რუსლან მარგოშვილს დარჩა მეუღლე და 3 მცირეწლოვანი შვილი. როგორც პანკისელები ამბობენ, მოკლულის ჩამოსვენება ვერ მოხერხდა და ის დაკრძალეს თურქეთში , სადაც მარგოშვილმა უკანასკნელი წლები გაატარა.
არაოფიციალური ინფორმაციით, სირიაში ამბოხებულების მხარეს არაერთი პანკისელი ახალგაზრდა იბრძვის. მათი გადაბირება სოციალური ქსელების და პირადი კონტაქტების საშუალებით ხდება. როგორც ამბობენ, ახალგაზრდების შერჩევა -გადაბირებას ადგილობრივი ვაჰაბიტები ხელმძღვანელობენ.
ლოპოტას ხეობაში მოკლული ასლან მარგოშვილის მამიდამ თამარ მარგოშვილმა “გურია ნიუსთან“ საუბარში განაცხადა, რომ ვაჰაბიტებმა ბევრი ახალგაზრდა ააცდინეს სწორ გზას. მამიდა ფიქრობს, რომ მისი ძმიშვილიც, რომელიც წარჩინებული სტუდენტი იყო, სწორედ ვაჰაბიტებმა გადაიბირეს.
”რა უნდა გამოიძიოთ? ეს ბიჭები ისე მოკვდნენ, როგორც ნამდვილ მუსულმანს შეეფერება, ალაჰის გზაზე დადგნენ და მისია შეასრულეს”, _ ეუბნება დუისელი ვაჰაბიტი “გურია ნიუსის“ ჟურნალისტს. ადგილობრივი ქისტები სულ უფრო მეტ უკმაყოფილებას გამოთქვამენ ვაჰაბიტების მომრავლების გამო, რითაც მათი თქმით, ადგილობრივი ხელისუფლებაა დაინტერესებული.
”ვაჰაბიტები ნაციონალების დასაყრდენი ძალაა პანკისში, ხომ ნახეთ 1 ოქტომბერს, როგორც კი საარჩევნო უბანზე ზვიადაური გამოჩნდა , დუისის გამგებელმა მაშინვე ვაჰაბიტებს უხმო დასახმარებლად და ისინიც თვალისდახამხმებაში მოცვივდნენ… წლების მანძილზე მთავრობა აძლიერებდა ამ მიმდინარეობას, ისინი კი ჩვენი შვილების გადაბირების და დაღუპვის ხარჯზე ცხოვრობენ… თუ ბრძოლა უნდათ, თვითონ იბრძოლონ, ჩვენს ბავშვებს დაანებონ თავი,” _ გვეუბნება სოფელ ბირკიანის მკვიდრი.
3 თვის წინ, დუისში ჩეჩენი საველე მეთაურის რუსლან გილაევის ვაჟი რუსტამ გილაევი ჩამოასვენეს. როგორც ასლან მარგოშვილის მამიდა აცხადებს, მას ინფორმაცია აქვს, რომ ასლანი და რუსტამ გილაევი ერთ სახლში ცხოვრობდნენ , სწავლობდნენ არაბულ ენას და გადიოდნენ ფიქოლოგიურ მომზადებას. ადგილობრივები ამბობენ, რომ ვაჰაბიტები პანკისელ ახალგაზარდებს ეგვიპტეში სწავლას და კომფორტულ ცხოვრებას ჰპირდებიან, საბოლოოდ კი, ისინი სხვადასხვა შეიარაღებულ დაჯგუფებებში ხვდებიან.
