კოალიციის წევრებმა დაგმეს ჟურნალისტებზე გახორციელებული ძალადობის ფაქტი. კოალიციის ადგილობრივმა ლიდერმა სოსო ბოლქვაძემ განაცხადა, რომ ზურაბ კვირკველია, რომლის უსაფუძვლო აგრესიის შედეგად “ინფო 9”-ის ოპერატორი ფიზიკურად დაზარალდა, ჯერაც არ დაუკითხავს ლანჩხუთის პოლიციას.
აღსანიშნავია, რომ დავით ჩავლეიშვილი საავადმყოფოდან პირდაპირ პოლიციის განყოფილებაში გადაიყვანეს. მას და ჟურნალისტ ნინო ხელაძეს გვიანობამდე კითხავდა გამომძიებელი დავით ფირცხალაიშვილი.
“ინფო 9”-ის ჟურნალისტების დაკითხვა პოლიციამ გუშინ დილიდანვე განაახლა, მაგრამ თავდამსხმელი რატომღაც ჯერაც არ დაუკითხავთ.
კოალიციის ლანჩხუთის რაიონულმა შტაბმა განცხადება გააკეთა, რომელშიც აღნიშნულია: “როდესაც ხელისუფლება, ათასგვარი კანონთან მიმსგავსებული უსამართლო გადაწყვეტილებით ყოველდღიურად ახორციელებს ზეწოლას თავისუფალ სიტყვაზე, აზრის თავისუფალ გავრცელებასა და მიღებაზე, საბოლოო ჯამში იგი სწორედ ასეთ აგრესიაში გადაიზრდება.
ვფიქრობთ, რომ ეს ამაზრზენი ფაქტი ხელისუფლების წაქეზებით მოხდა (ვიდეომასალის ანალიზისას ეს კარგად ჩანს). ყოველივე ეს მეტყველებს იმ სულისკვეთებაზე, იმ განწყობებზე და ფასეულობებზე, რომელიც ზოგადად ხელისუფლებაშია გაბატონებული და ამ მხრივ არც ჩვენი რაიონია გამონაკლისი.’’
კოალიციის წევრებმა განაცხადეს, რომ აპირებენ კონტროლზე აიყვანონ ეს ფაქტი და თვალყური მიადევნონ, რომ დამნაშავე დაუსჯელი არ დარჩეს.
კოალიციის ლანჩხუთის შტაბის იურისტმა განაცხადა, რომ იკვეთება რამდენიმე დანაშაული, კონკრეტულად: _ ჟურნალისტის საქმიანობისთვის ხელის შეშლა, ფიზიკური და სიტყვიერი შეურაცხყოფა და სხვისი ქონების განზრახ დაზიანება. ამ დანაშაულებრივი ქმედებების შეკრებითობის პრინციპით, დამნაშავეს სერიოზული სასჯელი უნდა შეეფარდოს, _ თქვა ავთანდილ სარჯველაძემ.
ჩვენთვის ცნობილი გახდა, რომ დაზარალებული დავით ჩავლეიშვილი თავის ძლიერი ტკივილების გამო ნევროპათოლოგთან გადის მკურნალობის კურსს.
