“ჩვენების მიცემის დროს პროკურორმა დიტო ხვიტიამ მითხრა: ” ინფორმაცია მომივიდა. ოღონდ არ მახსოვს ვინ მითხრა. გუშინ შენ აპირებდი ქუჩაში დაწოლას და ამიტომ შეგათრიეს სახლშიო. ქუჩის გადაკეტვა არ შეიძლება და ამიტომ შეგათრიესო. გუშინდელი ამბავი დამაწერინეს. იმედი არაფრის მაქვს. ერთი თვის წინ იგივე გამიკეთეს, დამაწერინეს მაგრამ…” – განაცხადა აბულაძემ
ცინარა აბულაძე, სამეგრელო ზემო სვანეთის სამხარეო პროკურატურაში გუშინ მის მიმართ განხორციელებულ ცემის ფაქტთან დაკავშირებით ჩვენების მისაცემად იყო მისული. აბულაძის განცხადებით იგი ზუგდიდის პოლიციის სამმართლოს უფროსმა ლევან ქირიამ ცემა.
როგორც “გურია ნიუსმა” გაარკვია, ანაკლიაში, სამოქალაქო ფორმაში გადაცმული სამართალდამცავების მიერ აბულაძის ფიზიკური და სიტყვიერ შეურაცხყოფის ფაქტს არაერთი თვითმხილველი ჰყავდა.
ადგილობრივები გაოგნებულები არიან გუშინ მომხდარ ფაქტთან დაკავშირებით. როგორც ჩვენთან საუბრისას ყვებიან, შორტებიანმა და ნახევრად შიშველმა ახლგაზრდებმა, რომლებიც მანქანებიდან გადმოცვივდნენ, მობილური ტელეფონები წაართავეს, შემდეგ კი დაულეწეს…
“გურია ნიუსთან” ერთ-ერთი თვითმხილველი, რომლის ვინაობასაც მისივე უსაფრთხოების გამო არ დავასახელებთ აცხადებს:
“გუშინ მოხდა ის რომ… პრეზიდენტი მოდიოდა თურმე… ამათმა საერთოდ არ იცოდნენ. ცისანა 5 წლის შვილიშვილთან ერთად საკუთარ ჭიშკართან იდგა. უცებ, რამდენიმე მანქანით მოცვივდენ ნახევრადშიშველი შორტებიანი ბიჭები, ყვიროდნენ იგინებოდნენ. კარებთან მოაყენეს მანქანა, აი ქვიშა რომ დააქვს ისეთი და უბრძანეს ეს წარწერა დაფარეთო. (საუბარია ტრაფარეტზე, რომელზეც ცისანა აბულაძეს უწერია: “ვეძებ დაკარგულ შვილს, გოგიტა აბულაძეს. მთავრობა დამუნჯდა. დაყრუვდა. დაბრმავდა. პოლიცია არ მუშაობს. ვეძებ სამართალს. ავტ”) ამათ უყვიროდნენ, ხელს ნუ გვიშლითო. ცინარას ხელი მოკიდეს და სახლში შეათრიეს, აგინებდნენ და შეურაცხყოფას აყენებდნენ. იქ იყო ამათი 23 წლის შვილიშვილი გოგო, რომელსაც ხელი სტაცეს და სახლში მიათრევდნენ, აგინებდნენ… საშინელება იყო. 5 წლის შვილიშვილი შიშისგან კიოდა, ბავშვი კინღამ გაგიჟდა და მასთან დედა არ მიუშვეს.
მეზობლები ყველა იქ იყო და ხედავდა ამ სიგიჟეს. არავის აძლევდნენ მათ სახლში შესვლის უფლებას. ყველას ვინც იქ იყო და ტელეფონები ჰქონდა, წაართვეს.
როგორც კი პრეზიდენტმა გაიარა, ესენი გამუშვეს. მერე ჩაჯდნენ მანქანაში და წავიდნენ. ვისაც ტელეფონი წაართვეს ის ხალხი მანქანას გაეკიდა. ისინი ტელეფონებს ფანჯრიდან ყრიდნენ. თითქმის ყველას ტელეფონი დაიმტვრა.
მთელი ანაკლია ხედავს ამათ საქციელს. უკვე რადენჯერ ცემეს დედა, რომელსაც 1 ფურცლის მიცემა უნდა პრეზიდენტისთვის. დედამ დაკარგა შვილი და ეძებს. რა უნდა ქნას?! იმის მაგივრად რომ დაეხმარონ და მისი შვილი ეძებონ, აქეთ ურტყამენ. ამათმა ვინ უნდა დაიცვან. ესენი არიან პოლიციელები?! სოფელი გაგიჟებულია. დედას, რომელსაც შვილი ჰყავს დაკარგული სახლში მიათრევდნენ, აგინებდნენ. გამწარებული დედა შველას ითხოვდა. ჩვენ კი, მეზობლები, ამ ყველაფერს ვუყურებდით და ვერაფერს ვაკეთებდით… “.
შეგახსენებთ, რომ ცინარა აბულაძის ფაქტთან დაკავშირებით, “გურია ნიუსმა” სწორედ დღეს გამოაქვეყნა სტატია სახელწოდებით: “პრეზიდენტო, თქვენი ყველა ვიზიტის დროს, 70 წლის ქალბატონს უმოწყალოდ ცემენ!”
