კანდიდატი სოფელში დაგვიანებით, სამსახურებრივი (გამგებლობის დროინდელი) ჯიპით გამოჩნდა. მას თან ახლდნენ ლანჩხუთის გამგეობისა და სხვადასხვა სახელმწიფო სამსახურების თანამშრომლები.
“გურია ნიუსის” კითხვაზე, რატომ დაყვებიან დეპუტატობის კანდიდატს საჯარო მოხელეები წინასაარჩევნო შეხვედრებზე, ლანჩხუთის საკრებულოს თავმჯდომარის მოვალეობის შემსრულებელმა ზვიად აფხაზავამ გვიპასუხა, რომ არასამუშაო დღეებში და სამუშაო დროის შემდეგ მათ ამის უფლებას კანონი არ ართმევს.
ერთ-ერთმა ადგილობრივმა სტუმრებს ახალგარემონტებულ სოფლის კლუბში შესთავაზა შეხვედრა. ყოფილმა გამგებელმა უარი თქვა ამ წინადადებაზე, იმ მოტივით, რომ კლუბი მუნიციპალური დაწესებულებაა და და იქ შეხვედრის გამართვა სახელმწიფო რესურსის გამოყენება იქნებოდა მისი მხრიდან. წინა ვიზიტის დროს გია გოგუაძეს სოფლის თავკაცებმა სწორედ ამ კლუბში მოუწყვეს შეხვედრა!
არც თუ მრავალრიცხოვან ამომრჩეველს მაჟორიტარობის კანდიდატმა მადლობა გადაუხადა მოსვლისთვის და ზოგადად ისაუბრა საკუთარი პარტიის სამომავლო გეგმებზე. მან შეხვედრა ამ სიტყვებით დაიწყო: “მე საოცრად დამუხტული ვარ გუშინდელი შეხვედრით. ქვეყანაში მოხდა უპრეცედენტო მოვლენა _ 500 ათასი ადამიანი ერთდროულად, თავისი ნებით მივიდა “ნაციონალური მოძრაობის” ყრილობაზე“. მას, რა თქმა უნდა, არაფერი უთქვამს იმაზე, როგორ გადაიყვანეს გამგეობის თანამშრომლებმა და მმართველი პარტიის აქტივისტებმა ოზურგეთში ყრილობაზე დასასწრებად, რამოდენიმე მიკროავტობუსით საჯარო მოსამსახურეები და კოორდინატორები. “გურია ნიუსს“ ისიც აცნობეს, რომ ოზურგეთში წაიყვანეს საარჩევნო კომისიის წევრები “ნაციონალური მოძრაობიდან”. ჩვენ შევეცადეთ ინფორმაციის გადამოწმებას, მაგრამ ნომერ მეორე საარჩევნო უბანი დაკეტილი დაგვხვდა.
შემდეგ, მან ისაუბრა საკუთარი პარტიის სამომავლო პრიორიტეტებზე, რაც წვეთი წყალივით ჰგავდა მთავრობის მაღალჩინოსანთა გამოსვლათა ტექსტებს. დეპუტატობის კანდიდატმა აღიარა, რომ მთავრობამ ვერ მოაგვარა დასაქმების პრობლემა, მაგრამ ამ აღიარების შერბილება სწრაფად მოახერხა და დაამატა, რომ შეიქმნა დასაქმების სამინისტრო, რომლის განყოფილება ლანჩხუთშიც არსებობს. უმუშევართა ბაზაში უკვე სამი ათასამდე ლანჩხუთელი ყოფილა დარეგისტრირებული. თუმცა, რეალურად დაუსაქმებელთა რიცხვი გაცილებით მეტია. გია გოგუაძე დაპირდა მოსახლეობას, რომ შეიქმნება გადამზადების კურსები, სადაც ადამიანები გადაკვალიფიცირდებიან და ახალ პროფესიებს შეიძენენ. მისი თქმით, პროფესიული კადრები დღეს მთელ ქვეყანაშიც და ლანჩხუთშიც დიდი პრობლემაა.
“ლანჩხუთში იწყება ახალი გზის მშენებლობა, ჩვენ კი სპეციალისტები არ გვყავს. ეს ახალგაზრდობის ინერტულობის ბრალიცაა. ისინი არ ცდილობენ ახალი პროფესიები შეისწავლონ. აქ მუშების მინიმალური ხელფასი 900 ლარი, ხოლო ოპერატორის 5000 ლარამდე იქნება,” _ დეპუტატობის კანდიდატის აზრით, ლანჩხუთელთა თითქმის 80 პროცენტი რომ უმუშევარია, ეს მათივე არაკვალიფიციურობისა და ინერტულობის ბრალი ყოფილა!?
ჩვენ ადრეც გვინახავს გოგუაძის შეხვედრები ამომრჩეველთან, როცა იგი გამგებლის რანგში დაყვებოდა სხვა კანდიდატებს. მაშინ იგი ურთიერთობაში მეტ სიხისტეს იჩენდა, ნაკლებად ელოლიავებოდა მოსახლეობას და არც დაპირებების გაცემით იწუხებდა თავს. დღეს კი, როცა თავად გახდა მაჟორიტარობის კანდიდატი, ტრანსფორმაცია განიცადა და საკუთარ ამომრჩეველს შედარებით დაუტკბა.
