ახალაიას საცხოვრებელი სახლის ქუჩასთან შეკრებილმა დაახლოებით 70-მდე ნაციონალური მოძრაობის მაისურიანმა ადამიამა, “ინფო9″ ჟურნალისტებს: ლევან წულაშვილს, პაატა ლაგვილავას, ირაკლი შამუგიას და ” მაესტროს” ჟურნალისტებს: ნანა ფაჟავას და სოსო ხოფერიას შეურაცხყოფა მიაყენეს.
“გურია ნიუსი” ზუგდიდში დაუკავშირდა ტელეკომპანია “ინფო9”-ის კორესპონდენტს, პაატა ლაგვილავას, რომელსაც, მისი განცხადებით, როლანდ ახალაია ხელით შეეხო და ჟურნალისტური საქმიანობის განხორციელებაში ხელი შეუშალა.
_ პაატა, რა მოხდა როლანდ ახალაიას სახლთან?
_ ბაჩო ახალაიას გადადგომის შესახებ ინფორმაციის გავრცელების შემდეგ, დაგვიკავშირდა კახა მიქაია და გვითხრა რომ, აპირებდა პრესკონფერენცია გაემართა როლანდ ახალაიას სახლთან. ჩვენ პრეს კოფერენციის გადასაღებად მივედით როლანდ ახალაიას სახლთან. ჩავწერეთ კახა მიქაია. იგი ამბობდა რომ, ახალაიას არ ჰქონდა არანაირი მორალური უფლება, ეყარა კენჭი ზუგდიდის მაჟორიტარობის კანდიდატად. მან თქვა რომ, არ არის საკმარისი ბაჩო ახალაიას გადაყენება. იგი უნდა დაისაჯოს. კახა მიქაია რომ წავიდა, “მაესტროს” ჟურნალისტი ნანა ფაჟავა, მე და სხვა ჟურნალისტები ახალაიას სახლის კადრებს ვიღებდით. იქვე ქუჩის თავთან შეკრებილები იყვნენ ახალაიას მეზობლები, დაახლოებით 15-მდე ადამიანი.
ახალაიას სახლში შუქი იყო ჩამქრალი. მერე აინთო შუქი. დავინახეთ ლანდი, რომ ტელეფონით ვიღაც გამოჩნდა. ეტყობა, ვიღაცამ ვიღაცეებს დაურეკა. აბსოლუტურად ყველა მეზობელი გამოვიდა და ჩვენსკენ წამოვიდნენ.
_ წამოდით აქეთ, იქნებ ჩვენთან გაქვთ შეკითხვები, იმათთან რა გინდათო.
ხმა არ გაგვიცია, რადგან ვხედავდით რომ პროვოკაციას ჰქონდა ადგილი. ეს ხალხი ჩვენსკენ წამოვიდა. გვიყვიროდნენ – წადით! აქ, თქვენ, გადაღების უფლება არ გაქვთ!.
ჩვენ ავუხსენით, რომ ეს იყო საჯარო ადგილი – ქუჩა და არავის კერძო საკუთრებაში არ ვყოფილვართ. ამის შემდეგ, სახლიდან მეუღლესთან ერთად გამოდის როლანდ ახალაია. იგი მიუახლოვდა იქ შეკრებილ ხალხს, რომლებიც ჩვენი მისამართით სკანდირებდნენ.
_ რას სკანდირებდნენ?
_ გვეუბნებოდნენ, თქვენ არ გაქვთ აქ ყოფნის უფლება, რა გინდათ ამ ადამიანებთან, ესენი არიან მართლები. ამ ხალხს ბევრი რამე აქვს ქვეყნისთვის გაკეთებულიო.
_ ამ დროს სად იყო როლანდ ახალაია?
_ ამ დროს გამოვიდა ბატონი როლანდი. ამ გვარის მიმართ საზოგადოებაში საკმაოდ დიდი ინტერესია და როგორც ჟურნალისტი, მივედი მასთან და ვკითხე: “ბატონო როლანდ, როგორ აფასებთ ამ ყველაფერს, რაც ბოლო დროს საქართველოში ხდება?
_ რა იყო პასუხი?
_ მან მითხრა: ” შენ ბიჭო რას ბედავ! თავი დამანებე! იგი მეჯაჯგურა და ხელი მკრა.
_ ანუ, როლანდ ახალაია ხელით შეგეხოთ?
_ დიახ. როლან ახალაია შემეხო ხელით.
_ ამის ამსახველი კადრები არსებობს?
_ იქ იღებდა “მაესტროს” და “ინფო9” ორი გადამღები ჯგუფი. რა არის გადაღებული, არ ვიცი, რადგან ოპერატორებს უმტვრევდა კამერებს. არა აძლევდნენ მუშაობის საშუალებას და ართმევდნენ კამერებს. იქ დაახლოებით 70-მდე იყო შეკრებილი.
_ იცნობთ ამ ადამიანებს?
_ რამდენიმე მათგანი ახალაიას მეზობელი იყო, დანარჩენს კი “ნაციონალური მოძრაობის” მაისური ეცვათ.
მინდა აღვნიშნო, რომ იქ გამოიარა პოლიციამ. ჟურნალისტებმა მივმართეთ თხოვნით, რომ ჟურნალისტურ საქმიანობაში გვიშლიდნენ ხელს, მაგრამ მათ არანაირი რეაგირება არ ჰქონიათ. არც კი გაუჩერებიათ მანქანა, სწრაფად გაიარეს, უბრალოდ იმიტომ შეჩერდნენ, გაერკვიათ ხალხი რატომ იყო შეკრებილი.
_ კიდევ არის რომელიმე ჟურნალისტი დაშავებული?
_ ნანა ფაჟავა არის დაშავებული. ქალებმა მიაყენეს მას შეურაცხყოფა. ნაცემია ჩვენი ოპერატორი, მაესტროს ოპერატორი.
_ აპირებთ სამართალდამცავ ორგანოებს მიმართოთ?
_ ჩემს ხელმძღვანელობასთან გავივლი კოსულტაციებს, მაგრამ ვფიქრობ, რომ საჩივარს შევიტან.
გთავაზობთ ვიდეოკადრებს, რომელიც საინფორმაციო სააგენტო livepress-მა გაავრცელა
