წყაროს თქმით, საავადმყოფო 5-საწოლიანი იქნება, რაც ჩოხატაურელებში აღშფოთებას იწვევს. როგორც მოსახლეობა ამბობს, 5-საწოლიანი საავადმყოფო მუნიციპალიტეტს, რომელშიც, დაახლოებით, 29 000 ადამიანი ცხოვრობს, არ ეყოფა. ამას ის მედიკოსებიც ადასტურებენ, რომლებიც კომპანია “ადითში” მუშაობენ და რომლებიც თვეების განმავლობაში ხელფასს ვერ იღებენ.
ჯანდაცვის სამინისტროდან ამ თემაზე კომენტარის მიღება შეუძლებელი აღმოჩნდა _ სამინისტროს პრესსამსახურში ჩვენს რამდენიმე ზარს არ უპასუხეს.
ჩოხატაურის მუნიციპალიტეტის საკრებულოს თავმჯდომარის, ანტონ ხუნდაძის განმარტებით, ადგილობრივი ხელისუფლების ინიციატივაა, რომ საავადმყოფო 10 საწოლზე გაკეთდეს:
_ თავიდან ითქვა, რომ 5-საწოლიანი იქნებოდა. ამის ოფიციალური დოკუმენტი მე არ მინახავს, ვიცი, რომ სიტყვიერი მოლაპარაკების დონეზე იყო. ჩვენ ვთხოვეთ, რომ გაკეთდეს 10-საწოლიანი, რადგან მომართვიანობა მოიმატებს და 5-საწოლიანი საავადმყოფო არ გვეყოფა.
_ რატომ მოიმატებს მომართვიანობა? უფრო ცუდად გახდება ხალხი?
_ ვერ გამიგეთ. მომართვიანობა მოიმატებს იმიტომ, რომ იქნება კარგი საავადმყოფო, ხალხს მეტი ფული გაუჩნდება, თან სექტემბრიდან პოლისები დარიგდება და ცხოვრება გაუმჯობესდება.
_ ცხოვრების გაუმჯობესების პირობას როგორ გვაძლევთ?
_ ვერ ხედავთ, ირგვლივ რა ხდება? თუ არ გინდათ, დაინახოთ? მთელი საქართველო ხარაჩოებშია და სწორედ ეს ნიშნავს ცხოვრების გაუმჯობესებას.
_ ჩოხატაურში რომ არაფერია ხარაჩოებში?
_ როგორ არ არის?!
_ კონკრეტულად?
_ ხომ გახსოვთ, როგორი გზა იყო და ახლა როგორია? კინოთეატრი კეთდება, კულტურის სახლი შენდება.
_ ჯერ მშენებლობა არ დაწყებულა, ბატონო ანტონ! ჩვენ მხოლოდ მშენებლობის დაწყების შესახებ გვაქვს ინფორმაცია…
_ დაიწყება და ყველაფერი კარგად იქნება. ნუ ხართ ურწმუნო თომა.
_ ჩვენ ფაქტებით გესაუბრებით. თანაც, ხარაჩოები ვერ არჩენს ოჯახებს, ვერ გადაიხდის წამლის ფულს. ეს არ ნიშნავს ცხოვრების გაუმჯობესებას…
_ ახლა შეხვედრაზე ვარ, არ მცალია, მაგრამ მოდით ჩემთან და განახებთ ფაქტებს, სურათებს რა და როგორ კეთდება…
_ შეგიძლიათ ისიც გვითხრათ, ამდენი ხნის განმავლობაში, რაც საკრებულოს თავმჯდომარე ხართ, რამდენი ადამიანი დაასაქმეთ?
_ ახლა გაცილებით მეტია დასაქმებული, ვიდრე რამდენიმე წლის წინ.
_ საჯარო სამსახურს და გაბერილ შტატებს არ ვგულისხმობთ, ბატონო ანტონ. შეგიძლიათ, მინიმუმ, ხუთი ადამიანი დაგვისახელოთ, რომლებიც კერძო საწარმოში დაასაქმეთ?
_ ნუ იცით პროვოკაციული შეკითხვების დასმა. საწარმოებიც გაიხსნება და ხალხიც დასაქმდება. ცხოვრება ბევრად უკეთესი იქნება. მე ასე მჯერა და მწამს. თუ ფაქტები გინდათ, გითხარით, რომ განახებთ.
_ მაშინ დავწერთ, რომ პირობა მომეცით, რომლის თანახმადაც, თქვენ მაჩვენებთ გაკეთებულ ობიექტებს, კერძო სტრუქტურებში დასაქმებულ ადამიანებს და იმ გაკეთებულ საქმეებს, რომლებიც თქვენი საკრებულოს თავმჯდომარეობის განმავლობაში გაკეთდა.
_ აუცილებლად. ბევრ ფოტოებს გაჩვენებთ და თქვენის მხრივ პირობა მომეცით, რომ ამ ყველაფერს გაზეთში აუცილებლად დაბეჭდავთ.
_ აუცილებლად.
ასე რომ, ჩვენო მკითხველო, მომავალ ნომერში საკრებულოს თავმჯდომარის შესრულებული პირობის (თუ, რა თქმა უნდა შეასრულებს და ესეც საარჩევნო დაპირებასავით არ დაავიწყდება) და გაკეთებული საქმეების, დასაქმებული ადამიანების შესახებ სტატიას შემოგთავაზებთ, რომელმაც ანტონ ხუნდაძის თქმის არ იყოს, “ურწმუნო თომები” უნდა დაარწმუნოს, რომ უმუშევარობა მოგონილი პრობლემაა.
