“გურია ნიუსი” რამდენიმე დღის წინ წერდა, რომ კონკრეტული ჩინოვნიკების მიერ სამინისტროს ბალანსზე არსებული ძვირად ღირებული ავტომანქანებისა და ცეცხლსასროლი იარაღის გადაფორმება მიმდინარეობდა. ამჯერად თავდაცვის სამინისტროს ერთ-ერთი თანამშრომელი გვიკავშირდება, რომელიც 480 ათას ევროდ ღირებული ავტომანქანის შესახებ გვაწვდის ინფორმაციას.
მისი თქმით, თითქმის ნახევარ მილიონ ევროდ შეფასებული ”მერსედესი” ჯავშნიანია და ის სულ ცოტა ხნის წინ შეიძინა თავდაცვის სამინისტრომ. მანქანის თითოეული საბურავის ღირებულება 5 ათასი ევროა. წყაროს ინფორმაციით, მერსედესი ამჟამად ორხევის დასახლებაში განთავსებულ თავდაცვის სამინისტროს ნაწილში დგას და ოფიციალურად ირიცხება ამ ნაწილის ბალანსზე.
ორხევის ნაწილის ბალანსზე ირიცხება ამერიკული წარმოების რვა “ესკალეიდი”, რომელთა საერთო ღირებულება 1 200 000 დოლარია. შესაბამისად, თითოეული მანქანის ფასი 150 ათასია. ისინი ბოლო პერიოდში რამდენჯერმე გამოჩნდა თავდაცვის სამინისტროს ეზოში, მაშინ როდესაც ბაჩო, დათა და როლანდ ახალაიები საიდუმლო შეხვედრებს მართავდნენ გაერთიანებული შტაბის მე-9 სართულზე, ე.წ. ახალაიების აპარტამენტში.
თავდაცვის სამინისტროში სახელმწიფო სახსრების არამიზნობრივი ხარჯვის კიდევ ერთ შემთხვევას იხსენებენ _ საუბარია ძვირადღირებული საათებზე ქართული დროშის სიმბოლიკით, რომელიც სამინისტრომ შვეიცარიაში საათების ცნობილ საწარმოს შეუკვეთა.
”საათები თავიდან კადეტთა კორპუსის წარჩინებული მსმენელებისთვის იყო გათვალისწინებული. გადაწყვეტილი იყო, ფასიანი საჩუქარი მათთვის დიპლომთან ერთად გადაეცათ, თუმცა, მოგვიანებით აღმოჩნდა, რომ ეს საათები კადეტების გარდა ხელზე ყველას ეკეთა, მათ შორის, საათი მინისტრის მამას როლანდ ახალაიასაც შეხვდა”, _ ამბობს თავდაცვის სამინისტროს თანამშრომელი “გურია ნიუსთან” საუბარში.
საათის ფასი 350 დოლარიდან იწყებოდა და ხარისხის და ფერის მიხედვით სამ კატეგორიად იყოფოდა _ შავი ფერი ყველაზე მაღალი კლასის იყო და მინისტრის უახლოეს გარემოცვას ერგო, შემდეგ იყო მწვანე ანუ მეორე კატეგორია და ბოლოს კრემისფერი, რომლებიც სამინიტროში ახალაიასთან დაახლოებულ საშუალო რგოლის ხელმძღვანელებს დაურიგდა..
მილიონობით დოლარის გაფლანგვის ფონზე თავდაცვის სამინისტროში არჩევნების შემდეგ დიდი საკადრო წმენდა იგეგმებოდა. ასახელებენ 200-კაციან შაშკინის ეწ. შავ სიას, რომელშიც ის ადამიანები მოხვდნენ, რომლებიც სისტემისთვის არასანდოდ აღიქმებოდნენ.
