“ქართული ოცნების” “მექანიკური შეცდომები” ანუ რატომ წააგო ალასანიამ

დღეს, ზუგდიდის სასამართლოში “ქართული ოცნების” წარმომადგენლებმა სარჩელი შეიტანეს და #67 ზუგდიდის საარჩევნო ოლქის გადაწყვეტილებას აპროტესტებენ.

“ქართული ოცნების” წარმომადგენლებმა ოლქში, პირველი საჩივარი 3 ოქტომბერს შეტანეს, რომლითაც 60-მდე უბნის ბათილობას ითხოვდნენ. 4 ოქტომბერს კი ყველა უბნის ბათილობის საკითხი დააყენეს, რომელიც უსაფუძვლობის გამო არ დაკმაყოფილდა.

1 ოქტომბერს, ზუგდიდის საარჩევნო ოლქში, “ქართული ოცნების” წარმომადგენლების მხრიდან ერთი საჩივარიც არ შესულა. 109 უბნის ოქმიდან მხოლოდ სამს ერთვოდა შესწორება. უფრო მეტიც, “გურია ნიუსის” მიერ დაფიქსირებულ გადასწორებულ ოქმს, მათ თავმჯდომარის “მექანიკური შეცდომა” უწოდეს. საუბარია ოქმზე, რომელშიც 15 ხმის ნაცვლად, 315 ხმა არის დაფიქსირებული როლანდ ახალაიას სასარგებლოდ.

როგორც #67 ზუგდიდის საარჩევნო ოლქის თავმჯდომარე, ნანა ოყუჯავა “გურია ნიუსთან” აცხადებს: “3 და 4 ოქტომბერს შეტანილ საჩივრებში, “ქართულ ოცნებას” არგუმენტად მოყვანილი ჰქონდათ ვიდეო მასალა. ჩვენი კომპეტენციის ფარგლებში არ შედის ვიდეომასალების მოკვლევა, ამას შესაბამისი ორგანოები ადგენენ. ჩვენ გამომძიებლები არ ვართ. ჩვენი პრიორიტეტი არის ოქმები” – განაცხადა ოყუჯავამ.

ბლოკ “ბიძინა ივანიშვილი – ქართული ოცნების” წარმომადგენლები #67 ოლქში ნუგზარ სარია და ემზარ კაკულია იყვნენ.

ნუგზარ სარია “გურია ნიუსთან” საუბარში არც უარყოფს, რომ მისმა წარმომადგენლებმა ვერ დააფიქსირეს დარღვევები.

_ ბატონო ნუგზარ, არჩევნების დღეს, “გურია ნიუსიც” იმყოფებოდა #67 ოლქზე. მიუხედავად იმისა, რომ ბევრ უბანზე იყო პრობლემა, არჩევნების დღეს, საოლქოში, არც თქვენ და არც ემზარ კაკულიას რამე სახის პროტესტი არ გამოგიხატავთ.

_ რამდენიმე საჩივარი შევიდა უბანში. ეს არ იყო ის რაოდენობა. სამწუხაროდ, მათ ვერ დააფიქსირეს ყველა დარღვევა, მაგრამ რადენიმე ათეული საჩივარი დაფიქსირდა უბანზე. სამწუხაროდ, არცერთი არ დაკმაყოფილდა.. ზუსტი რაოდენობა არ ვიცი, მაგრამ ეს ერთვოდა იმ საჩივარს, რა საჩივრებიც შეტანილი იყო უბნებში. Mსაწუხაროდ, შედეგი იყო ის, რომ კომისიამ არ იმსჯელა და არაფერი რეაგირება ამ დარღვევებზე არ მოახდინა. Aამიტომაც ვითხოვდით იმ საჩივარში, რომ ვინაიდან დარღვევები ეხებოდა თითქმის 50-ზე მეტ უბანს, ოლქში მომხდარიყო კენჭისყრის შედეგების გაბათილება.

_ ოლქში წარმოდგენილი 109 უბნის ოქმიდან, მხოლოდ სამი უბნის ოქმს ერთვის შესწორება. “გურია ნიუსმა” თქვენ და ბატონ ემზარ კაკულიას გკითხათ #65 უბნის ოქმთან დაკავშირებით, სადაც გადასწორებული იყო ციფრი. თქვენ გვიპასუხეთ, რომ ამის შესახებ იცოდით და თქვენმა წარმომადგენელმა კონკრეტრულ უბანზე თქვა, რომ ეს იყო თავმჯდომარის მექანიკური შეცდომა. “ამ მექანიკური შეცდომის” შედეგად, 15 ხმა გახდა 315 როლანდ ახალაიას სასარგებლოდ. რატომ არ დააყენეთ იმავე დღეს უბნის გაუქმების საკითხი?

_ სამწუხაროდ, უბნის წარმომადგენლებმა ვერ მოახერხეს… შემდეგ, როცა საჩივარი დგებოდა, სწორედ ეს საკითხი გადასწორება, შესწორებები… გადასწორებული რომ იყო ეს ფაქტი, რომელიც თქვენ აღნიშნეთ, სწორედ ამის გამო დადგა მოთხოვნა ჩვენი მხრიდან, რომ ეს ოქმები ბათილად ცნობილიყო.

_ თქვენ საუბრობთ უკვე 3 ოქტომბერზე. არჩევნების დღეს, როცა ეს ოქმი შემოვიდა ოლქში, თქვენი კომისიის წევრებს არ ჰქონდათ კონკრეტულ დარღვევასთან დაკავშირებით საჩივარი.

_ ხო, მაგრამ, ჩვენ შემდეგ გამოვასწორეთ, მათი რა ვთქვა, უყურადღებობა თუ რაც იყო, არაკომპეტენტურობა. ჩვენ დავაყენეთ საოლქოში ეს მოთხოვნა, ამის უფლება გვქონდა, მაგრამ საწუხაროდ კომისიამ არ მიიღო. მათი დასაბუთება იყო არასამართლებრივი. კი, ეს შესწორება არის, მაგრამ ამას შედეგებზე გავლენა არ მოუხდენია. რა ვიცი, შედეგებზე რა გავლენა მოახდინა, ხომ?! ანუ თვითონ გადასწორების ფაქტი, კანონის მიერ აღიარებულია, როგორც აკრძალული ქმედება. კანონში კატეგორიულად წერია: აკრძალულია ქმედება, რაც უკავშირდება შემაჯამებელ ოქმში შესწორებების შეტანას. ნუთუ, ეს არ არის საკმარისი, მიიღო გადაწყვეტილება ბათილობაზე?! ე.ი. ადმინისტრაციული აქტი, რომელშიც ცვლილება, შესწორება შედის, ითვლება ბათილად. მიუხედავად ამ არგუმენტებისა, მათ არ მიიჩნიეს ეს მყარად და შესწორება შეიტანეს. ბათილ ოქმში შეიტანეს შესწორება. ე.ი. აბსურდია ეს ყველაფერი. რა ვქნათ, კომისიამ ასე იმსჯელა. ჩვენ ვერაფერს გავაწყობდით. ისინი 11 არიან სამწუხაროდ.

_ თვლით თუ არა, რომ ეს ყველაფერი მოხდა თქვენი კომისიის წევრების გამო, რომლებმაც უბნებში, ადგილზე არ დაწერეს დარღევებზე საჩივარი?

_ ხო, წარმომადგენელი შემაჯამებელი პროცედურის დროს… დაწერას აზრი არ ჰქონდა. საჩივარები მაინც იხილება საოლქოში, ანუ უბანზე ეს პროცედურა არ იხილება უკვე. ყუთის გახსნიდან შემაჯამებელი ოქმის შედგენამდე, დარღვევებზე პროცედურებზე საჩივრები იხილება მხოლოდ საოლქოში. ამიტომაც, თავი აარიდეს ეტყობა, საოლქოში ჩვენს იმედად იყვნენ. მე ასე მგონია. ანუ იქაც აზრი არ ჰქონდა საჩივრის დაფიქსირებას, უბანზე ვერ განიხილებოდა ეს საჩივრები.

_ ბატონო ნუგზარ, ოლქში არც თქვენ და არც ბატონ ემზარს, არ დაგიფიქსირებიათ რაიმე სახის პრეტენზია. თუ ასეთი დარღვევებით იყო, რატომ არ დაიცვა ირაკლი ალასანიამ 1 ოქტომბრის საღამოს საკუთარი ხმები, რომლის გაყალბებაზე არის ახლა საუბარი? ოლქში, იმავე საღამოს მოვიდა ქალბატონი ხათუნა ხოფერია, რომელსაც ასევე არაფერი უთქვამს დარღვევებზე.

_ ფაქტიურად, ჩვენ ველოდებოდით, შეჯამება ტარდებოდა ღამის 2-3 საათამდე. მე და ემზარი, მთელი დღე ვიყავით საოლქოში. ორში შემოდიოდა ოქმები. შემდეგ მოხდა შემოსული მასალების ანალიზი. ორში, მთელი ღამე იქ ვიყავით, ჩვენ ეს მასალები არ ვიცოდით. შემდეგ, იმავე დღეს, ანალიზი გავაკეთეთ. ორში ვერ მოვასწრებდით ამას 6 საათამდე, წარმოუდგენელი იყო.

სამში საჩივარი შევიტანეთ, ეს ყველაფერი ჯდება კანონის მოთხოვნის ფარგლებში. აქ პრობლემა არაფერი არ იყო. უბრალოდ ის არის, რომ ჩვენი დასაბუთებული მოთხოვნები, არგუმენტირებული მოთხოვნები არ იქნა დაკმაყოფილებული. ეს არის აქ სატკივარი. ამას ჩვენ 1 და 2 ოქტომბერს ვერ გავაკეთებდით. ზერელე იქნებოდა. ჩვენ არ გვინდოდა, ზერელე ყოფილიყო საჩივარი ფიარის გამო.

_ ფიარისთვის არა ბატონო ნუგზარ, მაგრამ ალბათ გახსოვთ, ერთ-ერთი უბნის თავმჯდომარეს ამომრჩეველის პირადობის მოწმობაში ეჭვი შეეპარა და საპატრულო პოლიცია გამოიძახა. მერე აღმოჩნდა, რომ თურმე ბევრი იყო ასეთი ყალბი მოწმობა, თუ თქვენ იცოდით ამის შესახებ, რატომ არ განაცხადეთ იმავე დღეს?

_ არა, ჩვენ არ ვიცოდით. ის რომ ხმები იყო გავრცელებული, ეს მოდიოდა წინა არჩევნებიდან. ყველამ იცოდა, რომ რაღაცა მოხდა, გაიცა ყალბი მოწმობები. ამის დამადასტურებელი ფაქტები ჩვენ არ გვქონდა.

_ რომელ წინა არჩევნებს გულისხმობთ?

_ თვითმმართველობის არჩევნებს. იმ პერიოდში გავრცელდა ხმა, რომ მზადდებოდა ყალბი მოწმობები. ამის თაობაზე ჩვენ ფაქტები არ გვქონდა. ჭორის დონეზე ხომ არ დავიწყებდით დავას? ეს არ არის სამართლებრივი გზა. ამიტომ, რა თქმა უნდა, ჩვენ ვერ ვიაქტიურებდით.

_ მიმართავთ თუ არა სასამართლოს #67 ზუგდიდის საოლქო კომისიის გაწყვეტილებასთან დაკავშირებით?

_ რა თქმა უნდა, სხვანაირად არც შეიძლება.