როგორც მოსალოდნელი იყო (წინა პროცესებიდან გამომდინარე), მოსამართლე ნანა ჭიჭილეიშვილმა, არცერთი ადვოკატის სარჩელი არ დააკმაყოფილა.
“ქართული ოცნების” ადამიანის უფლებათა დაცვის კომიტეტის წევრმა, ლანა ჭანტურიამ, რომელიც დავით კაჭახიძის ინტერესებს იცავდა, სხდომა პროტესტის ნიშნად, საქმის განხილვამდე დატოვა.
დავით კაჭახიძე ერთ-ერთი მათგანია, რომელმაც, როგორც პარტიის წევრმა, განახორციელა საწევრო შენატანი 1200 ლარის ოდენობით. დღეს იხილებოდა საჩივარი ამ თანხის კანონიერი წარმომავლობის თაობაზე. დავით კაჭახიძე, პროტესტის ნიშნად, საერთოდ არ გამოცხადდა სასამართლო სხდომაზე.
ადვოკატმა სასამართლოზე შუამდგომლობა დააყენა მოსამართლე ნანა ჭიჭილეიშვილის აცილების თაობაზე. როგორც ლანა ჭანტურია “გურია ნიუსთან” საუბარში ამბობს, მოსამართლის აცილებისთვის მას საკმაოდ მოტივირებული საფუძველი ჰქონდა:
„ნანა ჭიჭილეიშვილს უკვე განხილული ჰქონდა კოალიცია “ქართული ოცნების” საჩივრები ანალოგიურ საკითხზე და ყოველი მათგანი, გამონაკლისის გარეშე, არ იქნა დაკმაყოფილებული მიუხედავად მისი საფუძვლიანობისა, დასაბუთებულობისა კანონიერებისა. ამიტომ, გამიჩნდა საფუძვლიანი ეჭვი იმისა, რომ აღნიშნული საჩივრის განხილვისასაც, მოსამართლე მიიღებდა დაუსაბუთებელ და არაკანონიერ გადაწყვეტილებას პოლიტიკური ნიშნით. მას შემდეგ, რაც არ დამიკმაყოფილდა შუამდგომლობა მოსამართლის აცილების თაობაზე, მივიჩნიე, რომ აზრი არ ჰქონდა ჩემს მონაწილეობას საქმის განხილვაში, ვინაიდან ჩემთვის უკვე ცნობილი იყო სავარაუდო შედეგი, ანუ არც ეს საჩივარი დაკმაყოფილდებოდა, ისევე როგორც წინა საჩივრები და პროტესტის ნიშნად დავტოვე სხდომა.
სასამართლო დარბაზში იმყოფებოდნენ კოალიცია “ქართული ოცნების” ახალგაზრდული ფრთის წარმომადგენლები, რომლებისთვისაც აღნიშნული შუამდგომლობის დაუკმაყოფილებლობა მიუღებელი იყო და გამოხატეს თავისი პოზიცია, რის გამოც ისინი გაძევებულები იქნენ სხდომის დარბაზიდან და დააჯარიმეს 200 ლარით. მათ შორის იყო “კოალიცია “ქართული ოცნების” ახალგაზრდული ფრთის ლიდერი დავით ფაცაცია,” _ განაცხადა “გურია ნიუსთან” საუბარში ლანა ჭანტურიამ.
