სხდომა საკრებულოს თავმჯდომარის მოადგილემ, ავთანდილ მექვაბიშვილმა გახსნა. მან საკრებულოს წევრებს თავმჯდომარის არყოფნის მიზეზი განუმარტა _ მნიშვნელოვანი სტუმრები ჩამოვიდნენ და მათთან შეხვედრაზე წავიდაო.
სხდომაზე დღის წესრიგით გათვალისწინებული ოთხი საკითხი განიხილეს. ოზურგეთის მუნიციპალიტეტის 2012 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ” ისაუბრა ამირან გირკელიძემ. “ოზურგეთის მუნიციპალიტეტის საპრივატიზაციო ობიექტების ნუსხის დამტკიცების თაობაზე, ოზურგეთის მუნიციპალიტეტის საკუთრებაში არსებული ქონების სასყიდლიანი სარგებლობის ფორმით გადაცემისას, საწყისი წლიური ქირის ოდენობის დადგენის შესახებ”, თამაზ სალუქვაძე წარსდგა საკრებულოს წინაშე. ხოლო “ოზურგეთის მუნიციპალიტეტის არასამეწარმეო (არაკომერციული) იურიდიული პირის “სკოლამდელი სააღმზრდელო-საგანმანათლებლო ცენტრის მიერ გაწეული საქმიანობის ანგარიშის მოსმენისა და შეფასების შესახებ”, ასევე თამაზ სალუქვაძემ ისაუბრა.
მან განმარტა, რომ საქართველოს მთავრობის 2012 წლის 25 მაისის #972 განკარგულებით გამოყოფილი ტრანსფერით (1 500 5000 ლარი) გზების, კეთილმოწყობის სამუშაოების შესრულებაზე მიღებული ეკონომია _ 18 484,76 ლარი და საქართველოს პრეზიდენტის 2012 წლის 26 ივლისის # 26.07.03 განკარგულებით, სულ 27 594, 33 ლარი, გამოყენებული იქნეს ამავე სამუშაოების ექსპერტიზის ჩასატარებლად. სახელმწიფო შესყიდვების გეგმაში მუხლი, “უძრავ ქონებასთან დაკავშირებული მომსახურებები”, ღირებულებით 20 000 ლარი, რომელიც ითვალისწინებს კონჭკათის საბავშვო ბაღის შენობის შეძენა-შეკეთებას, შემცირდეს 11 500 ლარით და შეეცვალოს კლასიფიკატორის კოდი 454-ით. მუნიციპალიტეტის საკრებულოს საკანცელარიო საქონლის ხარჯის შემცირების საფუძველზე შეძენილი იქნეს 2 ერთეული მობილური ტელეფონი, სავარაუდო ღირებულება 420 ლარი, გათვალისწინებული იქნეს ინფრასტრუქტურის განვითარების სამსახურის მოთხოვნა და კარის საკეტის ნაცვლად, შეძენილი იქნეს ავტომანქანის სავარძლები (მეორადი), სავარაუდო ღირებულება 60 ლარი.
სხდომაზე მიღებული დადგენილებები შემდეგნაირად გამოიყურება:
“ოზურგეთის მუნიციპალიტეტის საკუთრებაში არსებული ქონების სასყიდლიანი სარგებლობის ფორმით გადაცემისას საწყისი წლიური ქირის ოდენობის დადგენის შესახებ”:
“ადგილობრივი თვითმმართველობის შესახებ” საქართველოს ორგანული კანონის 22-ე მუხლის პირველი პუნქტის “ქ” ქვეპუნქტის, 43-ე მუხლის მე-2 პუნქტის, “ადგილობრივი თვითმმართველი ერთეულის ქონების შესახებ” საქართველოს კანონის მე-19 მუხლის საფუძველზე, ოზურგეთის მუნიციპალიტეტის საკრებულომ დაადგინა, რომ მუნიციპალიტეტის საკუთრებაში არსებული არასასოფლო-სამეურნეო დანიშნულების მიწის, საქართველოს სამოქალაქო კოდექსით გათვალისწინებული სარგებლობის ფორმებით, სასყიდლით გადაცემისას, საწყისის წლიური ქირის ოდენობა:
არასასოფლო-სამეურნეო დანიშნულების მიწაზე:
ცენტრალურ ზონაში 1 კვ.მ-ზე 5, 9904 ლარი, შუალედურ ზონაში 1 კვ.მ-ზე 1, 9968 ლარი, პერიფერიულ ზონაში 1 კვ.მ-ზე 1, 7472, დაბა ურეკის სარეკრეაციო ზონაში 1კვ.მ-ზე 21, 9648 ლარი, მუნიციპალიტეტის დანარჩენ ტერიტორიაზე 1 კვ.მ-ზე 0, 5391 ლარი.
საკრებულოს სხდომაზე დაადგინეს ასევე, მუნიციპალიტეტის საკუთრებაში არსებული უძრავ-მოძრავი ქონების (გარდა მიწისა) საქართველოს სამოქალაქო კოდექსით გათვალისწინებული სარგებლობის ფორმებით სასყიდლით გადაცემისას საწყისი წლიური ქირის ოდენობა უძრავ-მოძრავი ქონების საბალანსო ნარჩენი ღირებულების 5%-ით, ანდა დამოუკიდებელი აუდიტორიის მიერ შეფასებული ქონების ღირებულების 5%-ით.
სხდომაზე ჩვეული აქტიურობით ოპოზიციონერი დეპუტატი ლელა ნაცვალაძე გამოირჩეოდა, რომელმაც ეჭვი შეიტანა დღის წესრიგით გათვალისწინებულ მეორე საკითხზე _ პრივატიზაციის ნუსხის დამტკიცების შესახებ, მან უნდობლობა გამოხატა აღნიშნული პრივატიზების შესახებ და განაცხადა, რომ ოზურგეთის მუნიციპალიტეტში ტენდენციად იქცა მსგავსი ფორმით პრივატიზება _ ვიღაც სუბიექტი ინტერესდება კონკრეტული ობიექტითა თუ შენობა-ნაგებობებით, სურვილი აქვს მისი შესყიდვის და სწორედ ამის შემდეგ “ხელშეწყობის” მიზნით დგება ესა თუ ის ობიექტი პრივატიზების ნუსხაში.
სხდომაზე საკამათო გახდა დღის წესრიგით გათვალისწინებული მე-4 საკითხი, სადაც აიპ “სკოლამდელი სააღმზრდელო ცენტრის” მიერ გაწეული საქმიანობის ანგარიშის მოსმენა. დეპუტატმა ლელა ნაცვალაძემ ანგარიშის დროს, მაკა ჭყონიას შეახსენა აღმზრდელებისთვის პოლიტიკური ნიშნით ხელშეკრულების შეწყვეტა, რაზეც ჭყონიამ უპასუხა, რომ წერილობით გასცა მას პასუხი და აღნიშნა, ხელმძღვანელს აქვს უფლება, ვისაც უნდა იმას გაუგრძელებს ხელშეკრულებასო.
ლელა ნაცვალაძისგან განსხვავებით, საკრებულოს რამდენიმე წევრმა მადლობა გადაუხადა ქალბატონ ჭყონიას და აიპ-ის მუშაობა დადებითად შეაფასა.
