#62 ჩოხატაურის საარჩევნო ოქში 38 უბანია. კომისიის უმრავლეს უბანზე თავმჯდომარეებად, მოადგილეებად და მდივნებად საოლქოს მიერ დანიშნული წევრები არიან არჩეული. განსაკუთრებით თვალშისაცემია საუბნო კომისიებში პედაგოგთა და სკოლის დირექტორთა რაოდენობა. უნდა ითქვას ისიც, რომ მათი უმრავლესობა “ნაციონალური მოძრაობის” ჩოხატაურის დეპუტატობის კანდიდატთან, მანანა ჯინჭარაძესთან (ჯინჭარაძე საგანმანათლებლო რესუსცენტრის ხელმძღვანელი იყო) დაახლოებული პირი ან ხელქვეითია. მაგალითად, დაბის N#1 უბანზე, სადაც ყველაზე მეტი _ 977 ამომრჩეველია, კომისიის თავმჯდომარე ეთერ წილოსანია, პირველი საჯარო სკოლის დირექტორი. მისი მოადგილე ჯინჭარაძის მეზობელი და მეგობარი ოლია გიორგაძეა. მდივნად გამგეობის თანამშრომელი, რუსუდან კოტრიკაძე ჰყავთ არჩეული. ყველა მათგანი საოლქო კომისიის მიერაა წარდგენილი.
სოფელ გორაბერეჟოულში კომისიის თავმჯდომარე, სკოლის დირექტორი ელგუჯა კიკვაძეა. მისი მოადგილე საკრებულოს წევრის, გურამ ტყეშელიაძის და, როზა ტყეშელიაძეა, ხოლო მდივანი, პედაგოგი მანანა დევიძე, რომელიც “ქრისტიან-დემოკრატიულ მოძრაობას” წარმოადგენს.
სოფელ გოგოლესუბანში საოლქოდან დანიშნული წევრი ლიურა სიხარულიძე მასწავლებელია. ასევე საოლქოდან დანიშნული ელზა სიხარულიძე კულტურის ცენტრის და ასევე საბავშვო ბაღის თანამშრომელია, რომელიც “ქართული ოცნების” შეხვედრაზე სოფელ გოგოლესუბანში დეპუტატობის კანდიდატის თემურ ჭკუასელის შეხვედრის ჩაშლას შეეცადა. მართალია ეს ქალბატონი უპარტიოა, თუმცა, არ მალავს, რომ “ნაციონალური” მოძრაობის მხარდამჭერია და თითქმის ყველა შეხვედრაზე რამაზ ნიკოლაიშვილს განსაკუთრებულ მადლობებს უხდის. ამავე სოფლის საუბნო კომისის წევრი, “ქრისტიან-დემოკრატიული მოძრაობიდან” ნუგზარ გაბუნიაა, რომელიც გამგეობის თანამშრომლის (ის, ამავე დროს საოლქო საარჩევნო კომისიაშიც მუშაობს) მამამთილია.
გუთურში კომისიის წევრი “ერთიანი ნაციონალური მოძრაობიდან” ასევე პედაგოგი მადონა გიორგაძეა.
ერკეთში კომისიის თავმჯდომარე კულტურის ცენტრის თანამშრომელი, ლეილა კოტრიკაძეა. მისი მოადგილე, ციალა ჭიხვარია პედაგოგია.
ზოტში კომისიის თავმჯდომარის მოადგილე, სკოლის დირექტორი, ზაზა ანთაძეა. კოხნარში კომისიას სკოლის დირექტორი, ნანა ახალაძე ხელმძღვანელობს.
წიფნარის საუბნო კომისიაში ორი მასწავლებელია. ორივე საოლქოს მიერ დანიშნული _ ნუნუ დუმბაძე და ვენერა სიხარულიძე.
მასწავლებლებით სოფელ ნაბეღლავის საარჩევნო უბანი გამოირჩევა. ცინცაძე ნანა, ფრანგიშვილი მარინე, ოსეფაიშვილი ნინო – საოლქოს მიერ არიან დანიშნულები და პედაგოგებად მუშაობენ.
პედაგოგი ნელი ტურაშვილი ამავე უბანზე “ერთიან ნაციონალურ მოძრაობას” წარმოადგენს, ხოლო პედაგოგი ნუნუ ჯინჭარაძე “ქრისტიან-დემოკრატიულ მოძრაობას”.
ქვაბღის სარჩევნო უბნის თავმჯდომარე ჯემალ ვაშაყმაძე პედაგოგია. ასევე პედაგოგია საქართველოს “ევროპელი დემოკრატების” წარმომადგენელი სოფიო ლომთათიძე, რომელიც კომისიის მდივანია. მგელაძე ნათელა, თოდრია მაია, ჯინჭარაძე ციალა, კალანდაძე მარინა _ ეს ადამიანებიც პედაგოგები არიან და ისინი ქვაბღის სარჩევნო უბანზე საოლქო კომისიამ დანიშნა.
ფარცხმის სკოლის დირექტორი, ელმირა ჯავახიშვილი ამავე სოფლის საუბნო კომისიის წევრია.
შუა ამაღლების საუბნო კომისიის თავმჯდომარის მოადგილე, გელა ყაჭეიშვილიც პედაგოგია. ამავე პროფესიისაა ბელეშაძე ირინე და რობაქიძე ზაირა. სამივე მათგანი საოლქოს მიერ არიან დანიშნულები.
“ნაციონალურ მოძრაობას” შუა ამაღლებაში მალხაზ წიქორია წარმოადგენს, რომელიც გამგეობის ზედამხედველობის სამსახურის სპეციალისტია და რომელიც ცოტა ხნის წინ, რედაქციაში ლამის შემოვარდა, ახსნა-განმარტება მოგვთხოვა ჩვენ მიერ დაწერილ სტატიებზე, მიზეზით რომ ის ნაციონალურ მოძრაობას წარმოადგენდა და გვითხრა, რომ ამ პარტიაზე და მათ წევრებზე სტატიის დაწერის უფლება, თურმე, მისგან უნდა აგვეღო.
ჩაისუბანში კომისიის თავმჯდომარე გუთურის საჯარო სკოლის დირექტორი, მზია ოსეფაიშვილია. ეს ის ოსეფაიშვილია, რომელიც ასევე სოცმუშაკია და ოპოზიციურად განწყობილი სოციალურად დაუცველი მოქალაქეების მიმართ გახორციელებული ზეწოლის გამო, “სამართლიანი არჩევნების” ანგარიშში მოხვდა.
ქვენობაში კომისიას საკრებულოს იურიდიულ საკითხთა კომისიის თავმჯდომარის, თამაზ ურიდიას მეუღლე, ქეთევან დოლიძე ხელმძღვანელობს, რომელიც სოფლის ექიმიცაა.
აღსანიშნავია ის ფაქტიც, რომ უმრავლეს უბანზე, მდივნებად “ქრისტიან დემოკრატიული სახალხო პარტიის”, “საქართველოს ევროპელი დემოკრატების” და “ქრისტიან-დემოკრატიული მოძრაობის” წევრები არიან არჩეულები. “ქრისტიან-დემოკრატიული სახალხო პარტია” ახალი შექმნილია და მისი ხელმძღვანელი მამუკა ხიმშიაშვილია. პარტია 2010 წლის 29 მარტს არის რეგისტრაციაში გატარებული. გადამოწმებისას გაირკვა, რომ ამ პარტიის წევრები, ყოფილი “ქრისტიან-დემოკრატები” არიან და ისინი გასულ არჩევნებზე გიორგი თარგამაძესთან იყვნენ. “საქართველოს ევროპელი დემოკრატების” ხელმძღვანელი პაატა დავითაიაა, ხოლო “ქრისტიან დემოკრატიული მოძრაობის” ლიდერი _ გიორგი თარგამაძე.
“ქართული ოცნების” წარმომადგენელი ჩოხატაურის საოლქო საარჩევნო კომისიაში შემავალ არცერთ უბანზე არც თავმჯდომარედ აურჩევიათ და არც მოადგილედ. მხოლოდ სამ სოფელში, კოალიციის წარმომადგენლები მდივნებად აირჩიეს. დაბლაციხეში, სადაც კომისიის თავმჯდომარე განათლების განყოფილების ყოფილი გამგეა, მდივანი “მრეწველობა გადაარჩენს საქართველოს” წარმომადგენელია, ამავე პარტიის წარმომადგენელია წიფნარის სარჩევნო უბნის მდივანი. ზემოხეთში კი მდივანი “საქართველოს კონსერვატიული პარტიიდანაა”.
კომისიებში, გარდა პედაგოგებისა და სკოლის დირექტორებისა, გვხვდებიან ხელისუფლების წარმომადგენლებიც, ზოგი _ პარტიიდან, ზოგიც _ საოლქო კომისიიდან.
