დირექტორი სკოლის პედაგოგებს ყველა თათბირზე ახსენებდა, რომ ხუთიანი უნდა შემოეხაზათ. არჩევნების დღეს კი, დამკვირვებლის როლში მყოფი სპეციალურ სიებს ადგენდა და ხმის მისაცემად შესულ მოქალაქეებს ხუთიანის შემოხაზვისკენ მოუწოდებდა.
შუაფარცხმაში არჩევნები სკოლის შენობაში ჩატარდა. სწორედ უჯმაჯურიძის კაბინეტში დააფიქსირეს ორი უცხო პიროვნება, რომელიც ამ დირექტორმა კაბინეტში მხოლოდ იმ მიზეზით ჩაკეტა, რომ ინფორმაცია არ გავრცელებულიყო. თუმცა, კადრებში, რომელიც უჯმაჯურიძის კაბინეტთან, არჩევნების დღეს არის გადაღებული, კარგად ჩანს, თუ როგორ ამტკიცებს უჯმაჯურიძე, რომ კაბინეტში სულიერის ჭაჭანებაც კი არ არის.
არჩევნები ისე დასრულდა, რომ გაურკვეველი დარჩა, თუ ვინ ჰყავდა კაბინეტში ჩაკეტილი შუაფარცხმის საჯარო სკოლის დირექტორს. თუმცა, არჩევნების მეოთხე დღეს, “გურია ნიუსმა” სრულიად შემთხვევით გაარკვია, რა მიზნები ჰქონდა უჯმაჯურიძეს და ვინ იყო არჩევნების დღეს მის კაბინეტში.
4 ოქტომბერს, გულიკო უჯმაჯურიძე ერთ ქალბატონს ესაუბრებოდა. მას ჩვენი იქ ყოფნა არ შეუმჩნევია და ამიტომაც თამამად ისაუბრა წინასაარჩევნო პერიოდსა და “ნაციონალების” მიერ დარიგებულ ფულზე.
ჩანაწერში, რომლის ნახვა ჩვენ ვებგვერდზე შეგიძლიათ, კარგად ისმის, როგორ უხსნის უჯმაჯურიძე თანამოსაუბრეს, რომ “ნაციონალების” დარიგებული ფული გაჭირვებულებმა აიღეს. იმასაც ამბობს, რომ ხელისუფლების სამსახურში ის შევარდნაძის დროსაც იდგა, სააკაშვილსაც ეხმარებოდა და ახლაც მიეხმარება ივანიშვილსაც.
ათწუთიანი საკმაოდ საინტერესო საუბარი წინასაარჩევნო პერიოდზე და იმაზე, თუ როგორ აბარებდა პოლიტიკურ ანგარიშს ფარცხმის მაჟორიტარ დეპუტატს, ერეკლე მრელაშვილს უჯმაჯურიძე, შუაფარცხმის “ნაციონალური მოძრაობის” კოორდინატორმა შეაწყვეტინა, რომელმაც ჩვენი კამერა დაინახა.
კამერის წინ დასმულ შეკითხვებთან უჯმაჯურიძე ისევ თამამი ვეღარ იყო. მისი თქმით, ის არაოფიციალურ ფულზე არ საუბრობდა და აღნიშნა, რომ ფული კოორდინატორებს დაურიგეს:
_ ქალბატონო გულიკო, საკმაოდ დიდხანს ვისმენდით თქვენს საუბარს და კოორდინატორები არ გიხსენებიათ. გარკვევით თქვით, რომ ფული გაჭირვებულ ხალხს დაურიგეს…
_ შეიძლება არ მიხსენებია, მაგრამ ვიგულისხმე.
_ კოორდინატორები გაჭირვებულები არიან?
_ არა, რა თქმა უნდა. შეიძლება არიან.
_ თქვენ აქტიურად მუშაობდით “ნაციონალების” სასარგებლოდ… არჩევნების დღეს კი, თქვენს კაბინეტში ადამიანების ჩაკეტვა მოგიხდათ მხოლოდ იმის გამო, რომ ინფორმაცია არ გახმაურებულიყო…
_ ქალბატონები იყვნენ, რაღაცის მოწესრიგება უნდოდათ და იმიტომ შევუშვი.
_ და რატომ დამალეთ ინფორმაცია, რომ კაბინეტში ადამიანები გყავდათ ჩაკეტილები? ჩვენ დაზუსტებულად ვიცით, რომ ისინი “ნაციონალური მოძრაობის” კოორდინატორები იყვნენ…
_ უცხოები არ იყვნენ. მერე რა, რომ კოორდინატორები იყვნენ, ისინი ადამიანები არ არიან? თქვენს კოორდინატორსაც შევუშვებდი, რომ გეთქვათ…
_ ჩვენ არ გვყავს კოორდინატორები. არჩევნების დღეს, შენობაში, სადაც უბანი იყო გახსნილი, თქვენს კაბინეტში “ნაციონალური მოძრაობის” ორი კოორდინატორი მხოლოდ და მხოლოდ მოსაწესრიგებლად იყვნენ შესულებიი? თანაც თქვენ ეს ყველაფერი დამალეთ და იმისთვის, რომ ეს ფაქტი არ გახმაურებულიყო, ისინი არჩევნების მიმდინარეობის განმავლობაში კაბინეტში იყვნენ ჩაკეტილები.
_ იმიტომ ჩავკეტე, რომ არ მინდოდა კაცს გაეღო(?!) და შესულიყო.
_ ქალბატონო გულიკო, ივანიშვილს მთავრობას მხარს დაუჭერთ? ახლა მიხვალთ ადამიანებთან, რომლებსაც ერთი კვირის წინ ხუთიანის შემოხაზვისკენ მიუთითებდით და ეტყვით, რომ მომავალ არჩევნებზე ივანიშვილის პარტიის ნომერი შემოხაზონ?
_ მე, არა, სკოლა დაუჭერს მხარს. სკოლა ყოველთვის სახელმწიფოს იყო და სახელმწიფოს ოპოზიციაში ვერასდროს ჩაუდგებოდა.
_ სკოლა ხომ აპოლიტიკურია და თქვენ ერთი პარტიის კუთვნილება გგონიათ?
_ სკოლა იყო შევარდნაძის დროს, სააკაშვილისაც და იქნება ახლაც.
_ ანუ, ახლა ივანიშვილისთვის იმუშავებთ…
_ მე უკვე გაგეცით ამ შეკითხვაზე პასუხი.
აი, ასეთია ერთი სკოლის ერთი დირექტორის “პოლიტიკური” შეხედულებები. არსებული ინფორმაციით, უჯმაჯურიძის მსგავსად ფიქრობენ ნაციონალების სხვა აქტიური მხარდამჭერები. აღსანიშნავია, რომ შუა ამაღლების სკოლის დირექტორმა, სამსონ ჯიბუტმა, რომელიც “ნაციონალების” სასარგებლოდ აქტიურად მუშაობდა, ჯერ კიდევ არჩევნების დღის საღამოს, სოფლის საარჩევნო უბანთან, ეგზიტპოლების შედეგების გამოქვეყნებისთანავე გვითხრა:
_ თქვენ არ იცით, როგორ ვოცნებობდი, რომ ივანიშვილს გაემარჯვა!
ასე რომ, დღეს უკვე ოცნებებზე საუბარი ხმამაღლა შეიძლება და ცოდვად აღარ ითვლება.
