“ქართული ოცნების” ლანჩხუთის ოფისის ყველა თანამშრომელი “გურია ნიუსთან” საუბრისას, ამ ხმებს კატეგორიულად უარყოფდა.
ჩვენთვის ცნობილი გახდა, რომ კოალიციის შტაბის ხელმძღვანელმა სოსო ბოლქვაძემ თანამდებობა დატოვა. ამ პროცესებს წინ უძღოდა რომან ბიწაძის განცხადება გადადგომის შესახებ. კოალიციის შტაბის პრეზენტაციაზე ბიწაძის თანამდებობაც გაჟღერდა _ იგი საარჩევნო ადმინისტრაციის კოორდინატორად წარადგინეს. 18 აგვისტოს შტაბის თათბირი გაიმართა, რომელზეც გაცხადდა, რომ კოალიციის საარჩევნო შტაბს, სოსო ბოლქვაძის ნაცვლად, გოგი გეგიაძე უხელმძღვანელებდა.
შტაბის ერთ-ერთმა თანამშრომელმა ვახტანგ ზენაიშვილმა ჩვენთან საუბარში თქვა: _ მე რომ ვყოფილიყავი დეპუტატობის კანდიდატი, სოსო ბოლქვაძეს არ შევცვლიდი. ეს ჩემი პირადი შეხედულებაა. დეპუტატობის კანდიდატი დღეიდან თავის თავზე იღებს მთელ პასუხისმგებლობას. გოგი გეგიაძე მისი კანდიდატურაა. მას მიაჩნია, რომ იგი უკეთ შეძლებს საარჩევნო შტაბის ხელმძღვანელობას. ჩვენი მხრიდან მის ამ გადაწყვეტილებას წინააღმდეგობა არ შეხვედრია. ვიცი, რომ გოგი გეგიაძე კარგი ორგანიზატორია. ეს პირადად თემურ ჩხაიძის გადაწყვეტილებაა. ამ შემთხვევაში მიმაჩნია, რომ არ აქვს მნიშვნელობა ვინ იქნება შტაბის უფროსი; მთავარია, ერთად მივიდეთ საბოლოო გამარჯვებამდე.
_ ვახტანგ ზენაიშვილისთვის შეიძლება მნიშვნელობა არ ჰქონდეს, ვინ იქნება “ქართული ოცნების” საარჩევნო შტაბის უფროსი, მაგრამ საზოგადოების დიდი ნაწილი ასე არ ფიქრობს, _ ამბობს ჩვენთან საუბარში შტაბის ერთ-ერთი წევრი, რომელიც ვინაობის გამჟღავნებას მხოლოდ იმიტომ ერიდება, რომ არსებული დაძაბულობა უფრო არ გაზარდოს.
ჩვენ რამდენიმე მოქალაქის მოსაზრებაც ჩავიწერეთ. რესპონდენტთა აზრით, სოსო ბოლქვაძე ოპოზიციური კოალიციის ყველაზე შესაფერისი და ავტორიტეტული ლიდერი იყო. ბოლქვაძის გადადგომის შემდეგ, შტაბი დატოვეს ოფისის იურისტმა ავთანდილ სარჯველაძემ, აქტივის კოორდინატორმა _ ელგუჯა ჩხაიძემ, ორაგვის ზონის კოორდინატორმა _ ლევან ჩხაიძემ, შეხვედრების კოორდინატორმა _ ნესტორ მგელაძემ.
ჩვენ შევეცადეთ თანამდებობრივი ცვლილებების შესახებ დეტალები გოგი გეგიაძესთან გადაგვემოწმებინა: _ მე დავინიშნე კოალიციის საარჩევნო შტაბის უფროსად. საარჩევნო წესდების თანახმად, შტაბის მართვა გადადის მაჟორიტარი დეპუტატობის კანდიდატზე. მას აქვს უფლება დანიშნოს შტაბის უფროსი. მე ვიყავი დეპუტატობის კანდიდატის საინიციატივო ჯგუფის წევრი. პერიოდულად ვესწრებოდი თემურ ჩხაიძის შეხვედრებს მოსახლეობასთან. ეს ჩემთვისაც მოულოდნელი გადაწყვეტილება იყო. მე და სოსო ბოლქვაძე თბილისში ვიყავით, როცა ამის შესახებ გავიგე. ჩემი წარდგინება მოხდა ოფიციალურად თემურ ჩხაიძის მიერ. სოსო შტაბში რჩება, არსად არ მიდის. ჩვენი მუშაობა მხოლოდ თვენახევარს გაგრძელდება და არჩევნების მეორე დღესვე დასრულდება. სოსო ბოლქვაძე კი გააგრძელებს მუშაობას, რადგან ოფისი არ იხურება, მომავალ საპრეზიდენტო არჩევნებამდე იმუშავებს, _ ამბობს გეგიაძე.
გოგი გეგიაძისგან გავიგეთ, რომ შტაბის ერთ-ერთ თანამდებობის პირს, რომან ბიწაძეს გადადგომაზე განცხადება ჰქონდა დაწერილი. ბიწაძემ განთავისუფლების განცხადება ოფისის ხელმძღვანელის სოსო ბოლქვაძის სახელზე დაწერა, მაგრამ როგორც გავიგეთ, ბოლქვაძეს განცხადება ჯერ არ დაუკმაყოფილებია.
შტაბში ლაპარაკი იყო იმაზეც, რომ გეგიაძეც და ბოლქვაძეც შტაბს ერთად უხელმძღვანელებენ; ამას კოალიციის რიგითი წევრები ამბობენ, რომელთაც დავალება აქვთ მიცემული, რომ შიდადაპირისპირებაზე ხმამაღლა არ ისაუბრონ. ამასთან, თვლიან, რომ ბოლქვაძის წასვლა შტაბიდან დაუშვებელია და პოლიტიკური მიზნისთვის საზიანო. როგორც ჩვენი წყარო ამბობს, “ქართული ოცნების” ლანჩხუთის შტაბის ხელმძღვანელების მიმართ დეპუტატობის კანდიდატის ოჯახური გარემოცვის დაპირისპირების სადემონსტრაციოდ, თემურ ჩხაიძე შტაბის ოფისის გარეთ, ეზოში მართავდა მომხრეებთან შეხვედრებს. შევეცადეთ ამ ხმების ნამდვილობაში გავრკვეულიყავით, მაგრამ კოალიციის ოფისის ნებისმიერი წარმომადგენელი ამ ხმებს კატეგორიულად უარყოფდა.
ამ დღეებში გაირკვა, რომ არსებულ უთანხმოებას დიდი ხნის ისტორია აქვს, მაგრამ სოსო ბოლქვაძე, კოალიციის ინტერესებიდან გამომდინარე, თავს არიდებდა ამაზე საუბარს. შტაბის ერთ-ერთი წევრი საუბრობს, რომ მთავარი საბაბი თემურ ჩხაიძის ცოლისძმას _ გია მაჭარაშვილსა და სოსო ბოლქვაძეს შორის არსებული დაპირისპირებაა და სწორედ გია მაჭარაშვილის რეკომენდაციით იხელმძღვანელა დეპუტატობის კანდიდატმა, როცა ცენტრალური შტაბი დაითანხმა და ლანჩხუთის საარჩევნო შტაბი ახალ ნდობით აღჭურვილ პირებს გადააბარა.
გია მაჭარაშვილი აქტიური ფიგურაა ლანჩხუთის პოლიტიკაში. ჩვენი წყარო მის პოლიტიკურ წარსულს იხსენებს: _ იგი “მოქალაქეთა კავშირის” წევრი და ახლანდელ გამგებელთან – გია გოგუაძესთან დაახლოებული პირი იყო. 2003 წელს, როცა მიხეილ სააკაშვილი წინასაარჩევნო შეხვედრას მართავდა ლანჩხუთის ჩაის ფაბრიკის კლუბში, ახლანდელ გამგებელს სწორედ მაჭარაშვილი ეხმარებოდა შეხვედრის ჩაშლაში. შემდეგ მან “ნაციონალური მოძრაობის” პარტიული სიის მეორე ნომრად იყარა კენჭი და ლანჩხუთის საკრებულოშიც მოხვდა, მაგრამ თანამებრძოლებმა შეძლეს მისი დარწმუნება, უარი ეთქვა საკრებულოს წევრობაზე თბილისში თბილი თანამდებობის სანაცვლოდ. მაჭარაშვილი დათანხმდა ამ პირობას, მაგრამ “ერთგულმა” ნაციონალურმა თანამებრძოლებმა იგი მაშინ “გადააგდეს”.
მაჭარაშვილი დეპუტატობის კანდიდატის თემურ ჩხაიძის ცოლისძმაა. სულ რამდენიმე დღის წინ, იგი “გურია ნიუსის” ობიექტივში მაშინ მოხვდა, როცა ბახმაროს შესასვლელში, უმძიმეს პირობებში მომუშავე ჟურნალისტისთვის ხელის შეშლა სცადა. როგორც ჩანს, მას მოუწევს სწავლა, რომ ნებისმიერ მედიასაშუალებას, მიუხედავად იმისა, მოგვწონს თუ არა ის, პოლიტიკოსმა მუშაობაში ხელი არ უნდა შეუშალოს! (მკითხველს შესაბამისი კადრების ნახვა შეუძლია “გურია ნიუსის” ვებ-გვერდზე წწწ.გურიანეწს.ცომ).
გოგი გეგიაძის დოსიე, რომელიც დღეიდან “ქართული ოცნების” ლანჩხუთის მაჟორიტარობის კანდიდატის საარჩევნო შტაბს უხელმძღვანელებს, ასე გამოიყურება: იგი იყო ლანჩხუთის მერი, საკრებულოს ყველაზე ხანდაზმული წევრი “ნაციონალური მოძრაობიდან”, ამავე საკრებულოს ფრაქციის თავმჯდომარე. თვითმმართველობის ბოლო არჩევნებზე კი, კონსერვატიული პარტიიდან იყრიდა კენჭს ლანჩხუთის საკრებულოში მოსახვედრად.
რაც შეეხება რომან ბიწაძეს, იგი ადასტურებს, რომ სოსო ბოლქვაძის სახელზე ჯერ კიდევ ხელმძღვანელობის შეცვლამდე დაწერა განცხადება: _ მე გადადგომა კი არ მოვითხოვე, არამედ ვითხოვდი არ მომხდარიყო ჩემი კანდიდატურის დამტკიცება საარჩევნო ადმინისტრაციის კოორდინატორად. ეს ეწერა ჩემს განცხადებაში.
_ რატომ გახდა აუცილებელი, რომ ასეთი განცხადება დაგეწერათ?
_ იმიტომ, რომ წინასწარ მქონდა ინფორმაცია მოსალოდნელი ცვლილებების შესახებ. არ აქვს მნიშვნელობა შტაბში ვიქნები, შტაბს გარეთ თუ ეზოში. მთავარია კონკრეტულ დავალებაზე ვიმუშაო _ ვიბრძოლო, რომ კანდიდატისა და კოალიციის გამარჯვება ბოლომდე მივიყვანო.
შტაბის ერთ-ერთი წევრის თქმით, “კოალიციის მხარდამჭერებისა და მოსახლეობის სერიოზულ უკმაყოფილებას იწვევს, ისიც რომ ოპოზიციურ გაერთიანებას ბევრი შემთხვევითი პირი მიეტმასნა. აქ მოხდა თანამდებობების გამო ხელისუფლებაზე განაწყენებული პირების, ყოფილი პოლიციელებისა და ძალოვანი სტრუქტურების თანამშრომლების კონსოლიდაცია, რაც ამომრჩეველთა აზრით, ეჭვქვეშ აყენებს პოლიტიკური გაერთიანების ავტორიტეტს. შტაბის ახალი წევრების აზრით კი, ეს ჩვეულებრივი პოლიტიკური პროცესია, რაც ხშირად სდევს თან ძლიერი ოპოზიციური გაერთიანებების ჩამოყალიბებას”.
მასალის მომზადების პროცესში, ჩვენ მოვახერხეთ კოალიციის საარჩევნო შტაბის ყოფილ ხელმძღვანელს სოსო ბოლქვაძეს დავკავშირებოდით და მისი ვერსია მოგვესმინა საქმის შესახებ: _ ლანჩხუთში ქაოსური სიტუაცია იყო, როცა მე შემომთავაზეს შტაბის ხელმძღვანელობა. გარკვეულწილად შევძელი, რომ ურთულეს პირობებში, ყოველგვარი ფინანსების გარეშე, დამელაგებინა სიტუაცია. მე მადლობელი ვარ ყველასი, ვინც ამგვარ მძიმე პირობებში გვერდში ამომიდგა…
_ დეპუტატობის კანდიდატი თემურ ჩხაიძე თქვენით უკმაყოფილო იყო?
_ ასეთი რამ არ გამიგია. მე შევკრიბე გუნდი. ვთვლი, რომ ძალიან ძლიერი გუნდი იყო და კარგად ვმუშაობდით. მაგრამ გადაწყვეტილება მისი მისაღებია. მე იქ იდეის გამო ვიყავი, ეს ეტყობა მათთვის ძნელი გასაგებია. 6 თვე უხელფასოდ ვმუშაობდი შტაბის უფროსად. თემურ ჩხაიძემ ჩათვალა, რომ ახალ გუნდს _ მაჭარაშვილს, გეგიაძეს, ვენე კვირკველიას, ნუგზარ ჩხაიძეს უნდა ენდოს. ეს აბსოლუტურად მისი გადაწყვეტილებაა და მე ვერაფერს შევცვლიდი.
_ მართალია ხმები თქვენსა და მაჭარაშვილს შორის არსებული დაპირისპირების შესახებ?
_ შეიძლება თვითონ ფიქრობს ასე, რომ ჩვენს შორის იყო დაპირისპირება. როცა მე ქალაქის მერი ვიყავი, იგი “ნაციონალური მოძრაობის” წევრი იყო. რა თქმა უნდა, მან დიდი გავლენა იქონია თემურ ჩხაიძის გადაწყვეტილებაზე. მე არ ვარ ის ადამიანი, ვინც შტაბში რიგით უფუნქციო წევრად დარჩება. ივანიშვილის მომხრე ყოველთვის ვიქნები, რადგან მე დავალებული ვარ ამ ადამიანისგან და უმადური ვერ ვიქნები. როცა ადამიანი მიიღებს გადაწყვეტილებას, ვფიქრობ, რომ აზრი არ აქვს წინააღმდეგობის გაწევას. ეს პოლიტიკური ორგანიზაციაა, საქმის გარჩევას ხომ არ დავიწყებდი?”
_ შტაბი დატოვა ძველმა შემადგენლობამ. გამოდის, რომ კოალიციაში შემავალი პარტიების წარმომადგენლები აღარ იქნებიან ახალი საარჩევნო შტაბის წევრები?
_ თავისთავად ასეა. რომან ბიწაძემ თქვა, რომ დიდი უნდობლობაა მის მიმართ და ამ პროცესებამდე ცოტა ხნით ადრე დაწერა განცხადება. ვფიქრობ, რომ გია მაჭარაშვილი დაინიშნება მის თანამდებობაზე. ისეთი ტენდენციაა, რომ ზონების კოორდინატორებსაც ჩაანაცვლებენ ან მეთვალყურეებს დაუნიშნავენ, ამის ნიშნები უკვე იგრძნობა. მაგალითად, საოლქო კომისიიდან გამოიწვიეს კოალიციის წარმომადგენელი გოჩა ფირცხალაიშვილი. ვინ უნდა ჩაანაცვლოს ფირცხალაიშვილი, რომელიც უაღრესად განათლებული და არჩევნებზე მუშაობის დიდი გამოცდილების მქონე ადამიანია, რომელიც ლანჩხუთელებს ძალიან უყვართ.?!
_ შტაბის ახალმა ხელმძღვანელმა განაცხადა, რომ თქვენ რჩებით ოფისის უფროსად…
_ ეს სასაცილო, ბავშვური შემოთავაზებაა. რას ნიშნავს ოფისის ხელმძღვანელობა, ვერ ვიგებ. თუ არჩევნებს ვერ კურატორობ, ვერ იღებ პოლიტიკურ გადაწყვეტილებებს, ოფისის ხელმძღვანელობა რაღას ნიშნავს? ოფისს ჰყავდა მენეჯერი, ლადო ნანაძე, რომელიც საორგანიზაციო საკითხებს აგვარებდა. ასე რომ, რას ნიშნავს ეს თანამდებობა, ჩემთვის სრულიად გაუგებარია. არ მეგონა, თუ ჩემდამი უნდობლობის საკითხი დადგებოდა, რადგან თემურ ჩხაიძესთან ძალიან კარგი ურთიერთობა მქონდა. ახლაც ღიად ვაფიქსირებ, რომ არჩევნებში მას დავუჭერ მხარს.
არქიტექტორი სოსო ბოლქვაძე, ცოტა ხნის წინ, “გურია ნიუსთან” საუბრისას ამბობდა, რომ მისი პოლიტიკური მოღვაწეობა დროებითია და არჩევნების დასრულებისთანავე, თავის ძველ პროფესიას დაუბრუნდებოდა. ეტყობა, “ოცნების” ლანჩხუთელ მხარდამჭერთა სამწუხაროდ, ეს დრო მისთვის არჩევნებამდე თვენახევრით ადრე დგება.
