თურქი ბიზნესმენი მემედ კამბური წარმოშობით ლაზია. ის, პირველად, ლანჩხუთში 1996 წელს ჩამოვიდა მეუღლესთან ერთად და როგორც თავად ამბობს, მაშინ ბაყაყების ბიზნესით დაიწყო:
_ მე წარმოშობით ლაზი ვარ. მამაჩემი პატარა იყო, საქართველოდან რომ წავიდა, მე კი გადავწყვიტე აქაურობას დავბრუნდებოდი. თავდაპირველად ბაყაყების ბიზნესით დავიწყე, ეს ბიზნესი ძალიან წარმატებულია ყველგან და მეგონა, ლანჩხუთშიც ასე იქნებოდა, მაგრამ მოვტყუვდი. ეს ძალიან მძიმე შრომასთანაა დაკავშირებული. რაკი ბაყაყების ბიზნესი ჩავარდა, გადავწყვიტე თხილის ბიზნესი დამეწყო.
_ როდის დაინტერესდით სასოფლო-სამეურნეო მიწებით?
_ ლანჩხუთი ჩამორჩენილი რაიონია სოფლის მეურნეობის განვითარების მხრივ, აქ არც ფაბრიკა-ქარხანაა, არც რაიმე სხვა წარმოება. როცა ვფიქრობდი, რომ რისი გაკეთება შეიძლებოდა, ჩემთან მოვიდა რამდენიმე მოქალაქე და მითხრეს, რომ ვერ ამუშავებდნენ საყანე ფართობებს. სიმინდის მოყვანა გადავწყვიტე და თავიდან, სოფელ ჯაპანაში ავიღე 73 ჰექტარი მიწის ფართობი 10-წლიანი იჯარით. როცა დაინახეს, რომ მიწები გავწმინდეთ და დავამუშავეთ, სხვა სოფლების მცხოვრებლებმაც მოისურვეს მათი მიწებიც დაგვემუშავებინა.
_ უშუალოდ მოსახლეობა დაგიკავშირდათ?
_ არა, მაგალითად, ლესაში დაგვიკავშირდა გამგებელი.
_ რა მოლაპარაკება იყო თქვენსა და მოსახლეობას შორის?
_ გავიკითხე რა პირობები იყო და გავიგე, რომ ჰექტარზე 400 კგ. სიმინდს ან 200 ლარს იხდიან. გავიგე ისიც, რომ მარტო ლესაში 60 ჰექტარი ფართობია დაუმუშავებელი. პირადად შევხვდი მოსახლეობას, მათი უმეტესობა ღარიბი და უმწეოა. ამიტომ ასი კილო მოვუმატე გასაცემ სიმინდს, ანუ ჰექტარზე 500 კგ. სიმინდს ვაძლევ, თუ ავადმყოფია, ფულსაც ვუმატებ.
_ გაფორმებული გაქვთ თუ არა ხელშეკრულებები მოსახლეობასთან?
_ კი, გაფორმებული გვაქვს და ფულიც მიცემული გვაქვს.
_ ბატონო მემედ, ჩვენთან საუბრის დროს, რამდენიმე ადამიანმა გამოთქვა პრეტენზია, რომ დღემდე არა გაქვთ ხელშეკრულება გაფორმებული…
_ ჩვენ იმდენი საქმე გვაქვს, შესაძლოა, რამე გამოგვრჩა, თანაც იმათთან, რომლებსაც ნატურით გადახდას შევპირდით, ხელშეკრულებების გაფორმება არ დაგვიმთავრებია. მათ მოსავლის აღების შემდეგ გავუსწორდებით.
_ ანუ ხელშეკრულება ყველასთან გაფორმდება?
_ კი, აუცილებლად, გაფორმდება ყველასთან. აქამდე თუ არაა გაფორმებული, ეს ან ჩვენი მოუცლელობის ბრალია, ან იმის, რომ ნატურით ვისაც უნდა გადავუხადოთ, იმათთან ეტაპობრივად მიმდინარეობს გაფორმება. ისიც მინდა გითხრათ, რომ ავადმყოფებს უფრო მეტ თანხას ვაძლევთ, ვიდრე მოლაპარაკების მიხედვით გვაქვს.
_ რამდენი ჰექტარი გაქვთ მთლიანად ლანჩხუთში აღებული?
_ 273 ჰექტარი გვაქვს აღებული და ვამუშავებთ.
_ რამდენიმე ადამიანმა გამოთქვა ეჭვი, რომ შესაძლოა, წლების შემდეგ, თქვენ ეს მიწები შეისყიდოთ. რამდენად რეალურია ეს ეჭვი?
_ გამორიცხულია. ქართული კანონმდებლობით, საყანე ფართობების უცხო ქვეყნის მოქალაქისთვის მიყიდვა დაუშვებელია.
ჩვენ დავინტერესდით, შეუძლია თუ არა უცხო ქვეყნის მოქალაქეს საყანე ფართობის ყიდვა. საჯარო რეესტრის ოფიციალურ ვებგვერდზე ონლაინრეჟიმში გვიპასუხეს: “სასოფლო-სამეურნეო დანიშნულების მიწაზე უცხოელისა და საზღვარგარეთ რეგისტრირებული იურიდიული პირის საკუთრების უფლების რეგისტრაცია შესაძლებელია მხოლოდ იმ შემთხვევაში, თუ მათ ეს მიწა მიიღეს მემკვიდრეობით, ასევე, თუ უცხოელი ამ მიწას მართლზომიერად ფლობდა, როგორც საქართველოს მოქალაქე. უცხო ქვეყნის მოქალაქე სასოფლო სამეურნეო დანიშნულების მიწის ნაკვეთს სხვა შემთხვევაში, ვერ მიიღებს”.
