2001 წლის 20 ივნისის აუდიტორული დასკვნით, მისი ღირებულება 5 161 990 ლარს შეადგენდა. 100% წილის მფლობელი აჭარის ფინანსთა და ეკონომიკის სამინისტროა. წესდების მიხედვით კომბინატი რკინა-ბეტონის ნაკეთობებს, რკინის კონსტრუქციების აწარმოებს და მათ რეალიზაცია ეწევა. წესდებით, კომპანია არც სამშენებლო საქმიანობაშია შეზღუდული. დაფუძნებისას ორგანიზაციის დირექტორად იტალიელი მარკო კანისტრარი დაინიშნა. 2003 წელს, კომბინატმა შეირწყა კიდევ ერთი სახელმწიფო შპს _ “ჭოროხის არამადნეულის მასალების ქარხანა”. 2004 წელს ორგანიზაციის დირექტორი მარჯო კანისტრარი საქართველოდან მიდის და ახალი დირექტორად ინიშნება ირაკლი თედორაძე. 2005 წელს ეკონომიკის სამინისტროს “ბათუმის საშენ მასალათა კომბინატს” საჩუქრად გადასცა მერიის ბალანსზე რიცხული 1 342 292 ლარის ღირებულების ფერადი ფილების დამამზადებელი უნივერსალური მანქანა (ზენიტ 940).
2005 წლის ივნისში, ეკონომიკის სამინისტროს “ბათუმის ქიმიური ქარხანა”, “აჭარგაზი”, “ბათუმის მექანიკურ ქარხანა” და სხვა ათეულობით ობიექტი შეაქვთ საპრივატიზაციო ობიექტთა ნუსხაში, მათ შორის, საშენ მასალათა კომბინატიც.
2006 წელს 2 მარტს, “ბათუმის საშენ მასალათა კომბინატის” დირექტორად მინისტრი წკეპლაშვილი ნიშნავს ქიბარ ხალვაშის ძმას, ნიაზ ხალვაშს. 2006 წელსვე ოქტომბერში ხალვაშის მიერ დაფუძნებული კომპანია შპს “დეკო” ყიდულობს “ბათუმის საშენ მასალათა კომბინატს”. აჭარის ფინანსთა სამინისტროდან დოკუმენტს ხელს აწერს ოლეგ ბოლქვაძე, ხოლო შპს “დეკოს” მხრიდან ილია გორაძე. ხელშეკრულების მიხედვით კომპანია 475 ათას დოლარად გაიყიდა. კომპანიის საწესდებო კაპიტალში კი ეკონომიკის სამინისტრომ 3 მილიონ ლარზე მეტი ჩადო.
კომპანია, რომელმაც “ბათუმის საშენ მასალათა კომბინატი” იყიდა, ნიაზ ხალვაშმა 2005 წელს ერთპიროვნულად დააფუძნა და საწესდებო კაპიტალში 2 000 ლარი ჩადო. 2006 წელს “დეკოს” დირექტორობიდან გადადგა და მმართველად ილია გორაძე დანიშნა, რომელმაც შემდეგ კომბინატის ყიდვის შესახებ დოკუმენტს მოაწერა ხელი.
2007 წელს ხალვაშების ოჯახს პრობლემები ექმნება ხელისუფლებასთან და მათ კუთვნილ კომპანიებში საგადასახადო პოლიცია შედის. 2007 წლის 20 სექტემბერს აჭარის მთავარი სამმართველო ანგარიშფაქტურებს და სხვა დოკუმენტაციას ამოღებას აწარმოებს ნიაზ ხალვაშის კუთვნილ შპს “ქსოვილისა” და შპს “დეკოს” შესახებ. ფინანსური პოლიცია პირველად ადებს ყადაღას “დეკოს” ქონებას და მის მფლობელობაში არსებულ “ბათუმის საშენ მასალათა კომბინატს”. ყადაღა მოიცავს 30 022 კვ.მ. მიწის ნაკვეთს, საწარმოო კორპუსს _ 3 731, 35კვ.მ , ლითონის საწყობს _ 207,09 კვ.მ. ელექტრო სადგურს _ 44,44, ქვიშის საშრობს _ 197,05 კვ.მ. ფერადი ფილების საამქროს _ 1 928, 45 კვ.მ. მანქანების სარემონტო საამქროს _ 609,56, ინერტული მასალების დამამუშავებელ საამქრო კომპლექტს, საყოფაცხოვრებო სამეურნეო კორპუსს _ 337 კვ.მ.
2008 წელს, ნიაზ ხალვაში ბაქოშია და ამზადებს მინდობილობას საკუთარ დის სახელზე. მინდობილობის მიხედვით, 2013 წლამდე კომპანიის მართვის სრულ უფლებას აძლევს ფატი ხალვაშს. მომდევნო წელს დირექტორად კომპანიაში უკვე ფატი ხალვაშის ნდობით აღჭურვილი პირი, ბესარიონ ქანთარია მოდის. 2009 წელს სახელმწიფო კიდევ ერთხელ აყადაღებს შპს “დეკოს”.
2011 წლის 12 ივლისს, იმავე კომპანიის დირექტორი, რომელსაც მინდობილობით ფატი ხალვაში ფლობს, ნიშნავს ამავე კომპანიის მფლობელობაში არსებულ “ბათუმის საშენ მასალათა კომბინატის” დირექტორად ფატი ხალვაშს. მიმდინარე წლის აგვისტოში კი ფატი ტოვებს დირექტორობას. ხალვაშს გიორგი ბაგრატიონით ანაცვლებენ. ფატი ხალვაში კი აქტიურად ერთვება “ქართული ოცნების” სახელით პარლამენტში ქობულეთის მაჟორიტარობის კანდიდატად.
შპს “დეკოს” იურიდიულ მისამართზე არსებობს მეორე კომპანია, რომელიც ასევე სახელმწიფოს დაარსებულია და ამჟამად ხალვაშების საკუთრებას წარმოადგენს. შპს “ქსოვილი” 1998 წელს აჭარის სახელმწიფო ქონების მართვის სამინისტრომ მინისტრ ხვიჩიას ბრძანებით დააფუძნა. საწესდებო კაპიტალი 6 134 დოლარია. კომპანიის დაარსების მიზნებში წერია, რომ ორგანიზაციამ სახელმწიფო შეკვეთები უნდა მიიღოს და ძირითადად სამკერვალო, სამრეწველო, სასურსათო და არასასურსათო ფუნქცია ექნება. ორგანიზაციას პუშკინის ქუჩაზე 4 200 კვ.მ. გამოეყო.
2000 წლის 15 ნოემბერს სახელმწიფოსაგან 71,9 პროცენტი იყიდა ირაკლი დვალიშვილმა 29 889,6 დოლარად. 2002 წელს კი იგივე ქონება 105 000 დოლარად მიყიდა ნიაზ ხალვაშს. სამი წლის განმავლობაში, ხალვაში და სახელმწიფო ერთობლივად მართავდნენ კომპანიას. 2005 წელს კი ხალვაშმა სახელმწიფოსაგან დარჩენილი 28,1% 19 500 დოლარად იყიდა. შპს “ქსოვილი”-ს 100% წილის მფლობელი ნიაზ ხალვაშია.
ამჟამად ქიბარ და ფატი ხალვაშების ძმის ნიაზ ხალვაშის საკუთრებაში არის შპს “ქსოვილი”, რომლის შეძენაც ნიაზ ხალვაშს 124 500 დოლარი დაუჯდა და შპს “დეკო”, რომელიც ფლობს 5 161 990 ლარის ღირებულების “ბათუმის საშენ მასალათა კომბინატს”.
2007 წელს ნიაზ ხალვაშმა იყიდა ბათუმის ცენტრში, ევროპის მოედანზე (დუმბაძის 5) საცხოვრებელი სახლი. სახლი 379,72 კვ.მ. შეადგენს და მდებარეობის მიხედვით საშუალო ფასის გათვლით 569 580 დოლარის (922 719,6 ლარის) ღირებულებისაა. 2008 წელს ნიაზ ხალვაშმა ეს სახლი “თიბისი” ბანკში იპოთეკით დატვირთა. იმავე წლის 31 ივლისს კი ჩუქების ხელშეკრულებით სახლი საკუთარ დედას ნაზიკო ხალვაშს გადასცა. ამ სახლში ამჟამად ქიბარ ხალვაშის მშობლები ცხოვრობენ.
