_ როგორც კი “ქართული ოცნების მაისური ჩავიცვი, მეორე დღესვე ჯარში გამიწვიეს. მიუხედავად იმისა, რომ ჯანმრთელობის პრობლემები და ბრმანაწლავის ოპერაცია ახალი გაკეთებული მქონდა, კომისიამ ჩათვალა, რომ ჯარში უნდა წავსულიყავი. არაფერი გაითვალისწინეს, _ გვითხრა რაულ ცენტერაძემ.
მისივე თქმით, გორის საჯარისო ნაწილში ოფიცრები და სერჟანტები ფიზიკურ და სიტყვიერ შეურაცხყოფას აყენებდნენ:
_ რამდენიმე დღის განმავლობაში სიცხე მქონდა. ვთხოვდი, რომ საავადმყოფოში გადავეყვანე, მაგრამ არ გადავყავდი, ბოლოს კი მომცეს ერთი ტაბლეტი და მითხრეს, რომ ეს საკმარისი უნდა ყოფილიყო, _ ამბობს რაული, რომელიც 1 ოქტომბერს, კანონით კარანტინში მყოფი, სახლში, ხმის მისაცემად, როგორც თავად ამბობს, ხუთიანის შემოსახაზად გამოუშვეს.
_ მითხრეს, რომ სახლში უნდა დავბრუნებულიყავი და არჩევნებზე ხუთიანი შემომეხაზა. მეორე დღეს კი ისევ ნაწილში უნდა მივსულიყავი, _ დასძენს ცენტერაძე, რომელიც არჩევნების შემდეგ ნაწილში აღარ დაბრუნდა. ამის გამო კი, 4 ოქტომბერს, საჯარისო ნაწილიდან სერჟანტმა, ფირუზ გიგუაშვილმა ჩამოაკითხა.
სერჟანტის თქმით, თუ ცენტერაძეს პრეტენზიები გააჩნია, შესაბამის ორგანოებს უნდა მიმართოს.
ჩვენ კითხვაზე, როდის იყო, რომ კარანტინში მყოფ ახალწვეულს, რომელსაც ჯარისკაცის ფიციც კი არ აქვს მიღებული, სახლში უშვებენ, პასუხი ვერ გაგცა და მხოლოდ ის თქვა, რომ რაულ ცენტერაძე ჯერ ჯარისკაცად არ ირიცხებოდა.
აღსანიშნავია, რომ გიგუაშვილს ხელთ სია ჰქონდა, სადაც კონკრეტული ადამიანების ვინაობა და მისამართები იყო მიწერილი. სავარაუდოდ, ეს იმ ადამიანთა სია იყო, რომლებიც ნაწილიდან ხმის მისაცემად გამოუშვეს და უკან არ დაბრუნდნენ.
გიგუაშვილმა არც იმ შეკითხვას გასცა პასუხი, თუ რა სიები ჰქონდა ხელთ:
_ ეს ჩემი პირადი სიაა.
_ პირადი სია რას ნიშნავს? კარგად დავინახეთ, რომ კონკრეტული პირების მონაცემები წერია…
_ სამსახურებრივია…
_ ე.ი. არ ყოფილა პირადი…
_ ჩემი სამსახური ჩემი პირადია, _ დააზუსტა გოგუაშვილმა.
აღნიშნულ შემთხვევას სწავლობენ იურისტები და როგორც ჩვენთვის გახდა ცნობილი, შესაბამისი საჩივარი უკვე მზადაა.
