პრემიერ-მინისტრი კვლავ შინაგან საქმეთა მინისტრის რეჟიმით ცხოვრობს და მისი პრესსამსახურიც ძველებურად ცდილობს, ვანო მერაბიშვილთან მედიის წარმომადგენლებმა ნაკლებად ან უმჯობესია, სულ არ იკონტაქტონ. მედიის წარმომადგენლებისთვის დახურული აღმოჩნდა ფერმერებთან შეხვედრაც კი…
მხოლოდ სამთავრობო ცვლილებები მოგვასმენინა ექსკლუზიურად ვანო მერაბიშვილმა და შემდეგ გვითხრა, რომ ცალკე სასაუბრო ჰქონდა ფერმერებთან. ეს ე.წ ფერმერები კი რამდენიმე ადამიანის გარდა, სოფლის რწმუნებულები, მისი მოადგილეები და ოზურგეთის მუნიციპალიტეტის საკრებულოს დეპუტატები იყვნენ. როგორც ჩანს, ახლა საჯარო პირებს ფერმერები ჰქვიათ…
ვანო მერაბიშვილი: _ ოზურგეთში მინდა წარვადგინო ახალი მინისტრი და თქვენ პირველები გაიგებთ ამის შესახებ. ყველაზე მეტად, რომელი პრობლემა გაწუხებდათ თქვენ და ყველაზე უფრო, რომელი პრობლემა გაწუხებთ ახლა? მე ვფიქრობ, ასეთი პრობლემა არის დენის პრობლემა, ყველა ჩვენთაგანს ეს პრობლემა აწუხებდა, რამდენიმე წლის წინ, ჩვენ როდესაც დავდიოდით არჩევნებზე, ხალხს ვეკითხებით, რომელი პრობლემა გაწუხებს ძაან და ხალხი გვეუბნებოდა უდენობის პრობლემა გვაწუხებს. დღეს პრაქტიკულად, საქართველოში არავის არ აწუხებს უდენობის პრობლემა და ეს არის დამსახურება ბატონი ხეთაგურის, ამიტომ მე გადავწყვიტე, რომ ერთ-ერთ ყველაზე მნიშვნელოვან თანამდებობაზე, ფინანსთა მინისტრად წარვადგინო ბატონო ალე. ხოლო, მის ნაცვლად მინდა წარვადგინო ჩვენი ახალგაზრდა პარტიული ლიდერი ვახტანგ ბალავაძე და ეს დალაგებული ენერგეტიკის საქმე ჩავაბარო ვახტანგ ბალავაძეს.
მე, ორ დღეში დავბრუნდები თბილისში გურიიდან და დიმა გვინდაძე (ორი დღე მოუწევს დიმა გვინდაძეს ლოდინი სიურპრიზის გამხელამდე. ავტ), რომელმაც ძალიან ბევრი საქმე გააკეთა, მას ჩვენ ძალიან მნიშვნელოვან, კარგ თანამდებობას ვუმზადებთ და ამის პრეზენტაციას თბილისში გავაკეთებ, როდესაც ჩვენ ამ ორ დღეში მოვივლით მთელ გურიას, შევისწავლით გურიის პრობლემებს, _ განაცხადა პრემიერ-მინისტრმა.
მისივე თქმით, ვახტანგ ბალავაძემ ჩაიბარა ძალიან გამართული სისტემა იმიტომ, რომ საქართველოში, პრაქტიკულად, ენერგეტიკის გლობალური პრობლემები მოხსნილია და მომავალ წელს დამთავრდება მთლიანი გამრიცხველიანობა, მაგრამ რჩება ერთი დიდი პრობლემა, რომლის მოგვარებაშიც, ალე ხეთაგური, ასე ვთქვათ, ფინანსურად დაეხმარება, _ ეს არის სტაბილური, მაღალი ხარისხის დენი.
_ იმის გამო, რომ საქართველოში ბოლო წლებში დენი მოხმარება ძალიან გაიზარდა, წარმოუდგენლად სწრაფად გაიზარდა, 50%-ით გაიზარდა. გაიზარდა ძალიან ბევრი მოხმარება, როგორც ქარხნების და ფაბრიკების, ასევე ინდივიდუალური, მხედველობაში მაქვს მე კონდიციონერები, ამის გამო ზაფხულში თქვენ ატყობთ დენის ხარისხი არის გაფუჭებული იმიტომ, რომ ერთდროულად ირთვება ბევრი გენერატორი, ბევრი კონდიციონერი, ამიტომ ჩვენი ამოცანაა რვა თვეში საქართველოში გვქონდეს არამარტო 24 საათიანი მომარაგება, არამედ გვქონდეს ასევე სტაბილურად ხარისხიანი დენი.
და ბოლოს, როგორც “გურია ნიუსს” შეხვედრიდან გამოსულმა რამდენიმე ადამიანმა უთხრა, საუბარი ყოფილა ფერმერების ხელშეწყობაზე და ასევე იქნება შპს, რომელიც ორგანიზებას გაუკეთებს მოპოვებული პროდუქციის გატანას.
