პური კიდევ გაძვირდა

ფრაზა _ “პურ-მარილი გაგვიძვირდა”, სერიოზულად იძენს ახალ დატვირთვას _ ფასმომატებული პურის კვალდაკვალ, გაძვირდა მარილიც, რასაც ადამიანები ნაკლებად ელოდნენ. _ შაქარი ხშირად ჩახატეთ მასე თქვენს გაზეთში, სანატრელი გაგვიხდა და ხანდახან სურათს მაინც შევხედავთ! ტელევიზორში ყოველდღე სააკაშვილის ყურებას კი მირჩევნია მაგის ყურება. პური რომ გაძვირდა, მარილმაც თავი გამოყო, მეც ნახირ-ნახირაო. კეჟერაც თუ უმარილოდ შესაჭმელი გაგვიხდა ამ გამარტებაზე, მერე ნახეთ! _ გვითხრა ერთ-ერთმა მკითხველმა მაშინ, როცა “გურია ნიუსი,”  გაძვირებული პურის ფასისა და წონის შესახებ, ოზურგეთში ინფორმაციას  აგროვებდა.
პურის ფქვილის გაძვირების შემდეგ, 27 იანვარს, ოზურგეთში პურის საცალო ფასმაც მნიშვნელოვნად მოიმატა. ხალხი სერიოზულად არის შეშფოთებული და  ანგარიშმიუცემლად, ვიღაცისგან თუ რაღაცისგან პასუხს ითხოვს კითხვებზე _ რა მოხდება? რა გვეშველება? ასე სადამდე გავძლებთ? აღსანიშნავია, რომ ამ დღეს, განსაკუთრებით სწრაფად და ბევრი რაოდენობით გაიყიდა ძველი პური და არაერთი ადამიანი, უფრო მოხუცები, ეძებდნენ, კიდევ თუ იყო წინა დღის პური გასაყიდად დარჩენილი რომელიმე მაღაზიაში.
“შპს ვასაძის პური” რამდენიმე დასახელების პურ-პროდუქციას გვთავაზობს. დღეისთვის “ქვის” თეთრი პური წონით 370 გრამს იწონის, ფასი ჴ 70 თეთრია; იგივე პური, შეფუთული და დაჭრილი კი 75 თეთრი ღირს;  “აგურა რუხი”, 600 გრამი  _ 85 თეთრი; რუხი მრგვალი პური, წონით 410 გრამი _ 60 თეთრი; “მესხური” თეთრი პური, 370 გრამია და 70 თეთრი ღირს; “ბერძნული” თეთრიც იგივე წონით და ფასით იყიდება, როგორითაც _ მესხური.
შედარებით დაბალია ფასი  ინდმეწარმე “ვასილ ბეშიტაშვილის” საცხობში, სადაც ჩვენს მიერ აწონილი თითოეული  პურის წონა და ფასი ასეთი იყო: თეთრი “ქვის” პური, წონით 360 გრამი 60 თეთრი ღირდა; იგივე პური, დაჭრილი და შეფუთული _ 65 თეთრი; “ქვის” რუხი პური, წონით 330-340 გრამი _ 55 თეთრი; შავი მრგვალი, 320 გრამიანი პური _ 55 თეთრი. რაც შეეხება ძველ ანუ წინა დღის პურს, მას აქ 50 თეთრად ყიდდნენ, ორი დღისას კი _ 40 თეთრად. ასეთი კატეგორიის პურს ახლა განსაკუთრებით აქვს გასავალი.
“ინდმეწარმე ვასილევას ” საცხობის პურის წონა და ფასი, 28 იანვრისთვის,   ოზურგეთში არსებულ ყველა საცხობში წარმოებულ პროდუქციაზე ფასით ნაკლები და წონით მეტი იყო _  500 გრამიანი თეთრი “აგურა” აქ 70 თეთრი ღირდა; თეთრი, “მრგვალი” 970 გრამიანი კი 1 ლარი და 40 თეთრი.
არავინ იცის, მომდევნო დღეებში, როგორ შეიცვლება პურის წონა და  ფასი, თუმცა, უკვე ყველა დარწმუნებულია იმაში, რომ პურისა და მჭადის პრობლემას, მალე მარილისაც დაემატება.