სოფლის მაცხოვრებლები ქუჩაში არიან გამოფენილები. ისინი თვალს ადევნებენ სოფელში სამხედრო ტრანსპორტის, სამთავრობო ჯიპებისა და სასწრაფო დახმარების მანქანების ინტენსიურ მოძრაობას და ამაოდ ელიან ხელისუფლებისაგან განმარტებას, რა ხდება მათ თავს და უნდა დატოვონ თუ არა სოფელი.
რამდენიმე ოჯახმა უკვე გაარიდა საკუთარი ბავშვები იქაურობას, სოფელში დარჩენილი მამაკაცები კი აქტიურად ურთიერთობენ ჟურნალისტებთან. მომხდარის ოფიციალური ვერისიის თითქმის არავის სჯერა.
მოქალაქე ნ.კ. “გურია ნიუსთან” საუბარში ამბობს, რომ 8-10 წლის ბავშვებს მარტო უშვებენ სოკოზე და ჯერ არავინ დაკარგულა: “ეს ბიჭები აქ არიან გაზრდილები , გამორიცხულია, რომ გზა აბნეოდათ. საეჭვოა ისიც, რომ გათავისუფლებულ ბავშვებს ამ დრომდე არ უშვებენ სახლში. გვეუბნებიან, კარგად არიანო და გამოვუშვებთო, მაგრამ ამ დრომდე არ დაუბრუნებიათ ოჯახებში. ის კი არადა,გავიგეთ თელავიდან თბილისში გადაუყვანიათ. მიშას დადგმული სცენარია, სინამდვილეს არ ჰგავს.” _ აცხადებს ნ.კ. “გურია ნიუსთან” საუბარში.
სოფელ ლაფანყურის ცენტრში მედია და საპატრულო ეკიპაჟია განლაგებული. ამ ადგილის იქეთ მედიას აღარ ატარებენ, ადგილობრივებისათვის კი გადაადგილების შეზღუდვა არ არის. სოფელში ყოველ საათში ერთხელ ელვის სისწრაფით შემოდის ჯიპების, სამხედრო და სასწრაფო დახმარების მანქანების ჯგუფები, რაც დაძაბულობას კიდევ უფრო ზრდის.
თელავიდან დღის განმავლობაში რამდენიმე სასწრაფო დახმარების ბრიგადა გამოიძახეს, ლაფანყურში დიდი სისწრაფით შემოვიდა კატასრტოფის ბრიგადის ავტომანქანაც. სოფელში ამბობენ, ალბათ დაჭრილები გამოჰყავთო, თუმცა სასწრაფო დახმარების მანქანები უკან სულ სხვა გზით ბრუნდებიან და შესაბამისად, დაჭრილების რაოდენობის დადგენა ვერ ხერხდება.
“გვეუბნებიან 6 შეირაღებული პირის შეპყრობა მიმდინარეობსო, ვერ გაგვიგია რად უნდა ასობით სამხედრო და ამხელა შეიარაღება 6 კაცის დაჭერას ან რისთვის დაჭირდათ გუშინ მძიმე ტექნიკის შემოყვანა, ის ტექნიკა ამ ტყეებში სრულიად გამოუსადეგარია” _ აცხადებენ ლაფანყურელები.
“ხელისუფლების მიერ გავრცელებულ ვერსიას მხოლოდ მაშინ დავიჯერებ, როცა ე.წ შეიარაღებული ბანდის დახოცილი წევრების ფოტოებს გაავრცელებს”, _ აცხადებს ვაჟა ბ. “გურია ნიუსთან” საუბარში.
