რა ნომრით მიიღებს არჩევნებში მონაწილეობას საპარლამეტო არჩევნებში კოალიცია “ქართული ოცნება” სულ ცოტა ხანში გახდება ცნობილი.
ცენტრალური საარჩევნო კომისია დაინტერესებული მხარეებისთვის აღწერს საარჩევნო ბლოკებისთვის რიგითი ნომრის მინიჭების პროცედურას.
“საქართველოს საარჩევნო კოდექსის 119-ე მუხლის მე-4 და მე-5 პუნქტების თანახმად „თუ არჩევნებისთვის საარჩევნო ბლოკი შექმნეს ბოლო საპარლამენტო არჩევნებში მონაწილე პარტიებმა, ბლოკის წესდებაში მათ უნდა მიუთითონ, რომელი პარტიის რიგითი ნომრით ისარგებლებენ”, ხოლო „ყველა სხვა საარჩევნო სუბიექტის რიგითი ნომერი გამოვლინდება წილისყრით“.
ზემოაღნიშნული ნორმის თანახმად, იმისათვის, რომ საარჩევნო ბლოკმა დაიტოვოს მასში შემავალი ერთ-ერთი სუბიექტის რიგითი ნომერი, ბლოკში შემავალ ყველა პარტიას მონაწილეობა უნდა ჰქონდეს მიღებული 2008 წლის საპარლამენტო არჩევნებში. წინააღმდეგ შემთხვევაში ბლოკის რიგითი ნომერი უნდა განისაზღვროს წილისყრით არჩევნებამდე არაუგვიანეს 37 დღისა ანუ 25 აგვისტომდე” _ ნათქვამია ცესკოს მიერ გავრცელებულ განცხადებაში.
„ქართული ოცნების“ წევრი, გიორგი ცაგარეიშვილი მიიჩნევს, რომ ეს უკანონო გადაწყვეტილებაა:
_ბლოკის შემადგენლობაში შედის პარტია, რომელიც არის კვალიფიციური სუბიექტი. მას უკანასკნელ არჩევნებზე გადალახული აქვს ბარიერი. არამარტო ადგილობრივ არჩევნებზე, არამედ საპარლამეტოზეც. ეს არის კონსერვატიული პარტია, მათი რიგითი ნომერი იყო შვიდი. თქვენ იცით, რომ კონსერავტორები არიან კოალიციის შეამდგენლობაში. ამიტომ, ჩვენ, ყველა გაგებით, მათი მეშვეობით გვეკუთვნოდა #7. დაახლოებით ერთი თვეა გვქონდა ამის მოლოდინი, რომ ამ ნომერთან დაკავშირებით პრობლემები შეგვექმნებოდა, _ განაცხადა ცაგარეიშვილმა.
_ თუ გქონდათ ამის მოლოდინი, რატომ გააკეთეთ ეს ბანერები და რატომ უთხარით საზოგადოებას რომ #7 იქნებოდა?
_ შეგნებულად გავაკეთეთ. როდესაც ასეთი უსამართლო გადაწყვეტილება იქნებოდა მიღებული, გვინდოდა ზემოქმედება მოგვეხდინა მოსახლეობაზე და ამას მისცემოდა შესაბამისი შეფასება. ფიარული თვალსაზრისითაც, ყველანაირად გამართლებული იყო #7 გამოკვრა. იმიტომ, რომ ახალ ნომერს, უდავოდ, ასე უფრო მეტად მიექცევა ყურადღება. კიდევ ერთხელ ვიმეორებ, ეს არის უსამართლო გადაწყვეტილება.
მგონი, დღეს ან ხვალ ბლოკებისთვის უნდათ ჩაატარონ კენჭისყრა. თქვენ იცით, რომ არჩევნებში მონაწილეობას ორი ბლოკი იღებს. “ბიძინა ივანიშვილი – “ქართული ოცნება” და „ქრისტიან დემოკრატები“. მე არ ვიცი იმ ბლოკს რა ჰქვია. რას იზამს მერაბიშვილის უბეში გამოჩეკილი პარტია, ნაკლებად მაინტერესებს. მე მაინტერესებს თარგამაძეს რას უზამენ. მას #10 აქვს. გაწირავენ საბოლოოდ?!
მნიშვნელობა არ აქვს, რა ნომერი გვექნება. ჩვენ, ყველა შემთხვევაში დავამარცხებთ ხელისუფლებას.
