ასოციაციის განცხადებით, ისინი “ერთეულ ქმედებებს ეიფორიაში მყოფი ოცნების აქტივისტების ვოლუნტარისტულ ქმედებებად მიიჩნევდნენ, რაც დროთა განმავლობაში გაივლიდა”, თუმცა მათი “მოლოდინი არ გამართლდა”. “თვითმმართველობის ეროვნული ასოციაცია, რომელიც წარმოადგენს საქართველოს ყველა მუნიციპალიტატისა და თვითმმართველი ქალაქის ეროვნულ ხმას, მოთმინებას იჩენდა ასეთი ფაქტების მიმართ. მივიჩნევდით, რომ ეს იყო გამარჯვებული კოალიციის აქტივისტების ვოლუნტარული ქმედება, რომელიც გამარჯვების ეფიორიასთან ერთად გადაივლიდა. ჩვენი მოლოდინის საპირისპიროდ, მოხდა კიდევ უფრო მძიმე ფაქტი: 2012 წლის 5 ოქტომბერს, დაახლოებით 4 საათსა და 50 წუთზე. მარნეულის მუნიციპალიტეტის ადმინისტრაციულ შენობაში კოალიცია “ქართული ოცნების” ადგილობრივმა მხარდამჭერებმა მუნიციპალიტეტის ხელმძღვანელობას მოსთხოვა, დაეცალათ საკუთარი კაბინეტები და მათთვის გადაებარებინათ ძალაუფლება. ამ მუქარას მოყვა მუნიციპალიტეტის გამგებლისა და სხვა პირების ფიზიკური შეურაცხყოფა, რის შედეგადაც მუნიციპალიტეტის გამგებელი და ერთი თანამშრომელი მძიმე დაზიანებებით მუნიციპალურ საავადმყოფოში იქნენ გადაყვანილნი.
ჩვენმა ასოციაციამ ამ ინციდენტის შესახებ ინფორმაცია მიიღო 5 საათისთვის, ჩვენ შევხვდით როგორც მუნიციპალიტეტის თანამშრომლებს, ასევე საავადმყოფოში მოვინახულეთ დაშავებული გამგებელი. მათ დაგვიდასტურეს კოალიცია “ქართული ოცნების” წევრების შემოჭრა მუნიციპალიტეტის ადმინისტრაციულ შენობაში და მათი არაკონსტიტუციური მოთხოვნა საქმიანობის შეწყვეტის შესახებ. მოგვიანებით იგივე ფაქტი დაადასტურა მაღალი ავტორიტეტის მქონე სამმა ქართულმა არასამთავრობო ორგანიზაციამ: “ახალგაზრდა იურისტთა ასოციაცია”, “საერთაშორისო გამჭვირვალობა საქართველო” და “სამართლიანი არჩევნებისა და დემოკრატიის საერთაშორისო საზოგადოება”, _ ნათქვამია განცხადებაში.
ასოციაცია კოალიცია “ქართული ოცნების” წევრების ქმედებას განიხილავს, როგორც ადგილობრივი ხელისუფლების მიტაცების ანტიკონსტიტუციურ ქმედებას, რაც დასჯადია საქართველოს კანონმდებლობით. ისინი მიიჩნევენ, რომ ამ ქმედებებმა სისტემატური სახე მიიღო და ცენტრალურ ხელისუფლებას რეაგირებისკენ მოუწოდებენ: “ჩვენ მოვუწოდებთ საქართველოს ცენტრალურ ხელისუფლებას, არ დაუშვას მსგავსი ანტიკონსტიტუციური აქტის განმეორების შესაძლებლობა. ასევე მოგმართავთ თქვენ, მაღალი მანდატით
აღჭურვილ საერთაშორისო ორგანიზებისა და დიპლომატიური მისიების წარმომადგენლებს რათა მოუწოდოთ კოალიცია “ქართულ ოცნებას” და მათ მხარდამჭერებს პატივი სცენ
ადგილობრივი თვითმმართველობის ორგანოების კონსტიტუციურ უფლებებსა და გარანტიებს. დარწმუნებული ვართ თვენი მკაფიო პოზიცია თავიდან აგვაცილებს შემდგომ ექსცესებს”, _ ნათქვამია განცხადებაში, რომელსაც ადგილობრივ თვითმმართველობათა ასოციაცია ავრცელებს.
აღსანიშნავია, რომ ამ ასოციაციას არასოდეს გაუპროტესტებია სწორედ თვითმმართველობათა წარმომადგენლების მხრიდან გახორციელებული ათობით ძალადობრივი ქმედება “ქართული ოცნების” აქტივისტების მიმართ _ ეს ქმედებები არ გამოძიებულა და არც არავინ დასჯილა.
