ლუის ნავაროს ორგანიზაციის მიერ ჩატარებულ კვლევებს საქართველოში შვედეთის საერთაშორისო თანამშრომლობის და განვითარების სააგენტო (Sidა) და კავკასიის კვლევის რესურსების ცენტრი (CRRC) აფინანსებს.
რა პასუხი აქვს CRRC ხელმძღვანელობას ოპოზიციური პოლიტიკური სპექტრის ბრალდებებზე “გურია ნიუსი” ამასთან დაკავშირებით, “კავკასიის კვლევის რესურსების ცენტრის” დირექტორს კობა თურმანიძეს ესაუბრა.
_ ბატონო კობა, თქვენი ინსტიტუტის მიმართ საკმაოდ სერიოზული ბრალდებები ისმის თითქმის ყველა ოპოზიციური პარტიის მხრიდან, რომლებსაც რეიტინგებში დაბალი პროცენტული მაჩვენებელი აქვთ. ამბობენ, რომ კვლევას სწორედ ის პარტია გიკვეთავთ, ვინც რეიტინგებში მაღალი პროცენტული მაჩვენებელით გამოირჩევა.
_ (იცინის) ამაზე რა უნდა გითხრათ. ვინმეს რაღაც აბსურდული დავაბრალო? ან როგორ უნდა იმართლო თავი ამაზე? კომენტარის გაკეთებაც არ ღირს. ძალიან მარტივია იმის დასაბუთება, რომ CRRC არის ორგანიზაცია, რომელიც ატარებს ამ კვლევას და არ არის მიკერძოებული არცერთი პარტიის მიმართ. არცერთი ჩვენი საქმიანობა არ უკავშირდება არცერთ პარტიას, პოლიტიკურ ფიგურას. საიდან უნდა მოიტანოს ადამიანმა ეს ბრალდება, ჩემთვის გაუგებარია. მართლა არ ვიცი.
კიდევ ერთი სასაცილო რაღაცა, პირველად მოხდა რომ ვიღაცა (ამ შემთხვევაში “გურია ნიუსს” გულისხმობს. ავტ) დაინტერესდა, მართლა ვინ არის CRRC. აქამდე ისმის რაღაც მითები, თითქოს ეს იყოს მითიური ორგანიზაცია. გვაქვს ვებგვერდი, ვაქვეყნებთ რაღაცეებს. ჩვენს შესახებს ყველაფერი ცნობილია. აქამდე არავინ დაინტერესებულა ჩვენთან გასაუბრებით. თუნდაც ჩვენთან მოსვლით და შეხედვით, თუ რას ვაკეთებთ. ეს მე მაფიქრებინებს, რომ აქ ამოცანა და მიზანი ის კი არ არის, გაიგონ მართლა ვინ არის CRRC, არამედ ცუდის თქმით გაუკეთონ დისკრეტიდაცია კვლევის შედეგებს, რაც არ მგონია, სწორი მიდგომა იყოს.
_ თქვენი კვლევის შედეგები იგზავნება საერთაშორისო ორგანიზაციებში. ამ ინსტიტუტებს არ უჩნდებათ თქვენს მიმართ კითხვა, რატომ არ ენდობიან თქვენი კვლევის შედეგებს?
_ თუ გულისხმობთ დონორებს, ასეთი კითხვა არ უჩნდებათ, რადგან დონორებს აქვთ სხვა საშუალებები, შეამოწმონ ჩვენი სამუშაოს ხარისხი, მიკერძოებულობის დონე და გამჭირვალობის ხარისხი. ჩვენი ყველა პროექტის ყველა დონორი არის ღია, საჯარო და დევს ვებგვერდზე, რომელ კვლევას ვინ გვიკვეთავს.
ამ კვლევას გვიკვეთავს “ენდიაი” რომელსაც კვლევისთვის ფულს აძლევს შვედეთის საერთაშორისო განვითარების სააგენტო. ყველაფერი ცნობილია. ასევეა სხვა პროექტების მიმართაც. ამიტომ, ასეთი კითხვები: “მართლა მიკერძოებული ხომ არ ხართ?!” _ არც დასმულა ჩვენი დონორებისა და პარტნიორების მხრიდან. ეს ეჭვი ძირშივეა საფუძველს მოკლებული. არასდროს CRRC-ის არცერთი თანამშრომელი და არცერთი პროექტი არ ყოფილა ასოცირებული რომელიმე პოლიტიკურ ძალასთან, ან პოლიტიკოსთან. საიდან უნდა მოიტანონ ასეთი ბრალდება, ჩემთვის გაუგებარია.
_ ლევან თარხნიშვილი და “ნაციონალური მოძრაობის” საპარლამეტო სიის მე-4 ნომერი თინათინ ბოკუჩავა, თქვენი ორგანიზაციის თანამშრომლები იყვნენ…
_ ის ქალბატონო ადრე NDI-ში მუშაობდა. თარხნიშვილს რაც შეეხება, იყო CRRC ისეთივე დაქირავებული დირექტორი, როგორიც ვარ დღეს მე. ეს იყო 2004-2007 წლებში. 2007-დან მე გახლავართ დირექტორი. დამფუძნებელი გახლავთ ევრაზიის თანამშრომლობის ფონდი და ნიუ-იორკის კარნეგის კორპორაცია. არცერთი ქართველი არ ფიგურირებს CRRC-ის დამფუძნებლებში. ეს არის უცხოელების მიერ დაფუძნებული ორგანიზაცია, რომელსაც ჰყავს თავისი დაქირავებული შტატი. ამ შტატის ხელმძღვანელი 5 წლის წინ იყო ლევან თარხნიშვილი. იმის შემდეგ, ლევან თარხნიშვილს არ აქვს ურთიერთობა CRRC-თან, გარდა ნაცნობობისა და უბრალო კოლეგიალური ურთიერთობისა. ამიტომ, ეს არის საბაბი და არა მიზეზი, რომ ჩვენზე თქვან რაღაცა კრიტიკული.
