დილით ადრე ძლივს მივასწარი სახლამდე, თორემ მიწა ისე უცებ ჩასკდა, წამებში გადავრჩი. გამოცვივდნენ ოჯახის წევრები და ვუყურებდით, როგორ მიჰქონდა ზვავს ჩვენი ეზო. ვერ აგიწერთ რა საშინელებაა, როცა გრძნობ, რომ ფეხქვეშ მიწა გეცლება," _ ამბობს მაყვალა ბაღიშვილი.
"გურია ნიუსი" ოზურგეთის მუნიციპალიტეტის სოფელ თხინვალში მცხოვრები 85 წლის გივი ბაღიშვილის ოჯახის შესახებ ერთი წლის წინ წერდა. თუმცა, როგორც გივი ბაღიშვილი და მისი ოჯახის წევრები "გურია ნიუსთან" საუბარში ამბობენ, მათთვის არანაირი დახმარება ხელისუფლებას დღემდე არ გაუწევია. მათ "გურია ნიუსს" დახმარებისთვის კიდევ ერთხელ მიმართეს: "მოდით, ნახეთ სად ვცხოვრობთ, როგორი საშიშია აქ გაჩერება. მაინცდამაინც კახეთში და სხვა რეგიონში უნდა ვცხოვრობდეთ, რომ პრეზიდენტმა და ხელისუფლებამ დახმარება აღმოგვიჩინოს?" _კითხულობს ქალბატონი მაყვალა ბაღიშვილი.
85 წლის მოხუცი გივი ბაღიშვილი კი აცხადებს, რომ თუ ყურადღებას არ მიაქცევენ და არ დაეხმარებიან, შიმშილობას გამოაცხადებს: "დარწმუნებული ვარ, ამ სიტყვებისთვის დამიბარებენ და მეტყვიან, რატომ ილაპარაკე ასეო. აბა ამის მეტად ადამიანად არ უნდა ჩაგვთვალონ? წავალ. დავჯდები გამგეობის წინ და შიმშილობას გამოვაცხადებ," _ ამბობს 85 წლის მოხუცი.
"საშიში გეოლოგიური პროცესების გავრცელების მიხედვით, გურიის რეგიონში ხუთი განსაკუთრებულად დაძაბული უბანია.
აქედან ოზურგეთში მდებარე სოფლები: თხინვალი, მთისპირი, ასკანა, ფამფალეთი, ეწერი, ბახვი, კონჭკათი, ხრიალეთი, შრომა, ნატანები, ახალსოფელი, ნასაკირალი, მერია, ჯუმათი, სილაური, ძიმითი, ნაღობილევი, ცხემლისხიდი, უკანავა, ჭანიეთი. ლანჩხუთში: ხაჯალია, ნიგვზიანი, ჩოჩხათი, ხორეთი, ჩიბათი, ომფარეთი და მოედანი. ჩოხატაურში: ვანი, სამება, განახლება, გოგოლესუბანი, ფარცხმა, ჭაჭიეთი, ქვენობანი, ხევი, ნაბეღლავი, ქვაბღა, ჩხაკაურა, ზემო და შუა სურები, ზომლეთი.
გურიის რეგიონში, 1980-1998 წლებში, გეოლოგიური პროცესების საშიშროების ზონაშია მოქცეული 3 631 საცხოვრებელი სახლი, ამათგან, 541 სახლი დაკვირვების ქვეშ იმყოფება. უკანასკნელი 30 წლის განმავლობაში გურიაში, საშიში გეოლოგიური პროცესებიდან გამომდინარე, ძალიან დაზიანდა და მთლიანად დაინგრა 800-მდე სახლი. 1999 წლისთვის გამოვლენილია და რეგისტრირებულია 101 მეწყერული ზონა. გეოლოგიურად საშიში უბნების ტერიტორიებიდან გადასახლების რეკომენდაცია მიეცა 54 ოჯახს, მეთვალყურეობა დაუწესდა 22 საცხოვრებელ სახლს. 1999 წელს გააქტიურებულმა მეწყერულმა პროცესებმა სოფლებში: ნატანები, შრომა, თხინვალი, კონჭკათი, ძლიერ დააზიანა და საცხოვრებლად უვარგისი გახადა 50-მდე სახლი", _ ვკითხულობთ ინფორმაციულ ბიულეტენში _ "მიწისქვეშა ჰიდროსფეროს, ეკოლოგიური მდგომარეობის, საშიში გეოლოგიური პროცესების შესწავლის და პიდროპროგნოზირების შესახებ", რომელიც გამოცემულია 2000 წელს საქართველოს გეოლოგიის სახელმწიფო დეპარტამენტის მიერ.
თხინვალი ოზურგეთის მუნიციპალიტეტის ცენტრიდან 16 კილომეტრითაა დაშორებული.
სოფელი, სადაც 295 კომლი ცხოვრობს, მცირემიწიანია, ამასთან ერთად, მეწყერსაშიშ ზონას განეკუთვნება. გეოლოგების დასკვნის თანახმად, აქ მცხოვრებ 14 ოჯახს საცხოვრებელი სახლიდან სასწრაფოდ გამოსახლება ესაჭიროება. ასევე, გეოლოგების დასკვნის თანახმად, ამ სოფელში ცხოვრობენ ოჯახები, რომელთა საცხოვრებლებიც მეორე და მესამე კატეგორიას განეკუთვნებიან და მათი უსაფრთხოება მაღალი რისკის ქვეშ დგას.
"წვიმის დროს შვილიშვილს სახლში არ ვაჩერებთ _ არ ვიცით, როდის დაგვენგრევა სახლი თავზე," _ ამბობს "გურია ნიუსთან" საუბარში გივი ბაღიშვილი, რომლის ოჯახსაც, დანარჩენ 13 ოჯახთან ერთად, სასწრაფოდ საცხოვრებელი სახლის დატოვება ესაჭიროება.
"ასეთ გაუსაძლის პირობებში ვცხოვრობთ, უკვე ათი წელია. მოხუცს ვერ ვტოვებ. სახლში არც კარი იკეტება, არც _ ფანჯარა. მე არავის დახმარება არ მინდოდა, ჩემი ნაშრომი ამ სახლის გაკეთებას შევალიე. არაფერს არ ვითხოვდი, მეწყერს რომ არ წაეღო ნაკვეთი. მიწა ერთხელაც რომ დაიძრას კიდევ, ჩვენს მეზობელსაც ჩაიტანს. წლების განმავლობაში, წინ და უკან დავდივარ. მთელი ჩემი ოჯახი, ყოველთვის მთავრობას ვემსახურებით, არასოდეს ოპოზიციაში არ ჩავდგომივართ. მრავალსულიანი ოჯახი ვართ და ამდენი ხმა მთავრობისთვის მისწრებაა. როცა გიჭირს და მომადგები, ხმა მომეციო, ახლა, მე რითი მეხმარები? აწი მაგათ ვინ მისცემს ხმას და თავს მოატყუებინებს?
მე და ჩემი მეუღლე არ ვმუშაობთ, მარტო მოხუცის პენსიით ვსულდგმულობთ. დახმარება ვითხოვე _ ჩვენი სახსრებით ვერაფერს გავაკეთებთ, ჯერ კიდევ შეიძლება სახლის გამაგრება, ერთი კედელი კი მთლიანად ჩამოინგრა. ან სამშენებლო მასალა მაშოვნინონ, ან რაიმე საშუალება მომაძებნინონ, რომ შევაჩერო სახლის ნგრევა", _ ამბობს "გურია ნიუსთან" ოზურგეთის მუნიციპალიტეტის სოფელ თხინვალში მცხოვრები მაყვალა ბაღიშვილი.
"ერთი თვის წინ, 18 ივლისს, კიდევ ერთხელ რომ ჩაიტანა ზვავმა მიწა და წაიღო საქათმე, ნალია და ლამისაა, მთელი სახლიც წაიღოს უკვე, დავრეკეთ ადგილობრივ გამგეობაში. მოვიდნენ, მომცეს საგარანტიო წერილი, მივიტანე გამგეობაში. გუბერნატორთან შეხვედრა მინდოდა, მაგრამ, ვერ ვნახე. შემხვდა მისი მოადგილე _ ასე გამეცნო გუბერნატორის მესამე მოადგილე ვარო. გადააწერეს ვაშაყმაძეს ჩემი წერილი, ვაშაყმაძემ ინფრასტრუქტურის უფროსთან გადამიმისამართა, რომელმაც მითხრა, თქვენი საქმე დევს, პროგრამაში ხართო, როგორც კი ზემდგომიდან დაფიქსირდება, რომ დახმარება უნდა გაგიწიოთო, მაშინვე შეგატყობინებთო. თუმცა, იმედი მაინც არ მაქვს _ ასე დავდივარ 5 წელია წინ და უკან. რომ გაწვიმდეს," _ ამბობს მაყვალა ბაღიშვილი, _ იცით, რა მითხრა გუბერნატორის მოადგილე შაფაქიძემ? ვუთხარი, ამდენი წელია თქვენს სამსახურში ვართ მთელი ოჯახი, არჩევნები მოდის და კი იცით, ერთი ხმა წყვეტს ყველაფერს,-მეთქი. ასე მიპასუხა _ რა ვქნათ, ქალბატონო, გადაბრძანდით, თუ გინდათ ოპოზიციაში, რას გვიშველის შენი ერთი ხმა და გინდა ათიო. ესაა მათი პასუხი! ადრე მითხრეს, რომ დაგენგრეს თავზე სახლი, მაინც არ გვაქვს საშუალებაო. ძალიან გულნატკენი ვარ _ დღეს ზიხარ მაგ სკამზე, თორემ ხვალ არ იქნები, მაგრამ ქუჩაში ხომ უნდა შევხვდეთ ერთმანეთს?"
