ამ ხნის განმავლობაში ინფორმაციის გამოქვეყნებისგან თავს მხოლოდ იმიტომ ვიკავებდით, რომ ხელისუფლებისა და სამართალდამცავი ორგანოებისგან ოფიციალურ კომენტარს ველოდებოდით.
წუხელ, გვიან ღამით, სოციალური ქსელით გავრცელდა ინფორმაცია იმის შესახებ, რომ სპეცოპერაციის დროს ლიკვიდირებული ე. წ. “ბოევიკები”, სინამდვილეში, პანკისის ხეობის მაცხოვრებლები იყვნენ.
“გურია ნიუსი” დაუკავშირდა ასევე საქართველოს ეროვნული უშიშროების საბჭოს აპარატის მედიასთან ურთიერთობის ხელმძღვანელს, ნინო იმედაშვილს, რომელმაც განაცხადა, რომ რამდენიმე წუთში შეგვეხმიანებოდა. დაახლოებით ნახევარი საათის შემდეგ ჩვენ თავად დავუკავშირდით უშიშროების საბჭოს.
_ ქალბატონო ნინო, “გურია ნიუსიდან” გაწუხებთ. ხომ ვერ გვიპასუხებდით იმ საკითხთან დაკავშირებით, რაზეც დაგირეკეთ? საუბარია გავრცელებულ ინფორმაციაზე, თითქოს ე. წ. “ბოევიკები”, რომლებიც საქართველო-რუსეთის საზღვარზე, ლოპოტას ხეობასთან იყვნენ ლიკვიდირებულები, სინამდვილეში პანკისის მცხოვრებლები არიან. ადგილობრივი მოსახლეობა აცხადებს, რომ გვამები ამოიცნეს.
_ თქვენ ესაუბრეთ შს სამინისტროს პრესსამსახურს ამ საკითხთან დაკავშირებით?
_ პირადად მე არ მისაუბრია, როცა ვურეკავდით, ტელეფონს არ პასუხობდა და შემდეგ, ჩვენი ჟურნალისტები ცდილობენ დაკავშირებას და შედეგი, ჯერჯერობით არ ვიცი. მაგრამ, ნებისმიერ შემთხვევაში, ამ საკითხთან დაკავშირებით, უშიშროების საბჭოს კომენტარიც გვაინტერესებს.
_ ხომ გითხარით, იმ დეტალებზე, რომელიც ეხება უშუალოდ ოპერაციას, ჩვენ არ ვაკეთებთ კომენტარებს, მაგრამ მე ვიცი, რომ შინაგან საქმეთა სამინისტროში გიპასუხებენ ამ თემაზე. მე ვესაუბრე შინაგან საქმეთა სამინისტროს და გიპასუხებენ. ჩვენ შეგვიძლია ვისაუბროთ ზოგადად საფრთხეების შესახებ, რა საფრთხეები შეიძლება მომდინარეობდეს. ეს იყო შინაგან საქმეთა სამინისტროს მიერ ჩატარებული ოპერაცია, ამიტომ მოსთხოვეთ მას პასუხი.
_ გასაგებია, ქალბატონო ნინო, მაგრამ სპეცოპარაციის შესახებ გიგა ბოკერიამაც გააკეთა კომენტარი და საკმაოდ ვრცელი, არა მხოლოდ საფრთხეებზე; მან თქვა, როგორ ჩააყენეს საქმის კურსში რუსეთის ფედერაცია საელჩოს დახმარებით აღნიშნულ სპეცოპერაციასთან დაკავშირებით. მე მგონი, ეს არის ის თემა, რაც უშიშროების საბჭოს ეხება.
_ ჰო, მე გითხარით უკვე ჩვენი პასუხი.
