“ბათუმის ციხეში ცემა ჩვეულებრივი მოვლენა იყო”

რა მდგომარეობაა ბათუმის ციხეში და შეიცვალა თუ არა ვითარება საპატიმროში, ამის შესახებ “გურია ნიუსი” პარმენ ჯალაღონიას ესაუბრა.

_ ბატონო პარმენ, რა მდგომარეობაა ბათუმის ციხეში?

_ ყველა პატიმარი გვიდასტურებს, რომ ბოლო დღეების განმავლობაში მათ მიმართ ფიზიკურ ზეწოლის ფაქტებს ადგილი არ ჰქონია. თუმცა, იმ კადრებამდე, რაც ტელევიზიით გავრცელდა, ეს იყო ჩვეულებრივი მოვლენა.

_ ანუ ბათუმის ციხეშიც იყო ცემის ფაქტები?

_ რა თქმა უნდა. ქალაქ ბათუმის #3 საპყრობილეში ცემა იყო ჩვეულებრივი მოვლენა და ამას, პრინციპში, ყველა პატიმარი გვიდასტურებს.

_ პირობებთან დაკავშირებით რა მდგომარეობაა? კვება, საწოლები და ა.შ.

_ რაც შეეხება საწოლებს, თითქმის ყველა საკანში თავისუფალი საწოლები არის. ანუ ამ კუთხით ციხე გადატვირთული არ არის, მაგრამ რაც შეეხება ლეიბებს და ზოგადად მდგომარეობას შიგნით საკანში, არის პრინციპში აუტანელი. ჩვენი კანონმდებლობით და საერთაშორისო კანონმდებლობით ყველა დადგენილი ნორმა, რომელიც აწესებს პატიმრებისა და საპატიმრო ადგილებში ცხოვრების სტანდარტებსა და წესებს, არის დარღვეული. ეს არ არის ახალი და ყველამ იცის, რომ ქალაქ ბათუმის #3 საპყრობილე უნდა დაინგრეს ან ეს ადამიანები, რომლებიც იქ არიან მოთავსებულები, რაც შეიძლება ჩქარა უნდა იქნენ გადაყვანილი სხვა სასჯელაღსრულების დაწესებულებებში.

_ ამბობენ, რომ ბათუმის ციხეში საკმაოდ ბევრი პატიმარი დაავადდა. თქვენ რა ინფორმაცია გაქვთ?

_ ჩვენ ამ ერთი ვიზიტის ფარგლებში, სიმართლე გითხრათ, ამდენზე საუბარი ვერ მოვახერხეთ დროის გამო. ჩვენ შევედით გუშინ სადღაც 18:30-ზე და დილის 5-ის ნახევრამდე ვიმყოფებოდით იქ, თუმცა, ერთ-ერთი პატიმარი ამბობდა, რომ მას აქვს გადატანილი ტუბერკულოზი. ამ წუთისთვის გადამდები არ არის, მაგრამ იმუნიტეტის დასუსტების გამო, რაც, ზოგადად, საპატიმროებში არსებობს, ყველა პატიმარს შეიძლება თავისუფლად განუვითარდეს ისევ გადამდები ფორმა და დაავადდეს სხვა ის ადამიანი, რომელიც მის საკანში იმყოფება. ჩვენ ჯანმრთელობის საკითხებზე, სამწუხაროდ, ვერ ვისაუბრეთ. ჩვენი ვიზიტის მიზანი იყო ცემის და წამების ფაქტებს კიდევ ჰქონდა ადგილი თუ არა. როგორც დაგვიდასტურეს პატიმრებმა, ამ დროისთვის მათზე ფიზიკური ზეწოლა არ ხორციელდება.

_ ოჯახის წევრებმა თუ მოახერხეს პატიმრების ნახვა?

_ ძალიან ბევრი პატიმარი ამბობს, რომ არ უნახავს ოჯახის წევრები, ნაწილმა კი მოახერხა. კიდევ ერთხელ მოვუწოდებ _ ვისაც სურვილი აქვს, ნახოს საკუთარი პატიმრები, ამ დღეებში ვფიქრობ, ამის საშუალება მიეცემათ.

_ რამდენი პატიმარი იხდის სასჯელს ბათუმის საპყრობილეში?

_ ზუსტი ციფრი არ შემიძლია გითხრათ, თუმცა, დაახლოებით, 500-მდე მსჯავრდებული იხდის სასჯელს ბათუმის მე-3 საპყრობილეში.

_ ბათუმის ციხეში დირექტორი შეიცვალა?

_ ბათუმის #3 საპყრობილეს ახალი დირექტორი ჰყავს.

_ საპატრულო პოლიცია თუ შევიდა ციხეში?

_ კი. როგორც პირველ, ასევე, მეორე სართულზე ჩვენ ვნახეთ პატრულის თანამშრომლები.