როგორც გავარკვიეთ, "ნაციონალების" მხარდამჭერები საელჩოში იკრიბებიან. სწორედ იქ აქვთ გახსნილი შტაბები და იქ გაიცემა დავალებები, თუ როგორ უნდა იმუშაონ დარჩენილი დღეების განმავლობაში მმართველი პარტიის მომხრეებმა.
ათენში "ქართული ოცნებაც" აქტიურად მუშაობს და ცდილობს ემიგრანტთა ხმები დაიცვას. თუმცა, ემიგრანტებს ეეჭვებათ რომ ეს მოახერხონ. ისინი დარწმუნებულები არიან, რომ გასული არჩევნების მსგავსად მათი ხმების გაყალბება ისევ მოხდება.
როგორც ათენში მცხოვრებმა ქართველებმა გვითხრეს, მათ ორი არჩევანი აქვთ _ ან მიხეილ სააკაშვილი, ან ბიძინა ივანიშვილი.
აღსანიშნავია ისიც, რომ ქვეყნის გარეთ ივანიშვილის წინააღმდეგ შავი პიარკამპანია უკვე დაიწყეს. როგორც ათენში მცხოვრებმა ჩვენებურებმა გვითხრეს, ვრცელდება ხმები, რომ ივანიშვილის უკან რუსეთი დგას და პუტინი ომს აუცილებლად დაიწყებს:
_ გუშინ გაავრცელეს ხმები, რომ საქართველოში ომი აუცილებლად დაიწყება და რომ ივანიშვილი პუტინის დავალებას ასრულებს. ძალიან ბევრს სჯერა, რომ ივანიშვილი, რომელსაც ამდენი ქველმოქმედება აქვს გაკეთებული, დანაპირებს შეასრულებს და საქართველოში დაბრუნებას შევძლებთ, თუმცა, ისეთ ხმებს ავრცელებენ, აღარ ვიცით, რა ვიფიქროთ, _ ამბობს ერთ-ერთი რესპონდენტი.
მეორეს თქმით, საქართველოში საბჭოთა კავშირის ხანა იწყება და ამას მხარს არავითარ შემთხვევაში არ დაუჭერს: _ პუტინის გაბატონებას არ დავუჭერთ მხარს. მჯერა, რომ ყველა ქართველი ასე იზამს. გვეყო, რაც რუსეთმა იბატონა.
თუმცა, ივანიშვილის რუსეთის აგენტობა ბევრს არ სჯერა.
აღსანიშნავია, რომ საჯარო საუბარზე ბევრი არ გვთანხმდება. როგორც გავარკვიეთ, ამის მიზეზი მათი საქართველოში მყოფი ოჯახები არიან:
_ მამიდა მყავს პედაგოგი. დამირეკა _ შვილო, თუ ღმერთი გწამს აქციაზე არ გახვიდე და რაიმე ისეთი არ წამოგცდეს. ყველას დაგვტოვებენ ულუკმაპუროდო, _ ამბობს "გურია ნიუსთან" საუბრისას ერთ-ერთი რესპონდენტი.
იგივეს გვეუბნებიან დანარჩენები. ყველა ის ადამიანი, რომლის ოჯახის წევრი ან ახლო ნათესავი დასაქმებულია, დუმს, თუმცა პირად საუბრებში არ მალავენ, რომ ეს ყველაფერი შეურაცხმყოფელია:
_ სხვის მოსამსახურედ ვართ წამოსული ყოველგვარი დაცვის და დაზღვევის გარეშე. ჩვენს ხელისუფლებას ჩვენი ბედი არ ანაღვლებს. ამაზე მეტი შეურაცხყოფა რა უნდა იყოსო, ალბათ, იტყვით, მაგრამ დამიჯერეთ, ის უფრო მეტად შეურაცხმყოფელია, ხმის ამოღებას რომ გიკრძალავენ. იმის შიშით, რომ შენი ახლობელი მშიერი არ დარჩეს, შენი აზრი ვერ გამოგითქვამს, _ აღნიშნავენ "გურია ნიუსთან" საუბრისას ჩვენებურები.
თუმცა, რამდენიმე ათას ემიგრანტში ისეთებიც არიან, რომლებიც თავიანთ პოზიციაც ღიად აფიქსირებენ და არ მალავენ, თუ ვის და რატომ დაუჭერენ მხარს 1 ოქტომბრის არჩევნებში. არჩევნებში, რომელშიც მონაწილეობას ბევრი ემიგრანტი მხოლოდ იმის გამო ვერ მიიღებს, რომ ორშაბათი დღეა. ამას ისიც ემატება, რომ უმრავლესობას ჩაწერის საბუთი, რომელიც არჩევნებზე დარეგისტრირებისთვის არის საჭირო, არ გააჩნიათ. ემიგრანტები აღნიშნავენ, რომ ეს ყველაფერი მიზანმიმართულად კეთდება, რადგან ხელისუფლებამ კარგად იცის მათი პოზიცია და ისიც, რომ ემიგრანტების ხმები ხელისუფლებისთვის სასურველი ნამდვილად არ იქნება.
