მაღალმთიანი სოფელი სასწრაფოდ დახმარებას ითხოვს

14 თებერვლის დილით კი ისევ არ იყო ელექტროენერგია და ისევ გაუწმენდავი იყო გზები. “გურია ნიუსმა” ჯერ კიდევ 13 თებერვალს მიიღო შეტყობინება, რომ ჩოხატაურის მუნიციპალიტეტის სოფელი ზემო სურები რაიონს მოწყვეტილია და სასწრაფო დახმარებას საჭიროებდა.
_ არც შუქია, არც გზა. საკვები პროდუქტები ვერ ამოვიტანეთ რაიონიდან. ჩოხატაურში მხოლოდ ერთ დღეს, კვირას იმართება ბაზრობა და ყველა ჩვენთაგანს კვირიდან კვირამდე გააქვს თავი. დღეს კი ტრანსპორტი ვერ წამოვიდა დიდთოვლობის გამო. არ ვიცით, რა უნდა ვქნათ, ბავშვები რითი უნდა გამოვიკვებოთ. როგორც ჩანს, ჩვენი ამბავი არავის არ აინტერესებს და სურები რუკიდან საერთოდ გაქრა, _ გვითხრეს სატელეფონო საუბარში სურებლებმა.
მიუხედავად იმისა, რომ საქმის კურსში ჩოხატაურის გამგებელი გია გიორგაძე შემოსული ზარიდან რამდენიმე წუთში ჩავაყენეთ, სურებლების პრობლემის მოსაგვარებლად თავი არავის შეუწუხებია. 14 თებერვალს, დღის მეორე ნახევარში, ჩოხატაური-სურების გზის ძირითადი მონაკვეთი ისევ გაუწმენდავია და სურებლები ისევ მოწყვეტილი არიან რაიონულ ცენტრს.
ჩოხატაურის მუნიციპალიტეტის გამგებლის, გია გიორგაძის თქმით, ტექნიკა სურების გზის გაწმენდაზე მუშაობს:
_ სულ ოთხი ტრაქტორი გვყავს, აქედან ორი სურების გზის გაწმენდაზე მუშაობს. ძალიან დიდი თოვლია და ვერ ვერევით, _ გვითხრა გიორგაძემ.
ამ საუბრიდან ათიოდე წუთში სოფელ შუაგანხალების გზაზე, რომელიც დღის პირველ ნახევარში პარალიზებული იყო და ამის შესახებ გამგებელს ვაცნობეთ,  ერთმანეთის მიყოლებით ორი ტრაქტორი გამოჩნდა. ტრაქტორებს უკან გამგებელი და საკრებულოს თავმჯდომარე, ცოტა მოშორებით კი მხარის გუბერნატორი მოჰყვებოდნენ.  როგორც გავარკვიეთ, მხარის პირველი პირი გზების მდგომარეობას ამოწმებდა.
_ ბატონო გია, ამ გზას ორი ტრაქტორი წმენდს, ზემოსურებლები კი საკვები პროდუქტების გარეშე არიან დარჩენილნი.
_ ორი ტრაქტორი გვყავს გაშვებული, _ კიდევ ერთხელ დააზუსტა ინფორმაცია გიორგაძემ.
თუმცა, გიორგაძის მიერ ზემოსურების გზის გასაწმენდად გაშვებული ტრაქტორი ამ საუბრიდან ზუსტად 4 წუთში, ჩოხატაურის ცენტრში დავაფიქსირეთ.
_ ვიცი, რომ გზის პრობლემა არის. ამიტომ, ოზურგეთიდან უკვე გამოსულია ავტომანქანა “ურალი”, რომელზეც ტრაქტორს დასვამენ და სურებში აიყვანენ. რამდენადაც ვიცი, სურებიდან ჩოხატაურისკენ მომავალ გზას წმენდენ. მინდა, რომ ჩოხატაურიდან ასასვლელი გზაც გაიწმინდოს. მე პირადად გავყვები ტრაქტორს უკან და სურებში თავად ავალ სიტუაციის გადასაკონტროლებლად, _ გვითხრა მხარის გუბერნატორმა ვალერი ჩიტაიშვილმა.
დიდთოვლობის გამო რაიონს მოწყვეტილია ზოტის და ჩხაკაურის მოსახლეობა. ჩხაკაურაში უკვე მეორეჯერ ჩამოწვა მეწყერი. შპს “გზამშენი 18”-ის გენერალური დირექტორის თემურ ჯახვას ინფორმაციით, აღნიშნული სოფლების ცენტრალური გზები 14 თებერვალს, დღის ბოლომდე გაიწმინდება:
_ ძალიან რთული და საშიში რელიეფია, ყოველ წუთს მოსალოდნელია მეწყერის ჩამოწოლა. ყველანაირად ვცდილობთ, რომ დღის ბოლომდე გზის პრობლემები აღმოიფხვრას, _ აღნიშნა ჯახვამ.
14 თებერვალს, საღამოს, ელექტროენერგია მხოლოდ დაბა ჩოხატაურს და რამდენიმე ახლომდებარე სოფელს მიეწოდება. მოსახლეობის უმრავლესობა ელექტროენერგიის გარეშეა დარჩენილი. “ენერგო პრო ჯორჯიას” ჩოხატაურის სერვისცენტრში ვერ გვპასუხობენ როდის აღუდგება მთელს ჩოხატაურს ელექტროენერგიის მიწოდება.
ჩოხატაურში ამ წუთებშიც თოვს და როგორც სინოპტიკოსები ამბობენ, თოვა პარასკევამდე გაგრძელდება.