როგორც გაირკვა, ეს ხალხი ლანჩხუთის მუნიციპალიტეტის სოფელ ჩოჩხათიდან შუაღამისას იმიტომ ჩამოიყვანეს, რომ მათთვის არჩევნების წინ ოპერატიულად დაემზადებინათ აიდი ბარათები. მათი ორგანიზებულად ჩამოყვანა ჩოჩხათის რწმუნებულმა შოთა გრძელიძემ იკისრა.
დღეს ამ ფაქტთან დაკავშირებით, კოალიციის შტაბში პრესკონფერენცია გაიმართა. თემურ ჩხაიძის საარჩევნო შტაბის უფროსის გოგი გეგიაძის განცხადებით, ჩოჩხათიდან ხალხის ჩამოყვანა მოხდა არა მხოლოდ კერძო მიკროავტობუსით, არამედ მუნიციპალური ავტობუსით, რომელიც სუფსის საჯარო სკოლის მოსწავლეების გადაყვანას ემსახურება. გოგი გეგიაძე მიიჩნევს, რომ ეს არის წინასაარჩევნოდ ამომრჩევლის მოსყიდვა და ჩოჩხათის რწმუნებული, რომელიც ამ დანაშაულებრივი საქმიანობის თანამონაწილეა, უნდა დაისაჯოს.
კოალიციის შტაბში ჟურნალისტებისთვის წუხელ გადაღებული კადრების დემონსტრირებაც მოაწყვეს. ვიდეომასალაში კარგად ჩანს, როგორ აღიარებს ერთ-ერთი ჩამოყვანილი ხანში შესული ქალბატონი, რომ ჩოჩხათის რწმუნებულის შოთა გრძელიძის ორგანიზებით წამოიყვანეს ის და მისი მეზობლები ჩოჩხათელი ნიკა სივსივაძის კუთვნილი მიკროავტობუსით, ახალი პირადობის დამადასტურებელი ბარათების დასამზადებლად. ვინ იხდიდა ამ ბარათების დამზადების საფასურს, რესპონდენტმა არ იცოდა.
გოგი გეგიაძემ აღნიშნა, რომ ბოლო პერიოდში ხშირად ხდება სხვადასხვა სოფლების მაცხოვრებლებისთვის პირადობის მოწმობების ჩამორთმევის ფაქტები. “ნაციონალური მოძრაობის” კოორდინატორები, სხვადასხვა მიზეზით, ოპოზიციურად განწყობილ პირებს ართმევენ პირადობის მოწმობებს და შემდეგ მათი დაბრუნება აღარ ხდება. კოალიციის წევრების თქმით, ასეთი შემთხვევა მოხდა ნიგოითში _ “ქართული ოცნების” ოთხ მხარდამჭერს გამოართვეს პირადობის მოწმობები, რომლებიც დღემდე არ დაუბრუნებიათ მათთვის.
თემურ ჩხაიძის საარჩევნო შტაბის წევრმა სოსო ბოლქვაძემ განაცხადა, რომ იგი, წუხელ, ფაქტის დაფიქსირებისთანავე ტელეფონით დაუკავირდა საოლქო საარჩევნო კომისიის თავმჯდომარეს ზვიად ნაკაიძეს, მაგრამ იგი შემთხვევის ადგილზე არ მივიდა.
ჩვენ დავუკავშირდით ზვიად ნაკაიძეს, რომელიც სამსახურებრივი მივლინებით თბილისში იმყოფებოდა. მან სატელეფონო კომენტარს “გურია ნიუსთან” პირისპირ შეხვედრა ამჯობინა და გვთხოვა, რომ ხვალისთვის საოლქო საარჩევნო კომისიის ოფისში მივსულიყავით.
სამოქალაქო რეესტრის სამსახურის უფროსი სოფიკო სარჯველაძე “გურია ნიუსთან” აცხადებს, რომ მან არაფერი იცის ჩოჩხათიდან ორგანიზებულად ჩამოყვანილი ჯგუფის შესახებ.
_ თქვენ არაფერი იცით იმის შესახებ, რომ წუხელ თქვენი სამსახურის შენობასთან მიკროავტობუსებით მოყვანილი მოქალაქეებისთვის ახალი პირადობის მოწმობები მზადდებოდა?
_ ძალიან გთხოვთ რა! მუშაობაში გვეშლება ხელი. მე არ მაქვს ასეთი ინფორმაციის გაცემის უფლება. გთხოვთ იუსტიციის სამინისტროს პრესცენტრს მიმართოთ.
_ კი, მაგრამ დარწმუნებული ხართ, რომ ფაქტის შესახებ, რომელზეც თქვენ არაფერი იცით, იუსტიციის სამინისტროს პრესცენტრში აუცილებლად ეცოდინებათ?
_ ჩვენ ვმუშაობთ ურთულეს რეჟიმში, ხშირად მთელი ღამის განმავლობაში, რომ არჩევნებამდე ყველას დავუმზადოთ პირადობის მოწმობები და სხვა საჭირო დოკუმენტები. შენობის გარეთ რა ხდება, ამაზე პასუხისმგებლები ჩვენ არ ვართ.
_ არასამუშაო საათებში დოკუმენტების დამზადება, თქვენი აზრით ნორმალურია?
_ შეგიძლიათ ჰკითხოთ ჩვენს მეზობლებს და ისინი დაგიდასტურებენ, რომ ჩვენ, წლებია, ასეთ რეჟიმში ვმუშაობთ. სამსახურში ვიყავით, მოვიდნენ ადამიანები და მათ გავუწიეთ კონსულტაცია. ბარათები ჩვენ არ დაგვიმზადებია. მათი დამზადება, საერთოდ აქ არ ხდება.
_ ადასტურებთ ფაქტს, რომ ამ ხალხს ბარათების დამზადების საფასური არ გადაუხდიათ? ერთ-ერთი ქალბატონი ამბობდა, რომ ისინი სწორედ იმიტომ ჩამოიყვანეს, რომ მათთვის უფასო ბარათები დაერიგებინათ.
_ ბანკში საფასურის გადახდის გარეშე ვერც ერთი ბარათი ვერ დამზადდება, ამიტომ ჩვენ ვერც დავადასტურებთ და ვერც უარვყოფთ ამ ფაქტს. გუშინ მოვიდნენ კონსულტაციის მისაღებად. თუ განაცხადს შემოიტანენ და ბანკშიც გადაიხდიან საფასურს, ბარათები მხოლოდ იმ შემთხვევაში გადაეცემათ.
მიუხედავად იმისა, რომ სამოქალაქო რეესტრის სამსახურის უფროსი თავგამოდებით ამტკიცებდა, რომ ურთულეს რეჟიმში, დღე და ღამე მუშაობენ, ბევრი მოქალაქე ადასტურებს, რომ სამუშაო საათების დასრულებისთანავე აღნიშნული სამსახურის თანამშრომლები სიტყვიერი ინფორმაციის გაცემაზეც კი უარს აცხადებენ.
