ეს ჯგუფი ამ მოკლული ახალგაზრდა ბიჭების ხარჯზე ცდილობს, რომ რაღაცა პოლიტიკური დივიდენდები მიისაკუთროს. ეს არის მათი მორალური სახე და პრინციპები, თუკი ახალგაზრდა ადამიანების სიკვდილის შედეგად რამდენიმე ათეულ ხმას მოიპოვებენ.
ყველას გული ეტკინა იმით, რაც მოხდა _ ხეობასაც, გამგებელსაც, ერთ მხარესაც, მეორესაც. ერთადერთი, ვისაც ეს გაუხარდა, ეს პოლიტიკოსები არიან _ გამოდიოდნენ და ხელებს იქნევდნენ. მოკლედ, რაც ეს მოხდა, კაი ხასიათზე დადგნენ, ხან დროშებიან მანქანებს ჩაატარებენ, ხან საფლავებზე ადიან. მოკლედ გააქტიურდნენ,” _ ამ სიტყვებით დღეს პეტრე ცისკარიშვილმა საკუთარ ამომრჩეველს პანკისში მიმართა.
ცისკარიშვილი დუისში დაახლოებით 5 საათისთვის ჩავიდა. ამ დროისთვის ადგილზე შეკრებილები იყვნენ გამგეობის, საბავშვო ბაღის და სკოლების თანამშრომლები მეზობელი სოფლებიდან. პეტრე ცისკარიშვილმა მმართველი პარტიის საარჩევნო პროგრამის წარდგენის პარალელურად, ლაფანყურში ჩატარებულ სპეცოპერაციაზეც ისაუბრა და განაცხადა, რომ ხელისუფლებამ თავიდან აიცილა რუსეთის სპეცსამსახურების მიერ დაგეგმილი პროვოკაცია.
“მართალია, ჩვენთვისაც დიდი ტრაგედიაა და ჩვენც ვიზიარებთ ხეობის ტრაგედიას, მაგრამ აქ არის მეორე მომენტი _ სახელმწიფოებრივი მიდგომა. ჩვენ ვიდექით ძალიან დიდი საფრთხის წინ _ რუსეთის ჯარი შემოვიდოდა, დაიპყრობდა საქართველოს, განახორციელებდნენ იმ გეგმებს, რაც შემუშავებული ჰქონდათ. ნუ ამას გადაწევდნენ არჩევნების შემდეგ და იმ კოზირს, რაც მათ ამ ჯგუფის საზღვარზე გადასვლის შემდეგ ექნებოდათ, გაათამაშებდნენ, მაშინ როცა ამის სურვილი ექნებოდათ.
რუსეთს სურდა, აქედან გადასული შეიარაღებული ადამიანები მოენათლა, როგორც ტერორისტები, როგორც ბოევიკები. ეთქვათ, რომ საქართველოში არის ტერორიზმის საფრთხე, რომ პანკისი იყო ტერორიზმის ბუდე და სათავე. ვიდეოებზე ჩაეწერათ მათი აღიარებით ჩვენებები, რომ აი იქედან შემოგვიშვესო და ამის მერე, ის ჯოკერი, რაზეც გესაუბრებოდით, მათ უკვე ჯიბეში ედებოდათ. აი, ასეთი იყო საფრთხე, რომლის წინაშეც ვიდექით. ესეთი საფრთხეები წინასწარ უნდა იყოს აცილებული და მოხდეს მათი პრევენცია”, _ განაცხადა ცისკარიშვილმა პანკისელებთან შეხვედრაზე.
მისი განცხადებით, ხელისუფლებას შეიარაღებულ ჯგუფთან 8-საათიანი მოლაპარაკება ჰქონდა თუმცა, პროცესი ცუდი შედეგით დასრულდა.
“მიუხედავად იმისა, რომ იყო 8-საათიანი მოლაპარაკება, როდესაც შეიარაღებული ხალხთან გაქვს საქმე, უნდა მოხდეს განეიტრალება. აქ იყო სამი ვარიანტი: ან უნდა მომხდარიყო რუსეთის შემოჭრა, ან უნდა მომხდარიყო მათი განეიტრალება ანუ მათ მიერ იარაღის დაყრა ან კი ის უბედურება, რაც მოხდა, აქედან ერთ-ერთი ცუდი ვარიანტი”.
მმართველი პარტიის ახმეტის მაჟორიტარმა კანდიდატმა ვრცლად ისაუბრა რუსეთის პოლიტიკაზე საქართველოში, თქვა, რომ შევარდნაძე რუსეთის ყველა მითითებას ასრულებდა, რომ პატარკაციშვილი რუსეთის გამოგზავნილი კაცი იყო, რომ რუსეთის კაცია ივანიშვილიც და რომ ახლა ხალხის გადასაწყვეტია რას ავირჩევთ _ ბნელ წარსულში დაბრუნებას თუ ევროატლანტიკური კურსის გაგრძელებას.
“მათ არჩევნების გზით ხელისუფლებაში მოსვლის იმედი არ უნდა ჰქონდეთ, რადგან 2,5-3-ჯერ უკან არიან რეიტინგით ჩვენს პარტიასთან შედარებით. მათ რუსეთისგან დახმარება სჭირდებათ _ ფინანსური და ღმერთმა არ ქნას, სამხედრო ძალითაც. ამიტომ მათ საბაბი არ უნდა მივცეთ.
ეს ხალხი წარსულში ექაჩება ქვეყანას, ისევ კორუფციაში დაბრუნება სურთ. აბა კორუმპირებული ენერგეტიკის მინისტრი რომ გეყოლება, საქართველოში წარმოებულ ელექტროენერგიას რომ უცხოეთში გაყიდის, ჩვენ ხომ აღარ გვექნება ელექტროენერგია?
რა სინდისით გააქტიურდნენ და რა ნამუსით ჰგონიათ, რომ მოიგებენ არჩევნებს?” _ რიტორიკულად იკითხა ცისკარიშვილმა, რომელსაც არც “გაზულუქებული” ინტელიგენცია დავიწყებია: “გრეჩიხას მიტინგები რომ იყო, იმ დროიდან მოყოლებული სულ იმას გაიძახიან მომსახიობო-მოინტელიგენტო ელემენტები, ღირსება უნდა დავუბრუნოთ ხალხსო. რა ღირსება უნდა დაუბრუნონ? ეგენი ცხოვრობდნენ თბილისის ცენტრში, მათი შვილი წიგნს არ შლიდა და ისე აბარებდა უმაღლესში, ან 20-30 ათასს გადაუხდიდნენ და 4-5 წელიწადში წიგნის წაუკითხავად იღებდა დიპლომს. ეხლა ეგრე აღარ არის. ეხლა თუ ბავშვი ნიჭიერია, ომალოში იქნება, ალვანში თუ ხოდაშენში, ყველგან შეუძლია სწავლა. ადრე საავადმყოფოებში 2-3 გარემონტებული პალატა იყო და ეს ინტელიგენცია იქ მკურნალობდა პრივილეგირებულ პირობებში, ეხლა ჯანდაცვა ყველასთვის ხელმისაწვდომი გახდა და ეს არის მათთვის ღირსების ჩამორთმევა?” _ განაცხადა ცისკარიშვილმა პანკისელებთან შეხვედრისას.
კითხვების დასმის საშუალება ქისტებსაც მისცეს, თუმცა ხელისუფლება ლაფანყურის სპეცოპერაციის გამო ხმამაღლა არავის გაუკრიტიკებია. ერთ-ერთმა ადგილობრივმა საკმაოდ ვრცლად ისაუბრა მომხდარზე, მაგრამ როგორც მოგვიანებით განაცხადა, ისაუბრა ქისტურად, რათა ცისკარიშვილს მისი ნათქვამი ვერ გაეგო.
მექა ხანგოშვილის მამამ განაცხადა, რომ შეიარაღებულ ჯგუფში იყვნენ ადამიანები, რომლებმაც მოლაპარაკება ჩაშალეს და სწორედ მათი ბრალია მომხდარი. თუმცა, იქვე დასძინა, რომ კარგი იქნებოდა, თუ ხელისუფლება მოლაპარაკებაში ადგილობრივ უხუცესებს ჩართავდა.
