მაგრამ ეს ამბიცია მისთვის დაუოკებელ ვნებად მას შემდეგ იქცა, რაც ყველა ლანჩხუთელისთვის საყვარელი ვეტერანი ფეხბურთელი მომავალ არჩევნებში კოალიციის რჩეულად დასახელდა.
დათმენის აუცილებლობა, რაც პოლიტიკოსს და ზოგადად საჯარო პირს გამოარჩევს დანარჩენი საზოგადოებისგან, მაჭარაშვილისთვის უცხო ხილია.
მას რამდენიმეჯერ ჰქონდა პრეტენზია მედიის მისამართით, რომელთა შორის “გურია ნიუსს” საპატიო ადგილი უჭირავს, როგორც მისი შეტევების მთავარ ობიექტს.
ჩვენ რამდენიმეჯერ შევთავაზეთ პოლიტიკოსობაზე პრეტენზიის მქონე “ქართული ოცნების” აქტივისტს, საკუთარი უკმაყოფილება ცივილური გზით, მედიის საშუალებით დაეფიქსირებინა, მაგრამ, ეტყობა, ძველბიჭური მენტალიტეტი იმდენად დაუძლეველია მასში, რომ დღემდე ქუჩაში ცდილობს ჟურნალისტებისათვის საქმის გარჩევას _ 10 ოქტომბერს, საღამოს სამსახურიდან გამოსულს გია მაჭარაშვილი ქუჩაში დამხვდა და რბილად რომ ვთქვათ, ნასვამ მდგომარეობაში მყოფმა აგრესიულად გამომიცხადა, რომ დღეიდან ვერც მე და ვერც სხვა ჟურნალისტი მასზე ვერაფერს დაწერს.
მკითხველისთვის ნათელი რომ გახდეს, შევახსენებ, რომ მაჭარაშვილი მას შემდეგაა ჩემზე განაწყენებული, რაც “გურია ნიუსში” გამოქვეყნდა მასალა “დიდი საკადრო წმენდა “ქართული ოცნების” ლანჩხუთის შტაბში”, რომელშიც მოკლედ შევეხეთ მის პოლიტიკურ წარსულს. ეს ისე მტკივნეული აღმოჩნდა პოლიტიკაში კვლავ მობრუნებული გეოლოგისთვის, რომ უკვე მეხუთედ ცდილობს საქმე გამირჩიოს, ამ გამოთქმის პირდაპირი გაგებით. სანამ, ჯერ კიდევ წინასაარჩევნო პროცესი მიმდინარეობდა, იგი ასე თუ ისე, თავს იკავებდა მკვეთრად აგრესიული გამოხტომებისგან, მაგრამ რაც კოალიციამ და მისმა კანდიდატმა გამარჯვებას მიაღწიეს როგორც ლანჩხუთში, ისე მთელი ქვეყნის მასშტაბით, მაჭარაშვილის დაპირისპირება მედიასთან უფრო ხისტი და შემტევი გახდა. მთელ წინასაარჩევნო პერიოდში “ინფო 9” გიორგი გოგუაძის, “გურია ნიუსი” კი გია მაჭარაშვილის შეტევებს იგერიებდა.
მაგრამ მისმა უკანასკნელმა თავდასხმამ ჟურნალისტზე, მხოლოდ იმ მოტივით, რომ გაზეთებმა მასზე წერა შეწყვიტონ, ყველა ეთიკური და მორალური ნორმა დაარღვია.
ამ ინციდენტიდან რამდენიმე ნაბიჯის მოშორებით საკუთარ გუნდთან ერთად იდგა და ინტერესით აკვირდებოდა ჩვენს შორის განვითარებულ მოვლენებს “თავისუფალი საქართველოს” წარმომადგენელი ლანჩხუთში მაკა კვირკველია. მაჭარაშვილის კიდევ უფრო მეტად გაცხარება, სავარაუდოდ კვირკველიას პრესკონფერენციაზე ჩემს მიერ დასმულმა კითხვამ გამოიწვია. ამ ბრიფინგზე მაჭარაშვილი არ იმყოფებოდა. ეტყობა მას ოპერატიულად მიაწოდეს ინფორმაცია, რამაც მას საბოლოოდ დააკარგვინა წონასწორობა. იგი კატეგორიულად მოითხოვდა, შეიძლება ითქვას მემუქრებოდა, რომ ამიერიდან აღარ გამებედა გაზეთის ფურცლებზე მასზე წერა.
სამართლიანობა მოითხოვს აღვნიშნო, რომ მაჭარაშვილი მხოლოდ ერთხელ გახდა ჩემი ინტერესის ობიექტი და ზემოთ აღნიშნული სტატიის გამოქვეყნების შემდეგ, იგი საჯარო პუბლიკაციებში არც ერთხელ აღარ მიხსენებია.
კიდევ ერთხელ გავუმეორებ “მოქმედ პოლიტიკოსს”, რომ საკუთარი შეხედულებები გაზეთის ფურცლებიდან მიაწოდოს საზოგადოებას და რომ ქუჩა არ არის ის ადგილი, სადაც ჟურნალისტს შეიძლება საქმე გაურჩიო. თუმცა, შეიძლება ამ ერთხელაც ტყუილად ვირჯები, რადგან მაჭარაშვილი, როგორც ჩანს ის პიროვნებაა, რომლისთვისაც პოლიტიკოსისთვის დაკისრებული ვალდებულებები ან აუცილებლად შესასრულებელი არ არის, ან სულაც არ არსებობს!
პოლიტიკოსობაზე პრეტენზიების მქონე მაჭარაშვილს ვეტყვით, რომ ჩვენ დამოუკიდებელი მედიასაშუალება ვართ და ვერც ერთი პოლიტიკოსი ან პოლიტიკური ძალა საკუთარ შეხედულებებს ვერ გვიკარნახებს. ყოველთვის ვიმოქმედებთ საზოგადოების ინტერესებიდან გამომდინარე და კანონის ფარგლებში, როგორც არ უნდა ლახავდეს ეს ფსევდოპოლიტიკოსთა ინტერესებს.
