მას უყვარს პრესკონფერენციების გამართვა და საკრებულოს სხდომებზე ხანგრძლივი გამოსვლები, რომელთა შინაარსი, ხშირად ბოლომდე ნათელი არ არის.
10 ოქტომბრის პრესკონფერენციაც, რომელიც პარტიის ადგილობრივ ოფისში გაიმართა და რომელზე დასწრებაც მან კატეგორიულად მოითხოვა ჟურნალისტებისაგან, ჩვეული ბუნდოვანებით ხასიათდებოდა. ბრიფინგი ისე მიუახლოვდა ფინალს, ვერ გავარკვიეთ, რისთვის შეგვკრიბა პოლიტიკურმა ლიდერმა.
როგორც ჩანს, მან ამ თავაზიანი ჟესტით რევერანსი გაუკეთა გამარჯვებულ პოლიტიკურ ძალას, რომელსაც, როგორც თავად ამბობს, არჩევნებში ეხმარებოდა. სხვა დასკვნის გამოტანა ამ პრესკონფერენციიდან ძნელი იყო.
მაკა კვირკველიამ თავდაპირველად მიულოცა “ქართულ ოცნებას” არჩევნებში გამრჯვება და დაამატა, რომ თავიდანვე დარწმუნებული იყო ამ ძალის გამარჯვებაში და არჩევნების დღეს მის უბანში ყველაფერი გააკეთა იმისთვის, რომ ლანჩხუთში კოალიციის კანდიდატს თემურ ჩხაიძეს გაემარჯვა.
არჩევნების ღამეს, ეგზიტპოლის შედეგების გამოცხადების შემდეგ, კვირკველია მართლაც იმყოფებოდა “ქართული ოცნების” საარჩევნო შტაბში და ამ გამარჯვებაში საკუთარ წვლილსაც არ მალავდა.
მილოცვის დასრულების შემდეგ, მან ზოგადად ილაპარაკა მიმდინარე პოლიტიკურ პროცესებზე და როგორც წესი, არც 26 მაისის ტრაგიკული მოვლენების კიდევ ერთხელ გახსენებისგან შეუკავებია თავი. ეს თემა ძალიან მტკივნეულია ბევრი ქართველისთვის, განსაკუთრებით ამ მოვლენების უშუალო მონაწილეთათვის, მაგრამ მუდმივად ამით აპელირება გარკვეულ უხერხულობას უნდა უქმნიდეს პოლიტიკოსს. ყველასათვის ცნობილია, რომ მაკა კვირკველია ამ მოვლენების დროს ფიზიკურად დაზარალდა _ მოიტეხა ფეხი და მიიღო მწვავე ფსიქოლოგიური ტრავმა, მაგრამ ყოველ პრესკონფერენციაზე გამუდმებით ამის შეხსენება ჟურნალისტებისთვის, რა მიზანს ემსახურება, ცოტა გაურკვეველია.
შეკითხვაზე, იყო თუ არა ამ ტრაგიკული მოვლენების დაწყებისას კიდევ ერთი ლანჩხუთელი პოლიტიკოსი გია მაჭარაშვილი მათთან ერთად, კვირკველიამ ოდნავი გაცხარებით უპასუხა, რომ მაჭარაშვილი ბოლომდე იმყოფებოდა აქციაზე. თვით მაჭარაშვილისგან კი მქონდა ინფორმაცია, რომ იგი რამდენიმე წუთით სახლში გაიქცა წამლის დასალევად. მაგრამ მას, რატომღაც, შეკითხვა არ მოეწონა. სწორედ მის პირად პოლიტიკურ გემოვნებას მოჰყვა მოვლენები, რომლებიც პრესკონფერენციის დამთავრების შემდეგ განვითარდა და რომლის მთავარი მოქმედი გმირი გია მაჭარაშვილი იყო.
ჟურნალისტის შეკითხვაზე, ხედავს თუ არა საკუთარი პარტიის ადგილს პოლიტიკაში, მაკა კვირკველიამ თქვა, რომ იარსებებს თუ დროებით შეაჩერებს “თავისუფალი საქართველო” მოღვაწეობას, რომელმაც ლანჩხუთის 38 უბანზე 60 ხმა მიიღო, მხოლოდ პარტიის ლიდერის კახა კუკავას გადასაწყვეტია.
