრძელდებოდა.
აღნიშნულიდან გამომდინარე, სახალხო დამცველის რწმუნებულები შეხვდნენ და გაესაუბრნენ #8 დაწესებულების D-63 საკანში განთავსებულ პატიმრებს: დ. თ.-ს, გ. მ.-ს და გ. ტ.-ს, რომლებმაც აღნიშნული ფაქტები დაადასტურეს.
