გასული კვირის ოთხშაბათს, საქართველოს პრეზიდენტი “ლაივში” პასუხობდა საქართველოს მოსახლეობას და ჟურნალისტებს. მსგავსი პროექტი პირველად 2009 წელს გახორციელდა და როგორც მაშინ, ახლაც შერჩევით მოხდა ჟურნალისტთა კორპუსის შედგენა. როგორც მოსალოდნელი იყო, რეგიონული ბეჭდვითი მედიის წარმომადგენლები გრძელ სიაში ვერ მოხვდნენ. “გურია ნიუსისთვის” ცნობილი გახდა, რომ რეგიონული ტელევიზიიდან მხოლოდ ტელეკომპანია “25-ე არხი” და “თრიალეთის”, რადიოსადგურებიდან კი _ “ჰერეთის” წარმომადგენლები იყვნენ მიპატიჟებულნი. როგორც საინფორმაციო სააგენტოები იუწყებოდნენ, პირდაპირი ეთერის დროს, პრეზიდენტთან ახლომდებარე სტუდიაში 30 ჟურნალისტი იმყოფებოდა. კითხვების დასმის უფლება “რეზონანსის,” “პალიტრის”, “მაესტროს”, რადიო “ჰერეთის”, “ლიბერალის” და “25 არხის” წარმომადგენლებს მიეცათ.
გაზეთ “რეზონანსის” ჟურნალისტი გიორგი ფუტკარაძე: _ რა თქმა უნდა, ძალიან საინტერესოა ასეთი ფორმატის შეხვედრა და სასურველია, მომავალშიც გაგრძელდეს, თუმცა, ვისურვებდი, რომ ანალოგიურ ფორმატში პრეზიდენტი უშუალოდ ჟურნალისტებს შეხვდეს. რაც შეეხება ჩემს დასმულ კითხვას, რომელიც საჯარო ინფორმაციის გაცემის კუთხით არსებულ პრობლემებს ეხებოდა, თავად პრეზიდენტმაც აღნიშნა, რომ ხელისუფლებას ამ კუთხით პრობლემები აქვს და ეცდება, გამოასწოროს. ვისურვებდი, რომ რეალურად მოწესრიგდეს ეს საკითხი.
ბათუმიდან ტელეკომპანია “25-ე არხის” პროდიუსერი და ჟურნალისტი ნათია როყვა შეხვედრაზე სპეციალურად ჩავიდა. მას რამდენიმე კითხვის დასმის სურვილი ჰქონდა, მაგრამ ამის საშუალება მხოლოდ ერთხელ მიეცა _ კითხვა სომალიში დატყვევებულ ქართველებს ეხებოდა, რომლებიც საქართველოსკენ სასოწარკვეთილნი იმზირებიან და დახმარებას ითხოვენ:
_ პრეზიდენტთან მქონდა რამდენიმე კითხვა: საკუთრების უფლების ხელყოფაზე, სახელმწიფოს მხრიდან ბიზნესში ჩარევაზე, პატიმრებისა და სამართლიანი სასამართლოს უფლებასა და დატყვევებული მეზღვაურები შესახებ. როცა არჩევნის წინაშე დავდექი, პრიორიტეტი მივანიჭე იმ კითხვას, რომელიც ეხებოდა ადამიანების სიცოცხლეს და ჯანმრთელობას, რადგან ვთვლი, რომ ადამიანის სიცოცხლე ყველასა და ყველაფერზე მნიშვნელოვანია ამქვეყნად. კონსტიტუციის თანახმად, ყველა ადამიანის “სიცოცხლესა და კეთილდღეობაზე” პასუხისმგებელია პრეზიდენტი, მიუხედავად იმისა, სად იმყოფება მისი ქვეყნის მოქალაქე. ამიტომ მაინტერესებდა, რას აპირებდა და ვის აკისრებდა პასუხისმგებლობას პრეზიდენტი დაკავებული მეზღვაურების ჯანმრთელობასა და სიცოცხლეზე მაშინ, როცა ბოლო ორი წლის განმავლობაში, ბათუმში გასამართი კონცერტებისთვის, 8 მილიონ ლარზე მეტია დახარჯული პრეზიდენტის სარეზერვო ფონდიდან. თუმცა, ამ კითხვაზე, პრეზიდენტისგან პასუხი ვერ მივიღე.
უკეთესი იქნება, თუ პრეზიდენტი ასეთი ტიპის შეხვედრას მოაწყობს მხოლოდ ჟურნალისტებთან. როცა კითხვას დასვამ, უნდა ჰქონდეს პასუხის გაცემის შესაძლებლობა ან შეპასუხების… _ თქვა ჩვენთან საუბრისას ნათია როყვამ.
რამაზ სამხარაძე, რადიო “ჰერეთის” დირექტორი: _ ჩემი აზრით, პრეზიდენტი არ იყო მზად, კითხვებზე პასუხი გაეცა დამოუკიდებელი მედიის ჟურნალისტებისთვის. უფრო მეტიც _აშკარად ეტყობოდა, რომ გაბრაზდა. არ ველოდი, თუ ჩემს კითხვაზე პასუხი არ ექნებოდა. სამწუხაროა, რომ საქართველო, ყველა კვლევის მიხედვით, ნახევრად დამოუკიდებელი მედიის ქვეყნების რიცხვს მიეკუთვნება,რაც გამოჩნდა კიდეც ამ ინტერვიუს დროს.
ჟურნალისტების გარდა, მიხეილ სააკაშვილთან კითხვა “ლეიბორისტებსაც” ჰქონდათ, მაგრამ ტელეხიდში პორტაჟში არ მიიწვიეს. ამიტომ, შალვა ნათელაშვილმა ბრიფინგის საშუალებით გაახმოვანა თავისი აზრი: “დღეს, ჩვენი სამშობლოს უბოროტესი მტერი, პრეზიდენტად თვითწოდებული, ხალხის შიმშილობით გამაძღარი არსება, საკუთარი ტელევიზიებიდან აწყობს მორიგ ფარსს, სახელწოდებით “კითხვა-პასუხი” და ამ დროს, სრულიად საქართველოს, სააკაშვილთან აქვს ერთადერთი კითხვა: _ ამდენი ნგრევის, დაშლის, სისხლის შემდეგ, როდის გადადგება უკანონოდ მიტაცებული თანამდებობიდან, ანუ გასაგები ენით თუ ვიტყვით, როდის წაეთრევა პრეზიდენტობიდან,” ჴ თქვა შალვა ნათელაშვილმა.
მიხეილ სააკაშვილის გამოსვლა იმითაც იყო დასამახსოვრებელი, რომ დაგვიგროვდა აქამდე უცნობი სატელევიზიო “მარგალიტები”: “საქართველოში ყველაზე მაღალი ხარისხის თოვლია”; “კალიფორნიასა, შანხაისა და ჯუგაანში განათლებამიღებულებს დასაქმების თანაბარი შანსი აქვთ”; “საავადმყოფოები იმიტომ კეთდება, რომ ხალხით გაივსოს”; “ვლადიმირ პუტინის პოლიტიკური მენტალიტეტი რეპტილიის დონეზეა” და ა.შ.
ასე რომ, მიხეილ სააკაშვილმა კიდევ ერთი საპიარო სვლა გააკეთა და კიდევ ერთხელ შეგვახსენა, რომ ის _ ის არის და ჩვენ _ ჩვენ ვართ!
