“გურია ნიუსი” უცვლელად გთავაზობთ პრეზიდენტის განცხადებას, რომელიც შეხვედრის დასრულების შემდეგ მან მედიასთან გააკეთა:
“მე მინდა ყველას გითხრათ, რომ ეს არის ისტორიული პროცესი. პირველად ამ რეგიონში, პოსტსაბჭოთა სივრცის ამ ნაწილში ხდება აღმასრულებელი ხელისუფლების უმეტესი ფუნქციების მშვიდობიანად, დემოკრატიულ ფარგლებში გადაცემა. ქართველმა ხალხმა გააკეთა თავისი არჩევანი. ჩვენ ყოველთვის ვამბობდით და ვიტყვით, რომ მომავალშიც ქართველი ერის არჩევანს ჩვენ ვცემთ პატივს. ქართველი ხალხი არის უზენაესი მოქმედი პირი ქვეყანაში, რომელიც განსაზღვრავს პოლიტიკურ პროცესებს. ჩვენ ვისაუბრეთ და, რა თქმა უნდა არავისთვის არ არის მოულოდნელი, რომ ჩვენს შორის ფუნდამენტური განსხვავებებია ძალიან ბევრ პოლიტიკურ საკითხზე, ძალიან ბევრ ეროვნულ საკითხზე. მაგრამ ჩვენ, როგორც პასუხისმგებლობის მქონე ხელისუფლება, მე, როგორც პრეზიდენტი, რომელიც არის კონსტიტუციის გარანტი, უზრუნველვყოფ, რომ გადასვლა მთავრობების ფუნქციებს შორის მოხდეს ისე, როგორც არასდროს არ მომხდარა საქართველოს ისტორიაში, მოხდეს ქართველი ხალხის ინტერესების სრული გათვალსიწინებით, მოხდეს პოლიტიკური პროცესების დემოკრატიულ ჩარჩოში შენარჩუნების სრული ინტერესებიდან გამომდინარე. ჩვენ უნდა შევინარჩუნოთ დემოკრატია; მივაღწიოთ იმას, რომ თავისუფალი არჩევნები საქართველოში მომავალშიც ჩატარდეს; რომ დემოკრატია, პირიქით, საქართველოში გაძლიერდეს და საშუალება იყოს მისი განვითარების და ქართველ ხალხს შეექმნას უკეთესი პერსპექტივები.
მე, როგორც პრეზიდენტი და ჩვენ ყველანი, ვიზრუნებთ იმაზე, რომ ქართველი ხალხის ინტერესები იქნას დაცული. ეს იყო ყოველთვის, რაც მამოძრავებდა. ეს იქნება ჩემი მამოძრავებელი ძალა მომავალ თვეებში. მომავალ წლებში, მომავალ ჩემს და ყველა ჩემი თანამებრძოლის მოღვაწეობაში. ამიტომ მე ვფიქრობ, ის, რაც მოხდა, ამას ქართველი ხალხი თავისებურად შეაფასებს, ყველაფერს უნდა დრო, რომ ბევრი რამე დაინახო და გააანალიზო, მაგრამ ახლა ყველანი უნდა ვიყოთ კონცენტრირებული მომავალზე, ყველანი უნდა ვიყოთ კონცენტრირებული ჩვენი ხალხის კეთილდღეობაზე. მიუხედავად ფუნდამენტური განსხვავებებისა და აზრთა სხვადასხვაობისა, პრაქტიკულად, უმეტეს საკითხებზე. ჩვენ მოვახერხეთ და ვახერხებთ ამ პროცესის სამართლებრივად, კონსტიტუციურად სწორ ჩარჩოებში წარმართვას. მე მგონი ეს არის მთავარი რასაც დღეს ყველამ ხაზი უნდა გაუსვით. ამიტომ მინდა ჩვენს ხალხს ვუსურვო წარმატება. დარწმუნებული ვარ საქართველოს ექნება ძალიან მაგარი მომავალი და ჩვენც ვაპირებთ ამ მომავლის მნიშვნელოვანი ნაწილი მივიღოთ როგორც ამ ქვეყნის მოქალაქეები და როგორც პოლიტიკოსები,” _ განაცხადა შეხვედრის დასრულების შემდეგ სააკაშვილმა.
