მამა აცხადებს, რომ არაფერი იცის, გარდა იმისა, „რომ გამოიყვანეს, ის ვნახე, ზევით მესაზღვრეების შტაბიდან გამოყვანის პროცესი დავინახეთ“.
_ შეიარაღებული ხალხიც დაინახეთ?
_ შეიარაღებული ხალხი ვნახეთ, მაგრამ მე არ ვიცი, ვინ იყვნენ. ჩვენ ისინი ზურგიდან დავინახეთ, დავეწიეთ და შევხედეთ, მაგრამ ვინ იყვნენ, ეს არ ვიცით. ტანსაცმელზე არაფერი არ ეწერათ
_ მძევლები ვინ გაათავისუფლა?
_ სამართალდამცავებმა, მაგრამ პოლიცია იყო თუ თავდაცვა, არ ვიცი. სროლა არ ყოფილა, ბავშვები მშვიდად და წყნარად გაათავისუფლეს.
_ ნახეთ შვილი გათავისუფლების შემდეგ?
_ ჩემი შვილი არ მინახავს, დავინახე მეზობლის ბავშვი, რომელიც მანქანაში იჯდა და ამ მანქანის შუშა იყო ჩაწეული.
_ დაგიკავშირდათ ვინმე სამართალდამცავებიდან, რამე გაცნობეს დამატებით თქვენი შვილის შესახებ?
_ ამ წუთას მოვდივარ თელავიდან, ვასილ დავითაშვილი (ნაციონალური მოძრაობის თელავის მაჟორიტარობის კანდიდატი) ვნახე და დამპირდა, რომ ბავშვს მალე გამოუშვებენ. ვკითხე, როდი მეთქი, მაგრამ არც რიცხვი უთქვამს და არც საათი.
_ შვილის ნახვის საშუალება თუ მოგცეს პოლიციაში?
_ არა, ბავშვი არ მანახეს, არც მისი ჯანმრთელობის მდგომარეობის შესახებ ვიცი რამე, დავითაშვილმა მითხრა, კარგად არისო.
